អ្នកលក់អចលនទ្រព្យ មានជម្រើសពីរលើការបង់ពន្ធលើចំណេញមូលធន

ដោយ៖ ប៊ី
ភ្នំពេញ៖ បន្ទាប់មានការព្រួយបារម្ភអំពីពន្ធលើចំណេញមូលធន ក្នុងអត្រាពន្ធ ២០ភាគរយ ដែលនឹងដាក់ឱ្យអនុវត្តពីដើមឆ្នាំ ២០២១ ក្រសួងសេដ្ឋកិច្ច និងហិរញ្ញវត្ថុ និងអគ្គនាយកដ្ឋានពន្ធដារ បានពន្យល់លម្អិតពីពន្ធលើចំណេញមូលធន និងលើកថា អ្នកលក់អចលនទ្រព្យ មានជម្រើសពីរលើការបង់ពន្ធលើចំណេញមូលធន។

ថ្លែងក្នុងកម្មវិធី “ពន្ធដារកម្ពុជា” ស្តីពី ពន្ធលើចំណេញមូលធន នៅថ្ងៃទី១ ខែតុលា ឆ្នាំ២០២០ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ កន្លងទៅ មានមតិមហាជន តែងតែលើកឡើងថា ពន្ធនេះមានអត្រា ២០ ភាគរយ ដែលជាទូទៅគឺមានការលើកឡើង ការព្រួយបារម្ភ ដូចជាការរអ៊ូរទាំដែរថា អត្រា ២០ ភាគរយនេះខ្ពស់ តែ២០ភាគរយនេះគឺសូមជម្រាបជួនថា បន្ទាប់ពីការកាត់កងការចំណាយហើយ ដូច្នេះរដ្ឋាភិបាលបានអនុគ្រោះ ៨០ភាគរយ ដោយទុក ២០ភាគរយដើម្បីយកមកគណនាជាមួយអត្រា២០ភាគរយនេះ។

លោក បានថ្លែងថា បើនិយាយរួមទៅវាប្រមាណជា ៤ភាគរយ។ ៤ភាគរយចំពោះរូបវ័ន្ធបុគ្គលទូទៅដែល។ នេះជាមូលដ្ឋាននៃគិតពន្ធ។ បើមិនមានមូលដ្ឋានអីទេ យើងខ្ញុំយកតាមប្រកាសតម្លៃរបស់ក្រសួងសេដ្ឋកិច្ច និងហិរញ្ញវត្ថុ ដោយដកចេញ ៨០ភាគរយ ហើយគុណនឹង២០ភាគរយនេះតែម្តង។

លោក បានឱ្យដឹងទៀតថា យើងមិនមែនយកបញ្ញាត្តិនេះ តាមប្រទេសនានានោះទេ គឺយើងយកទៅតាមសភាពការជាក់ស្តែងនៃប្រទេសកម្ពុជា។ បើយកទៅតាមប្រទេសអភិវឌ្ឍន៍ ឬកំពុងអភិវឌ្ឍន៍មួយចំនួនទៀត អត្រាខ្ពស់ជាងកម្ពុជាឆ្ងាយណាស់ ដូច្នេះហើយយើងយកតែ ២០ភាគរយ នៃ២០។ វាអាចស្មើប្រហែល ៤ភាគរយ បើគិតតាមតម្លៃនៃអចលនទ្រព្យ ដែលប្រកាសដោយក្រសួងសេដ្ឋកិច្ច និងហិរញ្ញវត្ថុ គឺទាបជា ៤ភាគរយនេះទៀត ដូច្នេះក្នុងរង្វង់ពី ២ទៅ៣ភាគរយ ទៅតាមការប្រកាសរបស់ក្រសួងសេដ្ឋកិច្ច និងហិរញ្ញវត្ថុ។

លោក ថា ទឹកប្រាក់បង់ពន្ធប្រហែលជាទាបជាងប្រាក់កំរៃជើងសារ ដែលអ្នកលក់បានបង់ទៅឱ្យភ្នាក់ងារ ហើយកំរៃជើងសារជាទូទៅគឺ ៣ភាគរយ។
លោក ដូច្នេះវាមិនមែន ២០ភាគរយលើចំណុលដុល ដែលមហាជនមួយចំនួនបានលើកឡើងនោះទេ។

លោក វ៉ាន់ ពុទ្ធិពល អនុរដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ បានថ្លែងថា ពន្ធនេះត្រូវបានកំណត់ដោយច្បាប់ ឱ្យយកតាំងតែពីឆ្នាំ ២០០៧មកម្លេះ ប៉ុន្តែដោយសារថា សភាពការសេដ្ឋកិច្ចរបស់កម្ពុជា មិនទាន់អំណោយផល ហើយរាជរដ្ឋាភិបាល បានពន្យាពេលមកដល់សព្វថ្ងៃនេះ។

