ដោយៈ រ៉ាណេត
កំពតៈ មន្ត្រីរដ្ឋបាលខេត្តកំពតបានបញ្ជាក់ ពីគម្រោងដែលត្រូវបានស្នើឡើងដោយរដ្ឋបាលខេត្ត ដើម្បីសាងសង់ស្ពានថ្មីមួយមួយខ្សែ និងស្ពានមួយចំនួនទៀតឆ្លងកាត់ដៃសមុទ្រខេត្តកំពត ដើម្បីសម្រួលដល់ការធ្វើចរាចរណ៍ និងលើកកម្ពស់សោភ័ណភាពនៅក្នុងក្រុង ក៏ដូចជាខេត្តកំពតទាំងមូល។
គម្រោងនៃការសាងសង់ស្ពានថ្មថ្មី ឆ្លងកាត់ព្រែកកំពង់បាយក្រុងកំពតត្រូវបានមន្ត្រីរដ្ឋបាលខេត្តកំពត បញ្ជាក់ប្រាប់តាមទូរស័ព្ទកាលពីល្ងាចថ្ងៃទី២៦ ខែកក្កដា ឆ្នាំ២០២០នេះថា គម្រោងខាងលើនេះ ត្រូវបានស្នើឡើងដោយរដ្ឋបាលខេត្ត និងទទួលបានការឯកភាពពីសំណាក់រាជរដ្ឋាភិបាលកម្ពុជា ដែលណែនាំឱ្យមានការសិក្សាលម្អិត ទៅលើលទ្ធភាពនៃការសាងសង់ និងផលប៉ះពាល់មួយចំនួននៅក្នុងគម្រោង។
លោកបន្តថា កាលពីថ្ងៃចុងសប្ដាហ៍កន្លងទៅនេះ លោកអភិបាលខេត្តកំពត ជាវ តាយ បានទទួលជួបសំណណេះសំណាល ពិភាក្សាការងារជាមួយមន្ត្រីពាក់ព័ន្ធ នឹងគម្រោង ព្រមទាំងអ្នកជំនាញមកពីក្រុមហ៊ុន China Road នៅសាលាខេត្ត ដើម្បីជំរុញឱ្យមានការសិក្សាលម្អិតទៅលើលទ្ធភាព និងផលប៉ះពាល់មួយចំនួន ដែលត្រូវដោះស្រាយជាអាទិភាព។
មន្ត្រីដដែលបាននិយាយក្នុងលក្ខខ័ណ្ឌមិនបញ្ចេញឈ្មោះថា “គម្រោងនៃការសាងសង់ស្ពានថ្មី គឺដើម្បីរំដោះការកកស្ទះចរាចរណ៍ នៅក្នុងភូមិសាស្ត្រក្រុងកំពត ខេត្តកំពត ដែលតែងកើមាន ជាពិសេសនៅថ្ងៃចុងសប្ដាហ៍ ដែលតែងមានកំណើនទេសចរយ៉ាងច្រើន មកកម្សាន្តនៅតាមរមណីយដ្ឋានទេសចរណ៍នានា ដែលបណ្តាលឱ្យកកស្ទះយានយន្តលើស្ពានឆ្លងព្រែកកំពង់បាយ។ លោកបន្តថា “កត្តានេះហើយទើបថ្នាក់ដឹកនាំខេត្តកំពត ដោយមានការឯកភាពពីប្រមុខរាជរដ្ឋាភិបាលកម្ពុជា ក្នុងការសាងសង់ស្ពានឆ្លងព្រែកកំពង់បាយថ្មីមួយទៀត ដើម្បីបង្ករលក្ខណៈងាយស្រួល ដល់បងប្អូនប្រជាពលរដ្ឋ និងទេសចរទូទៅផងដែរ” ។
ស្ថិតនៅក្នុងដំណាក់កាលដំបូង នៃការសិក្សាពីលទ្ធភាព នៃការសាងសង់ស្ពានថ្មីព្រែកកំពង់បាយនេះ បច្ចុប្បន្ន គឺនៅមិនទាន់បានលទ្ធផលបានជាផ្លូវការ បាននៅឡើយ ហើយរដ្ឋបាលខេត្ត នឹងលើកយកកិច្ចប្រជុំថ្មីមួយទៀតនៅថ្ងៃខាងមុខដ៏ខ្លីនេះ បន្ទាប់ពីអ្នកជំនាញក្រុមហ៊ុន China Road សិក្សារួច ដើម្បីទទួលបានពីព័ត៌មានលម្អិតពាក់ព័ន្ធទៅនឹងតម្លៃប៉ានស្មានសរុប រយៈពេល និងពេលវេលាជាក់លាក់នៃការសាងសង់ សម្រាប់កសាងជាផែនការមេ ឬប្លង់ធំមុនពេលចាប់ចុះអនុវត្តន៍។
ជាមួយគ្នានេះផងដែរថា លោក ជាវ តាយ អភិបាលខេត្តកំពត ក៏បានដឹកនាំមន្ត្រីជំនាញស្ថាប័នពាក់ព័ន្ធ និងអ្នកជំនាញបច្ចេកទេសរបស់ក្រុមហ៊ុន China Road ចុះពិនិត្យមើលតំបន់គោលដៅ ដែលត្រូវសាងសង់ស្ពានព្រែកកំពង់បាយ រួមជាមួយនឹងស្ពានចាស់ៗមួយចំនួនទៀត ដែលកំពុងមានសភាពទ្រុឌទ្រោម ដែលតម្រូវឱ្យមានការជួសជុលកែលម្អ ឬសាងសងស្ពានថ្មីជំនួស ដែលក្នុងនោះរួមមានស្ពានឥន្ធនូ ស្ពានផ្លូវរថភ្លើង កំពង់ផែសមុទ្រទឹកជ្រៅប្រចាំខេត្ត និងតំបន់សេដ្ឋកិច្ចពិសេសគីឡូ១២ផងដែរ៕
