ដោយ ៖ វុត្ថា
ភ្នំពេញ ៖ បើទោះបីជាកម្ពុជាកំពុងប្រឈមទៅនឹងវិបត្តិជំងឺ Covid-19 រហូតមកដល់ពេលនេះយ៉ាងណាក្តី ប៉ុន្តែសម្រាប់តម្លៃអចលនទ្រព្យនៅក្នុងរាជធានីភ្នំពេញ នៅតែរក្សាបានភាពរឹងមាំ និងមិនមានការប្រែប្រួល ឬធ្លាក់ចុះនោះទេ។
លោកស្រី អាន សុធិតា នាយិកាប្រចាំប្រទេសក្រុមហ៊ុនអន្តរជាតិ CBRE Cambodia បានប្រាប់គេហទំព័រ propertyarea.asia នៅថ្ងៃទី១ ខែតុលា ឆ្នាំ ២០២០នេះថា វិស័យអចលនទ្រព្យ និងសេដ្ឋកិច្ចនៅក្នុងពិភពលោក បានទទួលរងនូវផលប៉ះពាល់យ៉ាងខ្លាំងចាប់តាំងពីមានការផ្ទុះឡើយនូវជំងឺ Covid-19 ប៉ុន្តែសម្រាប់តម្លៃអលចនទ្រព្យនៅកណ្តាលក្រុងភ្នំពេញស្ថិតនៅថេរ។
លោកស្រីពន្យល់ថា “តម្លៃអចលនទ្រព្យកណ្តាលក្រុងភ្នំពេញ រហូតមកដល់ពេលនេះ គឺមិនមានការធ្លាក់ថ្លៃនោះទេ ពោលគឺតម្លៃនៅថេរនៅឡើយ ដោយសារមិនសូវមានប្រតិបត្តិការទិញ-លក់ពីអ្នកវិនិយោគក្រៅស្រុក ខណៈដែលលទីផ្សារអចលនទ្រព្យរបស់កម្ពុជាភាគច្រើនពឹងផ្អែកលើវិនិយោគិនចិន”។
ទោះជាយ៉ាងណាក៏ដោយ លោកស្រីបន្ថែមថា ប្រតិបត្តិការទិញលក់អចលនទ្រព្យនៅក្នុងប្រទេសកម្ពុជា ចាប់តាំងពីមានការផ្ទុះឡើងនូវជំងឺ Covid-19 មានតែអ្នកវិនិយោគនៅក្នុងស្រុកទាំងអស់ ដែលមានតម្លៃក្រោម ១លានដុល្លារអាមេរិក ប៉ុណ្ណោះ ខណៈដែលវិនិយោគិនមកពីក្រៅស្រុក ជាពិសេសវិនិយោគិនមិនសូវមាននោះទេ ពោលគឺមិនអាចធ្វើដំណើរមកកម្ពុជាបានដោយព្រួយបារម្ភពីការឆ្លងនូវជំងឺ Covid-19 ។
លោក ច្រឹក សុខនីម ប្រធានសមាគមភ្នាក់ងារ និងវាយតម្លៃលអចលនវត្ថុកម្ពុជា បានឱ្យដឹងថា ស្ថានភាពអលចនទ្រព្យនៅក្នុងកម្ពុជាបច្ចុប្បន្ននេះ មិនមានអ្វីប្រែប្រួលនោះទេ ខណៈប្រតិបត្តិការទិញលក់នៅក្នុងស្រុកនៅតែមានធម្មតា តែមិនមានទំហំធំដូចពីមិនទាន់មានការផ្ទុះឡើងនូវជំងឺ Covid-19 ។
លោកបន្តថា “ការដែលមានប្រតិបត្តិការទិញលក់ពីសំណាក់អ្នកវិនិយោគមកពីក្រៅស្រុក ដោយសារប្រទេសនីមួយៗ ក៏ដូចជាកម្ពុជា បានរឹតត្បិតការធ្វើដំណើររបស់អ្នកនិយោគអន្តរជាតិដែលមានបំណងមកវិនិយោគនៅក្នុងប្រទេសកម្ពុជា តែយ៉ាណាតម្លៃអចលនទ្រព្យនៅក្នុងប្រទសហាក់មិនទាន់មានការការចុះថ្លៃផងដែរ”។
លោកបន្ថែមថា “ស្ថានភាពទីផ្សារអចលនទ្រព្យនៅក្នុងប្រទេសកម្ពុជា ទាមទារក្នុងរយៈពេលយូរបន្ថែមទៀត ទើបអាចមានស្ថានភាពដូចដើម ខណៈជំងឺ Covid-19 នៅក្នុងពិភពលោកស្ថិតនៅក្នុងភាពមិនប្រកដប្រជា”៕
