ដោយៈ រ៉ាណេត
ភ្នំពេញៈ ខុសប្លែកពីផ្នែកដទៃនៃវិស័យអចលនទ្រព្យ និងសំណង់នៅកម្ពុជា ដែលកំពុងទទួលរងនូវផលប៉ះទង្គិច ពីវិបត្តិសេដ្ឋកិច្ចជាសកលនោះ សម្រាប់តែទីផ្សារលំនៅដ្ឋាននៅតែអាចរក្សាបាននូវភាពល្អប្រសើរ និងមានតម្រូវការខ្ពស់ ខណៈដែលការអភិវឌ្ឍន៍នៅតែបន្តមានយ៉ាងមមាញឹក។
ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ា លី ហួរ បានមានប្រសាសន៍នៅថ្ងៃទី២៣ ខែកញ្ញា ឆ្នាំ២០២០កន្លងមកថា ទីផ្សារលំនៅដ្ឋាននៅកម្ពុជា នៅតែមានភាពល្អប្រសើរ បើប្រៀបធៀបទៅនឹងបណ្តាប្រទេសមួយចំនួន ដែលស្ថិតនៅក្នុងតំបន់អាស៊ាន។
លោកឧកញ៉ាបញ្ជាក់ថា“និយាយជារួមវិស័យអចលនទ្រព្យ ត្រូវបានគេមើលឃើញថា មានការធ្លាក់ជាសាកល ដែលបណ្តាលមកពីវិបត្តិសេដ្ឋកិច្ចសាកល ក្រោមឥទ្ធិពលនៃជំងឺ Covid-19 ប៉ុន្តែសម្រាប់ប្រទេសកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគេចចេញពីវិបត្តិដ៏ធ្ងន់ធ្ងរមួយនេះ ហើយបានពង្រឹងលើវិស័យសេដ្ឋកិច្ចបានយ៉ាងប្រសើរ” ។
លោកឧកញ៉ាបានបន្តថា វិស័យអចលនទ្រព្យនៅកម្ពុជា ក៏ទទួលរងនូវផលប៉ះពាល់ដែរ ប៉ុន្តែហាក់មិនធ្ងន់ធ្ងរខ្លាំងពេកនោះទេ ជាក់ស្ដែងដូចជាវិស័យដីធ្លី និងលំនៅដ្ឋាន គឺនៅតែមានដំណើរការធម្មតា មានការសាងសង់ មានការទិញ-លក់ ដដែល ជាពិសេសនៅតាមតំបន់ជាយក្រុង។
ស្រដៀងនឹងការលើកឡើងខាងលើនេះ លោក ម៉ាន់ ច័ន្ទឌី អគ្គនាយកក្រុមហ៊ុន PREMIUM Group បានមានប្រសាសន៍ថា “តម្រូវការលំនៅដ្ឋានសម្រាប់ស្នាក់នៅជាក់ស្ដែងរបស់ប្រជាពលរដ្ឋកម្ពុជា នៅពេលបច្ចុប្បន្ននេះនៅតែមាន ក្នុងអត្រាខ្ពស់នៅឡើយ បើទោះជាការអភិវឌ្ឍន៍ និងផ្គត់ផ្គង់យ៉ាងច្រើនដូចដែលបានឃើញនៅពេលនេះ ក៏នៅតែមិនទាន់គ្រប់នោះទេ” ។
លោកបញ្ជាក់ថា តំបន់ជាយក្រុងនានា បានក្លាយជាគោលដៅវិនិយោគ និងអភិវឌ្ឍន៍របស់ក្រុមហ៊ុនសាងសង់ ដោយសារតែតម្លៃដីនៅធូរថ្លៃ ដែលអាចមានឱកាសទទួលបានចំណេញ ពីការវិនិយោគប្រភេទលំនៅដ្ឋានប្រណីត តម្លៃសមរម្យត្រឹមជាង៧ម៉ឺនចុះក្រោម។ ជាក់ស្ដែងដូចជានៅតំបន់ទំនប់កប់ស្រូវ តំបន់ភាគខាងលិចឈៀងខាងជើងក្រុង ក៏ដូចជាតំបន់ផ្លូវជាតិលេខ៦A និងតំបន់ក្បែរផ្លូវជាតិលេខ១ជាដើម។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម ធ្លាប់មានប្រសាសន៍កាលពីពេលកន្លងទៅថ្មីៗថា ទោះក្នុងកាលៈទេសៈបែបណា តម្រូវការលំនៅឋាន នៅតែបន្តមានពីសំណាក់ពលរដ្ឋកម្ពុជា ទាំងតម្លៃវិញក៏មិនចុះថ្លៃផងដែរ ដើម្បីឆ្លើយតបទៅតម្រូវការនេះ អ្នកអភិវឌ្ឍន៍ បន្តអភិវឌ្ឍន៍គម្រោងលំនៅដ្ឋានទាំងតម្លៃកម្រិតមធ្យម និងកម្រិតខ្ពស់។
លោកបន្តថា “តាមការមើលឃើញជាក់ស្តែង នៅតាមបណ្តោយផ្លូវជាតិសំខាន់ៗចេញពីភ្នំពេញទៅតាមបណ្តាខេត្ត មានគម្រោងអភិវឌ្ឍន៍ទាំងលំនៅឋានកម្រិតមធ្យម និងកម្រិតខ្ពស់ ជាច្រើនមានការកើនឡើងច្រើន និងបន្តរីកចំរើនបន្ថែមទៀត ក្រោយពេលដែលហេដ្ឋារចនាសម្ព័ន្ធមួយចំនួនត្រូវបានបញ្ចប់ការសាងសង់” ៕
