ដោយៈ រ៉ាណេត
ភ្នំពេញៈ ប្រមុខនៃរាជរដ្ឋាភិបាលកម្ពុជាសម្តេចតេជោហ៊ុន សែនបានអះអាងថា កម្ពុជានឹងទទួលបានដីជាង២០០០ហិកតា ពីការដោះដូរជាមួយវៀតណាម ក្នុងការរៀបចំព្រំដែនរវាងប្រទេសទាំង២ ។
សម្តេចតេជោបានថ្លែងក្នុងពិធីបើកដំណើរការសួនទឹកស៊ីធី ហ្កាឌិនស្ថិតក្នុងតំបន់ទីក្រុងរណបតេជោមរកតនាព្រឹកថ្ងៃទី១៦ សីហានេះថា រដ្ឋាភិបាលបានត្រៀមយកដីទាំងនេះ ធ្វើសម្បទានសង្គមកិច្ច ប្រគល់ជូនកងទ័ពការពារព្រំដែន និងនគរបាលតាមព្រំដែន ក៏ដូចជាអតីតយុទ្ធជន ដែលគ្មានដីសម្រាប់តាំងលំនៅដ្ឋាន។សម្តេចបន្តថា ដីដែលនឹងទទួលបានជាង ២០០០ហិកតានេះ នឹងប្រគល់ឱ្យថ្នាក់ខេត្តគ្រប់គ្រង និងត្រៀមរៀបចំសម្រាប់កងទ័ព្ធការពារនៅតំបន់ព្រំដែន។
សម្តេចតេជោបានបញ្ជាក់ថា “ឥឡូវនេះនៅតាមតំបន់ព្រំដែនទាំង២ វៀតណាមត្រូវប្រគល់ដីជាង ២០០០ហិកតា ដែលយើងកំពុងតែត្រៀម ហើយខ្ញុំបានបញ្ជាហើយ ដីនេះនៅពេលដែលវៀតណាមប្រគល់ឱ្យកម្ពុជា ត្រូវប្រគល់ឲ្យខេត្តហើយត្រូវធ្វើជាដីសង្គមកិច្ច ប្រគល់ឱ្យកងទ័ព និងនគរបាលការពារព្រំដែន” ។ សម្តេចបន្ថែមថា “ខ្ញុំមានចំណារលើឯកឧត្តមវ៉ា គឹម ហុង អញ្ចឹងឯកឧត្តមជា សុផារ៉ា នៅពេលក្រោយ ត្រូវត្រៀមយកដីនេះ យើងឱ្យខេត្តគ្រប់គ្រង ហើយអាទិភាពប្រគល់ឱ្យកងទ័ព នគរបាល និងអតីតយុទ្ធជន ដែលគ្មានដីធ្លី” ។
សម្តេចតេជោហ៊ុន សែនបានរំលឹកថា ការរៀបចំព្រំដែននេះ គឺកម្ពុជាយកតាមផែនទី ដែលត្រូវបានតម្កល់នៅអង្គការសហប្រជាជាតិ ហើយបារាំងជាអ្នកគូស កាលពីអតីតកាល។ សម្តេចបានគូសរំលេចពីការដោះដូរដីមួយកន្លែង ដែលស្ថិតនៅក្នុងភូមិស ម្តេច ហេង សំរិន ព្រោះកាលមិនទាន់រៀបចំព្រំដែនថ្មី ភូមិមួយនេះស្ថិតនៅលើដីវៀតណាម មានចំនួន៥០០ហិកតា ធ្វើឱ្យកម្ពុជាត្រូវរកដីដូរជាមួយវៀតណាម ឲ្យបាន៥០០ហិកតាវិញដែរ។
សម្តេចតេជោបានពន្យល់ថា “ភូមិខ្មែរមួយចំនួន ដែលចូលទៅភាគីវៀតណាម ដោយសារតែខ្សែបន្ទាត់ព្រំដែន របស់បារាំងបានគូសបែបនោះ។ ហេតុនេះហើយទើបកម្ពុជា និងវៀតណាម បានព្រមព្រៀងគ្នាក្នុងការដោះដូរដីភូមិរៀងៗខ្លួន” ។
បើតាមប្រសាសន៍សម្តេចតេជោនាយករដ្ឋមន្ត្រី ប្រទេសទាំងពីរមាន៣ជម្រើសក្នុងការរៀបចំព្រំដែន ត្រង់ចំណុចពិបាកៗដូចនេះ រួមមាន៖ ជម្រើសទី១ ត្រូវកាត់ភូមិសម្តេច ហេង សំរិន ទៅឱ្យវៀតណាមគ្រប់គ្រង ដោយរក្សាទុកខ្សែព្រំដែនដដែល។ ជម្រើសទី២ រក្សាខ្សែព្រំដែនដដែល ប៉ុន្តែរើភូមិរបស់សម្តេច ហេង សំរិនចេញ ហើយរកដីឱ្យគាត់ធ្វើភូមិថ្មីនៅក្នុងដីខ្មែរ។ រីឯជម្រើសទី៣ ត្រូវដោះដូរដីគ្នា ដោយរៀបចំខ្សែព្រំដែនជាថ្មី។ កម្ពុជា-វៀតណាម បានព្រមព្រៀងគ្នា ដោះស្រាយបញ្ហានេះដោយយកចំណុចទី៣ គឺត្រូវដូរខ្សែព្រំដែន ដោយគូសខ្សែព្រំដែនថ្មី ព័ទ្ធយកភូមិសម្តេចហេង សំរិន ឱ្យមកនៅក្នុងដីខ្មែរ។
សម្តេចតេជោ ហ៊ុន សែនបានបញ្ជាក់ជាថ្មីថា ការរៀបចំព្រំដែនរវាងកម្ពុជា និងវៀតណាម បានធ្វើតាមផែនទីបោន ១/១០០ ០០០ និងផែនទី UTM ១/៥០ ០០០ ។ សម្រាប់ផែនទី១/២៥ ០០០ គឺធ្វើឡើងដើម្បីងាយស្រួល ក្នុងការមើលនិយាមការលើព្រំដែនជាក់ស្តែង។
សម្តេចតេជោបានថ្លែងថា “ព្រំដែនរវាងកម្ពុជា និងប្រទេសជិតខាង មិនស្ថិតនៅលើមាត់របស់ក្រុមប្រឆាំងទេ គឺស្ថិតនៅលើច្បាប់អន្តរជាតិ” ។
កម្ពុជានិងវៀតណាម មានព្រំដែនគោកជាមួយគ្នាប្រវែង ១,២៧០គីឡូម៉ែត្រ ដោយយោងទៅតាមការកំណត់ក្នុងផែនទីបោនខ្នាត១ លើ១០០,០០០ ដែលបន្សល់ទុកពីសម័ យអាណានិគម និងបានតម្កល់ទុកនៅអង្គការសហប្រជាជាតិ។ ការបោះបង្គោលព្រំដែននៃប្រទេសទាំងពីរ បានចាប់ផ្តើមធ្វើឡើងតាំងពីឆ្នាំ២០០៥ មក ដែលរហូតមកដល់ពេលបច្ចុប្បន្នការបោះបង្គោលព្រំដែននេះ សម្រេចបានប្រមាណ ៨៤ភាគរយហើយ៕
