ដោយៈគង់ សូរិយា
ភ្នំពេញៈ រដ្ឋមន្រ្តីក្រសួងបរិស្ថានបានស្នើភាគីអូស្រ្តាលី ជួយបង្កើតមជ្ឈមណ្ឌលអ៊ីដ្រូសែន ដើម្បីទាញយកថាមពលអគ្គិសនីមកប្រើប្រាស់នាពេលខាងមុខ និងជាលើកដំបូងបើសិនជាគំរោងនេះទទួលបានជោគជ័យ។
ក្រសួងបរិស្ថានស្នើឱ្យអូស្ដ្រាលី បង្កើតមជ្ឈមណ្ឌលថាមពលឧស្ម័នអីដ្រូសែន នៅកម្ពុជារដ្ឋាភិបាលកម្ពុជា ត្រូវបានស្នើឡើងដោយលោកសាយ សំអាល់រដ្ឋមន្រ្តីក្រសួងបរិស្ថាន ក្នុងពេលលោកពិភាក្សាការងារជាមួយលោក Pablo Kang ឯកអគ្គរដ្ឋទូតអូស្រ្តាលីប្រចាំកម្ពុជា។
លោកសាយ សំអាល់បានស្នើឱ្យអូស្ដ្រាលីជួយបង្កើតមជ្ឈមណ្ឌល ចែករំលែកចំណេះដឹង ស្ដីពីថាមពលឧស្ម័នអីដ្រូសែននៅកម្ពុជា ទិសដៅចង់ជំរុញការផលិតអគ្គីសនីស្អាត ដើម្បីចូលរួម ដោះស្រាយបញ្ហាបម្រែបម្រួលអាកាសធាតុ។
ក្នុងកិច្ចប្រជុំភាគីអូស្រ្តាលីកាលពីដើមសប្តាហ៍នេះ បានជំរុញឱ្យកម្ពុជា ចូលរួមដោះបញ្ហាបម្រែបម្រួលអាកាសធាតុ ដោយស្នើថា ការងាកមកប្រើថាមពលផលិតចេញពីឧស្ម័នអីដ្រូសែន គួរតែជាជម្រើសមួយ ព្រោះវាជាថាមពលបៃតងមិនប៉ះពាល់ដល់បរិស្ថាន។
រដ្ឋមន្ត្រីក្រសួងបរិស្ថាន បានសម្តែងនូវការស្វាគមន៍ ចំពោះការលើកឡើងរបស់ភាគីអូស្រ្តាលី ហើយលើកជាសំណើ២ ដែលសំណើទី១ គឺឱ្យអូស្ដ្រាលីជួយបង្កើតមជ្ឈមណ្ឌលចែករំលែកពត៌មាន អំពីថាមពលឧស្ម័នអ៊ីដ្រូសែន ដោយមានការចូលរួមពីក្រសួងបរិស្ថាន គ្រឹះស្ថានសិក្សាស្រាវជ្រាវរបស់ប្រទេសកម្ពុជា និងប្រទេសអូស្រ្តាលី។
ចំណែកសំណើទី២ គឺការជួយបង្កើតឱ្យមានផែនទីបង្ហាញផ្លូវ ក្នុងការពង្រឹងកិច្ចសហប្រតិបត្តិការអភិវឌ្ឍន៍សេដ្ឋកិច្ចរវាងកម្ពុជា និងអូស្រ្តាលី៕