លោក ប្រសាសន៍ថា “មានសំនួរមួយចំនួន សួរថា ហេតុចាំបាច់យកពន្ធនេះ ខ្ញុំជម្រាបជួនថា ប្រជាជនកម្ពុជាទាំងអស់ត្រូវមានការចូលរួមចំណែកក្នុងការបង់ពន្ធ ដើម្បីផលប្រយោជន៍នៃថវិកាជាតិ។ បើយើងពិនិត្យកន្លងយូរមកហើយ សូម្បីតែនាយោជិតរបស់ក្រុមហ៊ុន សហគ្រាស រោងចក្រ និងកម្មករផ្សេងៗដែលមានប្រាក់បៀវត្តន៍ជាប់ដល់កម្រិតត្រូវបង់ពន្ធ គឺគេបានចូលរួមចំណែកបង់ពន្ធយូរមកហើយ”។

ក៏ប៉ុន្តែដោយឡែកចំពោះ រូបវន្តបុគ្គលមួយចំនួន ដែលប្រកបរបរខាងវិស័យអចលនទ្រព្យ គឺពុំបានចូលរួមឱ្យបានគ្រប់គ្រាន់ទៅតាមកាតព្វកិច្ចរៀងៗខ្លួនទេ មានន័យថា បើសិនជាមានប្រាក់ចំណូល គឺត្រូវបង់។ នេះជាផ្នែកមួយនៃប្រាក់ចំណូលដែលប្រជាជនគ្រប់រូបមានកាតព្វកិច្ចបង់ចំពោះរដ្ឋ។

មានសំនួរខ្លះលើកឡើងថា ហេតុអ្វីបានពន្ធថ្លៃរហូតដល់ ២០ភាគរយ? បងប្អូនមួយចំនួនច្រឡំថា ពន្ធនេះស្មើនឹង ២០ភាគរយនៃតម្លៃលក់។ លោក បានពន្យល់ថា អត្រា ២០ភាគរយលើកម្រិតចំណេញមូលធន ដែលសម្រេចបានដោយរូបវត្តបុគ្គល។
ឧទាហរណ៍ ប្រសិនបើបុគ្គលម្នាក់ ទិញដី ឬទិញអគារណាមួយក្នុងតម្លៃ ១០ ម៉ឺន។ បើគាត់លក់ទៅវិញ គាត់មានឯសារត្រឹមត្រូវ មានការបញ្ជាក់ច្បាសលាស់ ពីស្ថាប័នមានសមត្ថកិច្ច ហើយគាត់លក់ទៅវិញទាបជាតម្លៃនេះ ដោយគាត់មានឯកសារការពារថា គាត់បានលក់ត្រឹមត្រូវដូច្នេះមែន។ បើគាត់លក់ខាត គាត់មានបង់ពន្ធលើមូលធននោះទេ។

ប៉ុន្តែប្រសិនបើគាត់លក់លើសពីតម្លៃ ដែលគាត់ទិញ។ ឧទាហរណ៍គាត់លក់ក្នុងតម្លៃ ១៥ ម៉ឺន គឺគាត់មានជម្រើសពីរ។ គាត់អាចជ្រើសយកវិធីណាមួយ ដែលគាត់ចំណេញជាង។ ឧទាហរណ៍ថា ប្រសិនគាត់ទិញមកតម្លៃ ១០ ម៉ឺន គាត់ចំណាយលើការកែលម្អ ២ម៉ឺន គាត់ក្ចីលុយធនាគារមកបង់ការប្រាក់ ឬចំណាយលើសេវាផ្សេងៗ ១ម៉ឺនទៀត និងចំណាយផ្សេងៗ គាត់លក់ចេញ ១៥ ម៉ឺន ហើយចំណេញតែ ១ម៉ឺនម ដូច្នេះគាត់មានឯកសារច្បាស់លាស់ត្រឹមត្រូវ ដូច្នេះយក ១ម៉ឺន ត្រូវយកគុណនឹង ២០ ភាគរយ។

ប្រសិនបើគាត់អត់ឯកសារនោះទេ យើងបើប្រាស់វិធីហៅថា កំណត់នូវកាត់កងរបស់គាត់។ ឧទាហរណ៍ គាត់លក់បាន ១៥ម៉ឺន។ បើសិនជាគាត់មានឯកសារទិញតម្លៃទាបពេក ដែលនាំឱ្យចំណេញច្រើន គាត់បង់ពន្ធចំណេញលើមូលធនច្រើន គាត់អាចជ្រើសរើសលើវិធីកាត់កងតាមការកំណត់ គឺយើងឱ្យគាត់ចំណេញ ២០ភាគរយ ដូច្នេះ ២០ភាគរយនៃ ១៥ម៉ឺន គឺគណនាឃើញប៉ុន្មាន យើងយកគុណ២០ភាគរយ៕