ដោយៈ ម៉ាណេត
ភ្នំពេញៈ ក្រុមហ៊ុន Sailun Group កំពុងពិចារណាបង្កើតរោងចក្រផលិតសំបកកង់រថយន្តដឹកអ្នកដំណើរ ដែលមានតម្លៃជាង១៨០លានដុល្លារនៅកម្ពុជា។ នេះបើយោងតាមការចេញផ្សាយរបស់គេហទំព័រ Tyre Press នៅថ្ងៃទី៩ ខែមីនា ឆ្នាំ២០២១។
ក្រុមហ៊ុនSailun បានឱ្យដឹងថា យោងតាមការសិក្សាលទ្ធភាព ដែលបានចេញផ្សាយនៅថ្ងៃនេះ (ថ្ងៃទី៩ ខែមីនា ឆ្នាំ២០២១) ក្រុមហ៊ុនផលិតសំបកកង់ចិន មានចំណា ប់អារម្មណ៍ ចង់សាងសង់រោងចក្រមួយនៅក្នុងតំបន់សេដ្ឋកិច្ចពិសេស QiLu (ខេមបូឌា) ក្នុងខេត្តស្វាយរៀង ដែលមានសមត្ថភាពផលិតសំបកកង់រាប់ក្នុងមួយឆ្នាំ។
ក្រុមហ៊ុន Sailun ប៉ាន់ស្មានថា គម្រោងនេះ នឹងត្រូវការការវិនិយោគចំនួន១,១៨ពាន់លានយ័ន (១៣០.៥ លានផោន ឬជាង១៨០លានដុល្លារ) ។
អនុប្រធានសភាពាណិជ្ជកម្មកម្ពុជាលោកឧកញ៉ាលឹម ហេងបានមានប្រសាសន៍ប្រាប់គេហទំព័រ www.propertyarea.asia កាលពីថ្មីៗនេះ នៅពេលនេះកម្ពុជាប្រៀបបីដូចជាកូនក្រមុំ ដែលកំពុងមានភាពទាក់ទាញ និងការចាប់អារម្មណ៍ពីបណ្តាវិនិយោគិនអន្តរជាតិយ៉ាងច្រើន។
លោកបន្តថា “យើងមានចំណុចល្អ និងចំណុចពិសេសរបស់យើង។ ត្រឹមតែកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន គឺមានវិសាលភាពដ៏ធំសម្រាប់ជាការទាក់ទាញបណ្តាក្រុមហ៊ុនអន្តរជាតិនានាជាច្រើន ជាពិសេសក្រុមហ៊ុនអាមេរិកឱ្យចូលមកវិនិយោគនៅក្នុងប្រទេសកម្ពុជា សម្រាប់នាំផលិតផលរបស់ខ្លួន ចេញទៅកាន់ទីផ្សារប្រទេសចិនដោយការរួចពន្ធ និងមានឱកាសចំណេញច្រើន” ។
លោកឧកញ៉ាលឹម ហេង បានបន្តថា សង្គ្រាមពាណិជ្ជកម្មរវាងអាមេរិកជាមួយចិនបានក្លាយជាសំពាធ សម្រាប់ក្រុមហ៊ុនអាមេរិកមួចំនួន ដែលត្រូវធ្វើការនាំទំនិញ និងផលិ តផល ដែលផលិតបានទៅកាន់ទីផ្សារ ប្រទេសគោលដៅនៃប្រទេសចិន។ ដូច្នេះនៅពេលដែលកម្ពុជា ត្រូវបានអនុគ្រោះពន្ធចំពោះការនាំទំនិញចេញ ទៅទីផ្សារប្រទេសចិន បណ្តាក្រុមហ៊ុនដែលរងនូវសំពាធទាំងនោះ នឹងពិចារណាផ្លាស់ប្ដូរទីតាំងផលិតរបស់ខ្លួនចូលមកកម្ពុជាជាក់ជាមិនខាន។
ក្រៅពីនេះកម្ពុជា ក៏ត្រៀមនឹងចុះហត្ថលេខាលើកិច្ចព្រមព្រៀង ជាមួយបណ្តាប្រទេ សផ្សេងទៀតដូចជា កូរ៉េ ជប៉ុន អូស្ត្រាលី និងឥណ្ឌាជាដើម ដោយនៅមិនទាន់រាប់បញ្ជូលកិច្ចព្រមព្រៀងពាណិជ្ជកម្ម RCEP ដែលជាទីផ្សារដ៏ធំលើពិភពលោកនោះផងដែរ។
លោកឧកញ៉ាលឹម ហេងបានបញ្ជាក់ឱ្យដឹងទៀតថា បើទោះជាកម្ពុជាបានបាត់បង់នូវប្រព័ន្ធអនុគ្រោះពន្ធ២០ភាគរយពីទីផ្សារអឺរ៉ុប ប៉ុន្តែកម្ពុជាទទួលបានការអនុគ្រោះពន្ធ GSP ពីចក្រភពអង់គ្លេស ហើយតាមរយៈចក្រភពអង់គ្លេស ក៏នឹងនាំយកទំនិញរបស់កម្ពុជាបន្តចែកចាយទៅក្នុងទីផ្សារអឺរ៉ុបដូចគ្នា ដូច្នេះកម្ពុជានៅតែមិនទទួលរងនូវផលប៉ះពាល់នោះទេ។
លោកបញ្ជាក់ថា “ជាធម្មតានៅពេលដែលមានក្រុមហ៊ុនអន្តរជាតិ ចូលមកវិនិយោគកាន់តែច្រើន កម្ពុជាក៏ទទួលបានផលចំណូលច្រើនដូចគ្នា”។ លោកបន្តថា “យើងគិតត្រឹមតែជាប្រទេសផ្តល់សេវានៅពេលដែលគេចូលមកវិនិយោគ គេត្រូវការទីតាំង គេត្រូវការសេវាដឹកជញ្ជូន ក៏ដូចជាកម្លាំងពលកម្ម ដែលទាំងអស់នេះសុទ្ធតែជាការផ្តល់នូវផ្តល់ប្រយោជន៍ ហើយយើងក៏អាចកើនឡើងនូវចំណេះ ជំនាញបច្ចេកទេសថ្មីៗពីបណ្តាក្រុមហ៊ុនអន្តរជាតិទាំងនោះផងដែរ” ៕
