ដោយវុត្ថា
ភ្នំពេញៈ អគ្គនាយកក្រុមហ៊ុនអចលនទ្រព្យអន្តរជាតិ Century21 Advance លោកឡុង គឹមសួគ៌បានមើលឃើញពីស្ថានភាពទីផ្សារ អចលនទ្រព្យនៅកម្ពុជានាពេលបច្ចុប្បន្ននេះ ស្ថិតនៅក្នុងភាពមិនប្រកដប្រជាតាមរយៈម្តងឡើង ម្តងចុះទៅតាមស្ថានភាពនៃការផ្ទុះឡើងនូវ ជំងឺ Covid-19។
លោកបានប្រាប់គេហទំព័រPropertyarea.asia នៅថ្ងៃទី១៧ ខែកក្កដា ឆ្នាំ ២០២០នេះ ឱ្យដឹងថា ទីផ្សារអចលនទ្រព្យនៅកម្ពុជា បានចាប់ផ្តើមកម្រើកឡើងវិញ នៅក្នុងខែឧសភា និងដើមខែមិថុនា តែនៅចុងខែមិថុនា និង ខែកក្កដា នេះ ហាក់មានស្ថានភាពស្ងប់ស្ងាត់ទៅវិញបន្តិច ដោយសារតែកម្ពុជាបានរកឃើញករណីថ្មីនៃជំងឺ Covid-19 ។
លោកបន្តថា “ស្ថានភាពទីផ្សារឥឡូវនេះម្តងឡើង និងម្តងចុះ តែបើធៀបទៅនឹងកាលពីខែមិនា និងខែមេសា ស្ថានភាពទីផ្សារអចលនទ្រព្យនៅពេលនេះកំរើក តែមិនទាន់ខ្លាំងនោះទេ”។ លោកបន្ថែមថា “យ៉ាងណាក៏ដោយលោកថា ស្ថានភាពនាពេលនេះ ក៏អាស្រ័យទៅលើអាជីវកម្មផងដែរ ពោលបើអាជីវកម្មតូចៗ មិនសូវជាប៉ះពាល់ខ្លាំងនោះទេ គឺប៉ះតែអាជីវកម្មធំៗប៉ុណ្ណោះ”។
លោកពន្យល់ថា ចំពោះអាជីវកម្មធំៗ អតិថិជនមុននឹងសម្រេចចិត្តទិញ មានការប្រុងប្រយ័ត្នខ្លាំង តែដូចជាអាជីវកម្មហាងវិញ មិនសូវជាប៉ះពាល់នោះទេ ខណៈរដ្ឋាភិបាលបានទប់ស្កាត់ការរីករាលនៃជំងឺ Covid-19 មិនឱ្យកើតនៅក្នុងសហគមន៍។
លោកឡុង គីមសួគ៌បានបន្ថែមថា នៅតាមទីផ្សារទំនើប យើងឃើញមានមនុស្សចេញចូលច្រើន ភោជនីយដ្ឋានដំណើរការឡើងវិញ ប៉ុន្តែទាក់ទងទៅនឹងការទិញផ្ទះ លក់ផ្ទះវិញ នៅពេលដែលមានករណីផ្ទុះឡើងនូវជំងឺCovid-19 ខ្ញុំមើលឃើញអតិថិជនមានស្ថានភាពស្ងប់ស្ងាត់។
លោក James Hodge នាយករងក្រុមហ៊ុន CBRE Cambodia ធ្លាប់បានឱ្យដឹងដែរថា ការទិញអចលនទ្រព្យនៅតែមានភាពសកម្ម ប៉ុន្តែអ្នកវិនិយោគមានប្រុងប្រយ័ត្នខ្ពស់ ហើយពួកគេចង់ធ្វើឱ្យប្រាកដថា ពួកគេមានព័ត៌មានគ្រប់គ្រាន់ មុនពេលវិនិយោគ ដែលជារឿយៗបញ្ហាអាចកើតឡើងមើលមិនឃើញ។
ទាក់ទងនឹងប្រជាជនក្នុងស្រុក ចាប់ផ្តើមទិញអចលនទ្រព្យ លោក James បាននិយាយថា កម្រិតសកម្មភាពនៅទូទាំងទីផ្សារ កំពុងផ្លាស់ប្តូរយឺតៗឆ្ពោះទៅរកភាពធម្មតា នៅពេលភាពជឿជាក់ត្រឡប់មកវិញ។ ទោះជាយ៉ាងណា វាគួរតែត្រូវបានព្រមានថា ផលប៉ះពាល់នៃ Covid-19 នៅមានពេលវែងឆ្ងាយទៀត ហើយវានៅតែមានភាពខុសគ្នា នៃភាពមិនប្រាកដប្រជា និងគំរាមកំហែងពីទីផ្សារខាងក្រៅ៕
