ដោយៈ រ៉ាណេត
កែបៈ អភិបាលខេត្តកែប លោកសោម ពិសិដ្ឋ បានអះអាងថា រាល់គម្រោងវិនិយោគ និងអភិវឌ្ឍន៍ក្នុងគ្រប់វិស័យនៅទូទាំងខេត្ត ជាពិសេសការអភិវឌ្ឍក្នុងវិស័យហេដ្ឋារចនាសម្ព័ន្ធ និងអចលនទ្រព្យដែលគាំទ្រដោយរដ្ឋបាលខេត្ត សុទ្ធតែបានផ្តល់នូវផលប្រយោជន៍ និងចំណេញដល់៣ភាគី រួមមានរាជរដ្ឋាភិបាល អ្នកវិនិយោគ និងប្រជាពលរដ្ឋ។
លោកសោម ពិសិដ្ឋ អភិបាលខេត្តកែប បានមានប្រសាសន៍ប្រាប់ក្នុងកិច្ចសម្ភាសន៍ពិសេសមួយជាមួយក្រុមការងារ នៃគេហទំព័រ www.propertyarea.asia កាលពីល្ងាចទី១១ ខែតុលា ឆ្នាំ២០២០ថា បច្ចុប្បន្នមានក្រុមហ៊ុនជាតិ និងអន្តរជាតិជាច្រើន បាននិងកំពុងបណ្តាក់ទុនវិនិយោគនៅក្នុងខេត្ត ដែលភាគច្រើនស្ថិតជាគម្រោងគម្រោងអភិវឌ្ឍន៍ក្នុងវិស័យអចលនទ្រព្យ និងបម្រើដល់វិស័យទេសចរណ៍។
លោកបន្តថា “នៅក្នុងចំណោមក្រុមហ៊ុន ដែលចូលខ្លួនមកវិនិយោគ និងទទួលបានការគាំទ្រពីរាជរដ្ឋាភិបាលនៅក្នុងខេត្តកែប ភាគច្រើនជាគម្រោងអភិវឌ្ឍន៍ជាតំបន់ទេសចរណ៍ ដែលមានទីតាំងស្ថិតនៅតំបន់ជាប់មាត់ព្រែក ឬនៅក្បែរតំបន់ភ្នំដែលមានទេសភាពស្រស់ស្អាតបែបធម្មជាតិ” ។
លោកបានមានប្រសាសន៍បន្តទៀតថា ក្រៅពីតំបន់ដែលមានភាពអំណោយផលពីធម្មជាតិបម្រើដល់វិស័យទេសចរណ៍ ខេត្តកែបក៏មានតំបន់កោះចំនួន១២ ដែលមានសក្ដានុពលក្នុងការវិនិយោគផងដែរ ស្របពេលដែលមានក្រុមហ៊ុនជាច្រើន កំពុងធ្វើការសិក្សាលម្អិតមុនពេលបណ្តាក់ទុនវិនិយោគ។
ជាមួយនឹងការលើកឡើងពីសក្ដានុពលខាងលើនេះ លោកអភិបាលខេត្តក៏បានបញ្ជាក់ពីគោលការណ៍សំខាន់របស់រដ្ឋបាលខេត្ត ក្នុងការគាំទ្រទៅលើគម្រោងវិនិយោគផងដែរថា “រាល់គម្រោងវិនិយោគ ដែលត្រូវបានទទួលការគាំទ្រពីរាជរដ្ឋាភិបាល ក៏ដូចជារដ្ឋបាលខេត្ត គឺសុទ្ធតែធានាបាននូវផលប្រយោជន៍ថា អាចទទួលបានទាំង៣ភាគី រួមមាន ផលចំណេញដល់រាជរដ្ឋាភិបាល ផលចំណេញដល់អ្នកបណ្តាក់ទុនវិនិយោគ និងផលចំណេញដល់ប្រជាពលរដ្ឋក្នុងតំបន់ផងដែរ” ។
បច្ចុប្បន្ន ខេត្តកែប ត្រូវបានក្លាយជាគោលដៅទេសចរណ៍កម្រិតអន្តរជាតិ ដែលត្រូវបានយកចិត្តទិកដាក់ពីសំណាក់រាជរដ្ឋាភិបាល រួមជាមួយនឹងគម្រោងក្នុងការបង្កើតទៅជាទីក្រុងទេសចរណ៍ ដ៏មានសក្ដានុពលនៅក្នុងតំបន់ ជាពិសេសខេត្តកំពុងត្រៀមខ្លួនរៀបចំកម្មវិធីបុណ្យសមុទ្រនៅឆ្នាំ២០២២ខាងមុខនេះ៕
