ដោយ ហ្សូលី
ភ្នំេពញ៖ ទីតាំងគឺជាអាទិភាពដែលភ្នាក់ងារលក់អចលនទ្រព្យ ឬម្ចាស់អចលនវត្ថុ តែងតែលើកពីចំនុចសក្តានុពលទីតាំងដើម្បីបញ្ចុះបញ្ចូលដល់អតិថិជន និងវិនិយោគិន។ តើមូលហេតុអ្វីបានជាទីតាំងមានសារៈសំខាន់ក្នុងការវិនិយោគអចលនទ្រព្យ?
យោងតាមអ្នកជំនាញអចលនទ្រព្យបានឱ្យដឹងថា វិនិយោគិន និងអ្នកជាវអចលនវត្ថុទាំងអស់ គប្បីស្រាវជ្រាវពីតំបន់ឱ្យបានច្បាស់លាស់ មិនមែនសម្លឹងនិងស្វែងយល់ពីស្ថានភាពឬសក្តានុពលបច្ចុប្បន្នរបស់ទីតាំងនោះតែមួយមុខឡើយ។ ដើម្បីទទួលបានទីតាំងវិនិយោគល្អ ត្រូវស្វែងយល់ពីអតិតកាលរបស់ទីតាំង និងសក្តានុពលអភិវឌ្ឍនាពេលអនាគតរបស់ទីតាំងនោះ។
លោក អ៉ិន សំណាង អ្នកជំនាញអចលនទ្រព្យនិងជាអគ្គនាយកក្រុមហ៊ុន Show Up Real Estate មានប្រសាសន៍ថា ហេតុផលដែលជម្រុញឱ្យកត្តាទីតាំងមានសារៈសំខាន់ ព្រោះទោះបីជាមានបញ្ហាសេដ្ឋកិច្ច ជាក់ស្តែងដូចជាវិបត្តិកូវីដស្រាប់ កាលណាអ្នកទិញចេះជ្រើសរើសទីតាំងល្អ គឺនៅតែលក់ចេញបាន ដោយមិនបារម្ភរឿងគ្មានទីផ្សារ។
លោកបន្ថែមថា តំបន់ក្រាំងធ្នង់ និងខណ្ឌសែនសុខផ្ទាល់ សុទ្ធតែជាទីតាំងដែលមានចរន្តទិញ-លក់ជាធម្មតា ដោយសារតែអ្នកទិញឬអ្នកវិនិយោគ ចេះជ្រើសរើសនិងសង្កេតពីសក្តានុពលរបស់វា។
ជាក់ស្តែង ដើម្បីដឹងថាទីតាំងណាមួយជាកន្លែងល្អសម្រាប់អ្នកក្នុងការបោះទុនវិនិយោគនៅទីនោះ គួរតែសម្លឹងមើលចំនុចសំខាន់ៗដូចជា តំបន់ពាណិជ្ជកម្មឬតំបន់ស្ថាប័ន។ អតិថិជនអាចប៉ាន់ប្រមាណពីបញ្ហាផ្ទាល់ខ្លួនជាមុន ថាតើតំបន់នោះនៅក្បែរឬអាចចំណាយពេលតិចសម្រាប់ធ្វើដំណើរទៅប្រកបការងារដែរឬទេ? អ្នកមិនអាចចំណាយពេលរហូតដល់ ១ម៉ោង ទើបធ្វើដំណើរដល់កន្លែងធ្វើការបានទេ។
ហេដ្ឋារចនាសម្ព័ន្ធជាចំនុចផ្គួបផ្សំ ព្រោះអតិថិជនមានសិទ្ធគ្រប់គ្រាន់ដឹងអំពីបម្រែបម្រួលដំណើរការអភិវឌ្ឍតាមរយៈការសាកសួរភ្នាក់ងារលក់ តាមដានព័ត៌មាន និងស្រាវជ្រាវដំណឹងមកពីប្រភពផ្សេងៗ។
យ៉ាងណាក៏ដោយ អ្នកទិញអចលនទ្រព្យត្រូវតែដឹងឱ្យច្បាស់ពីគោលបំណង និងអត្ថប្រយោជន៍របស់ទីតាំងវិនិយោគនោះ ចៀសវាងការខាតបង់ ព្រោះទីតាំងល្អពិត ប៉ុន្តែអាចមិនសាកសមសម្រាប់ស្ថានភាពបច្ចុប្បន្នរបស់អ្នក៕0
