រោងចក្រផលិតដែកថ្មីមួយនៅក្នុងស្រុកឧត្តុងនឹងដាក់ឱ្យដំណើរការឆាប់ៗនេះ

ដោយវុត្ថា

ភ្នំពេញ៖ រោងចក្រផលិដែកថ្មីមួយដែលកំពុងវិនិយោគដោយក្រុមហ៊ុនចិន នៅស្រុកឧត្តុង ខេត្តកំពង់ស្ពឺនឹងដាក់ឱ្យដដំណើរការឆាប់ៗខាងមុខនេះ ដោយបឋមប្រើប្រាស់ការរំលាយដែកអេតចាយជាសំណល់រឹងនានាក្នុងប្រទេស និងអាចនាំដែកដុំជាវត្ថុធាតុដើមពាក់កណ្តាលសម្រេចមកផលិតជាដែកសំណង់។

លោក កែវ រតនៈ ប្រតិភូនៃរាជរដ្ឋាភិបាលកម្ពុជាទទួលបន្ទុកជាអគ្គនាយអគ្គិសនីកម្ពុជា បានឱ្យដឹងបែបនេះ នៅក្នុងជំនួបសំណេះសំណាលជាមួយនិយោជិត-កម្មករ និងការចុះទស្សនកិច្ចការងារនៅក្រុមហ៊ុន HONG DE SHENG STEEL ( CAMBODIA) Co.LTD នៅថ្ងៃទី ២១ ខែកញ្ញា ឆ្នាំ ២០២០នេះ ។

លោកបន្តថា ជាមួយនឹងដាក់ឱ្យដំណើរការរោងចក្រផលិតដែកនាពេលខាងមុខនេះ អគ្គិសនីកម្ពុជាជួយផ្តល់ប្រភពអគ្គិសនីពី៣០ ទៅ ៥០ មេហ្កាវ៉ាត់ជូនក្រុមហ៊ុនតាមតម្រូវការ ដើម្បីកាត់បន្ថយការនាំដែកពីបរទេសចូល និងបង្កើតការងាររាប់រយកន្លែងជូនប្រជាពលរដ្ឋខ្មែរ។

លោក LIN XIANGRONG ប្រធានក្រុមប្រឹក្សាភិបាលនៃក្រុមហ៊ុន HONG DE SHENG STEEL ( CAMBODIA) Co.LTD
បានថ្លែងថា ក្រុមហ៊ុនរបស់លោក បានមកវិនិយោគ នៅក្នុងប្រទេសកម្ពុជាតាំងពីឆ្នាំ២០១៩មក ។ លោក បន្តថា ដោយសារតែ កម្ពុជាមានសុខសន្តិភាព និងការអភិវឌ្ឍ បានបង្កលក្ខណៈ អំណោយផលដល់ការវិនិយោគរបស់វិស័យឯកជន នៅក្នុងនោះមានក្រុមហ៊ុនលោកមួយដែរ។

លោកបន្តថា កម្ពុជាបានបើកចំហនិងលើកទឹកចិត្តដល់ការវិយោគពីបរទេស ដើម្បីជាការចូលរួមចំណែកលើកកម្ពស់សេដ្ឋកិច្ច អភិវឌ្ឍន៍ប្រទេសជាតិ ពិសេសការផ្តល់ការងារដល់ប្រជាពលរដ្ឋធ្វើ រស់នៅក្នុងជីវភាពសមរម្យ ប្រទេសជាតិមានសុខសន្តិភាព។

ក្រុមហ៊ុន HONG DE SHENG STEEL ( CAMBODIA) Co.LTD គឺជាគម្រោងទី១របស់ ហុង ឌី សេងគ្រុប ក្នុងតំបន់អាស៊ីអាគ្នេយ៍ ដែលបានបង្កើតឡើងក្នុងឆ្នាំង២០១៩។ ក្រុមហ៊ុននេះ មានមូលដ្ឋាន និងទីតាំងស្ថិតនៅរាជធានីភ្នំពេញដែលមានផ្ទៃដីប្រមាណ១២ហិចតា។

ក្រុមហ៊ុននឹងចាប់ផ្តើមផលិតជាផ្លូវការនៅឆ្នាំ២០២០ ផលិតផលសំខាន់ៗក្នុងក្រុមហ៊ុនមានដូចជា ដែកថ្នាំងអំពៅ និង ដែកកង ហើយគំរោងផលិតក្នុងលើកទីមួយប្រមាណជា៥០ម៉ឺនតោន៕