ដោយ វុត្ថា
ភ្នំពេញៈ គម្រោងវិនិយោគលើវិស័យហេដ្ឋារចនាសម្ព័ន្ធទាំងអស់ របស់រដ្ឋាភិបាល និងវិស័យឯកជននៅតែប្រព្រឹត្តិទៅតាមផែនការ និងនការគ្រោងទុក ពោលគឺមានបញ្ហាអ្វីដែលជំរុញឱ្យមានការរះស្ទះនោះទេ។
លោកវ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់គេហទំព័រ Propertyarea.asia នៅថ្ងៃទី៣ ខែកក្កដា ឆ្នាំ ២០២០នេះបានឱ្យដឹងថា មកដល់ពេលនេះ បើទោះបីមានវិបត្តិជំងឺ Covid-19 ក៏គម្រោងវិនិយោគហេដ្ឋារចនាសម្ព័ន្ធដែលបានអនុវត្តកាលពីកន្លមកនេះ នៅតែដំណើរការធម្មតា។
លោកបន្តថា “គម្រោងទាំងនោះ ដូចជាគ្មានអ្វីប្រែប្រួលទេ ពោលគឺអាចនិយាយថា ប្រព្រឹត្តិទៅតាមផែនការ ។ តែយ៉ាងណាលោកថា “វាក៏មានភាពរអាក់រអ៊ួលខ្លះទៅលើកម្មកំលាំងពលករខ្មែរ និងកម្មករចិនមួយចំនួនតិចតួចបំផុតដែរ” ។ លោកបន្តថា “ម្យ៉ាងទៀត ក៏មានបញ្ហាលើការចចារកញ្ចប់គម្រោងវិនិយោគថ្មី ជាមួយដៃគូអភិវឌ្ឍន៍ផងដែរ ព្រោះរាល់កិច្ចប្រជុំធ្វើឡើងតាមរយៈអនឡាញ ដែលពិបាកក្នុងការសម្រេចិត្តដូចជាការជួបប្រជុំដោយផ្ទាល់” ។
លោកបន្ថែមថា “និយាយរួមកញ្ចប់គម្រោងវិនិយោគថ្មីៗ ហាក់ដូចជាមានភាពយឺតយ៉ាវបន្តិច ព្រោះយើងពិភាក្សា និងទាក់ទងទៅគ្នាតាមរយៈវីដេអូខនហ្វ្រេន និងអ៊ីម៉ែល” ។ លោកបញ្ជាក់ថា “គម្រោងវិនិយោគថ្មីៗ ដែលមានបញ្ហាយ៉ឺតយ៉ាវនេះ ជាគម្រោងវិនិយោគសម្រាប់ឆ្នាំក្រោយៗទៀត” ។
គម្រោងវិនិយោគ លើវិស័យហេដ្ឋារចនាសម្ព័ន្ធភាគច្រើននៅកម្ពុជា ត្រូវបានវិនិយោគតាមរយៈកម្ចីហិរញ្ញប្បទាន និងសម្បទាន ដោយប្រទេសជាដៃគូអភិវឌ្ឍន៍របស់កម្ពុជា តាមរយៈការបញ្ជូនក្រុមហ៊ុនសាងសង់របស់ខ្លួនមកកាន់កម្ពុជា ដូចជាចិន ជប៉ុន កូរ៉េ និងប្រទេសមួយចំនួនទៀត។
បើតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា ប្រទេសចិន ដែលមិត្តដែកថែបរបស់កម្ពុជា បានផ្តល់ហិរញ្ញប្បទាន និងវិនិយោគលើវិស័យហេដ្ឋារចនាសម្ព័ន្ធជាច្រើននៅកម្ពុជា រួមមានផ្លូវ ស្ពាន ផ្លូវល្បឿនលឿន ក្នុងទំហំចំងាយរាពាន់គីឡូម៉ែត្រ៕
