ដោយវុត្ថា
ភ្នំពេញៈ តំបន់ចោមចៅនាពេលបច្ចុបប្បន្ននេះ ពុំមានដីអភិវឌ្ឍន៍គម្រោងធំៗទៀតនោះទេ ដោយសារកង្វះខាតដីអភិវឌ្ឍន៍ ខណៈបច្ចុប្បន្ននេះ មានគ្រោងជាច្រើនដូចជាគម្រោងលំនៅឋាន តំបន់ឧស្សាហកម្ម និងរោងចក្របានប្រមូលប្តុំនៅទីនោះយ៉ាងច្រើន។
លោកវ៉ា សាវឿន ចៅសង្កាត់ចោមចៅទី៣ ប្រាប់ឱ្យដឹងកាលពីពេលថ្មីៗនេះ ថា បច្ចុប្បន្ននេះនៅតំបន់ចោមចៅ មានការអភិវឌ្ឍន៍ និងមានគម្រោងជាច្រើនៅក្នុងតំបន់នេះ មានដូចជារោងចក្រ សហគ្រាស និងបណ្តុំគម្រោងលំនៅឋាន ដែលផ្តល់ឱកាសការងារ និងសេដ្ឋកិច្ចយ៉ាងច្រើនដល់ពលរដ្ឋនៅក្នុងតំបន់នេះ។
លោកបន្តថា “តំបន់នេះនាពេលបច្ចុប្បន្ន កំពុងតែមានការកង្វះខាតដីអភិវឌ្ឍន៍សម្រាប់គម្រោងធំៗ ហើយតម្លៃដីក៏មានតម្លៃខ្ពស់ផងដែរ ដោយមួយឡូតិ៍ដែលគេពុះហើយ (៤x២០ ) យ៉ាងហោចណាស់មានតម្លៃទាបបំផុត គឺជាង១ម៉ឺនដុល្លារអាមេរិកដែរ។លោកបន្តថា “បើទោះបីមានលុយ ក៏ប្រហែលជាមិនអាចរកទញដីក្នុងទំហំធំៗ បានដែរនៅក្នុងតំបន់នេះ ព្រោះបច្ចុប្បន្ននេះ មានគម្រោងអភិវឌ្ឍន៍លំនៅឋានជាច្រើនគម្រោង និងបណ្តុំរោងចក្រសហគ្រាសធំៗផងដែរ” ។
អគ្គនាយកក្រុមហ៊ុន Century 21 Advance លោកឡុង គឹមសួគ៌ ឱ្យដឹងដែរថា តំបន់ចោមចៅនាពេលបច្ចុប្បន្ននេះ បាននឹងកំពុងមានការរីកចំរើន ហើយតម្លៃអចលនទ្រព្យនៅក្នុងតំបន់ នឹងកាន់តែមានតម្លៃខ្ពស់បបន្ថែមទៀត ជាពិសេសដីធ្លី ព្រោះតំបន់នេះមានគម្រោងអភិវឌ្ឍន៍ច្រើន ។
លោកថ្លែងថា “តំបន់ចោមចៅនាពេលបច្ចុប្បន្ននេះ គេកំពុងសាងសង់ស្ពាន ហើយតំបន់នេះ បាននិងកំពុងមានការរីកចំរើន ដូចទៅនឹងបណ្តាខ័ណ្ឌ មយចំនួន នៅក្នុងទីក្រុងភ្នំពេញដែរ ហើយជាពិសេសតំបន់នេះ រាជរដ្ឋាភិបាលបាននឹងកំពុងមានការអភិវឌ្ឍន៍លើប្រព័ន្ធហេដ្ឋារនាសម្ព័ន្ធ” ។
លោកឡុង គឹមសួរ បានបន្ថែមថា នៅក្នុងរយៈពេលប្រហែល២ឆ្នាំទៀត នឹងមានការអភិវឌ្ឍន៍កាន់តែខ្លាំង ហើយតំបន់អចលនទ្រព្យវិញ ក៏មានតម្លៃខ្ពស់ផងដែរ។ លោកបញ្ជាក់ទៀតថា ចំពោះតម្លៃលំនៅឋានសមរម្យ (មួយជាន់) បច្ចុប្បន្ននៅក្នុងតំបន់នេះ ប្រហែល៥ម៉ឺនដុល្លារអាមេរិកឡើងលើ (ចន្លោះពី ៥ម៉ឺន ទៅ ១០ម៉ឺន) ហើយតម្លៃលំនៅឋានអាជីវកម្មមានតម្លៃប្រមាណ ១០ម៉ឺន ទៅ ១២ម៉ឺនដុល្លារអាមេរិក។
លោក ឃួង ស្រេង អភិបាលរាជធានីភ្នំពេញ ធ្លាប់បានឱ្យដឹងដែរថា តំបន់ភាគខាងលិចនៃទីក្រុងភ្នំពេញ កំពុងតែមានការរីកចំរើនលើគម្រោងអភិវឌ្ឍន៍ជាច្រើន ដូចជាលំនៅឋាន រោងចក្រ សហគ្រាស ដែលធ្វើឱ្យតំបន់នេះ មានបញ្ហាជន់លិចទឹកនារដូវវស្សាម្តង ប៉ុន្តែយ៉ាងណាក៏ដោយរដ្ឋបាលរាជធានីភ្នំពេញ ក៏មិនដែលប្រងើយកន្តើយលើបញ្ហានេះឡើយ៕
