ដោយៈវឌ្ឍនៈ
ភ្នំពេញៈ ក្រុមហ៊ុន Naga Corp ដែលវិនិយោគលើកាស៊ីណូធំជាងគេនៅរាជធានីភ្នំពេញបានបង្ហាញរបាយការណ៍របស់ខ្លួនថា ខ្លួនខាតបង់ទឹកប្រាក់រហូតដល់៧៧លានដុល្លារអាមេរិកក្នុងឆមាសទី១ឆ្នាំនេះ ប៉ុន្តែក្រុមហ៊ុននេះ នៅតែមានសុទិដ្ឋិនិយមចំពោះមុខ។
ជាមួយនឹងគំរោងអភិវឌ្ឍន៍ Naga3 ដ៏ធំ ក្រុមហ៊ុននេះបានបង្ហាញផលបូករបស់ខ្លួនថា បើរួមបញ្ចូល Naga ទាំង ៣ ក្រុមហ៊ុនកាស៊ីណូដ៏ធំមួយនេះ ដែលទទួលសិទ្ធិផ្តាច់មុខនៅរាជធានីភ្នំពេញ នឹងមានសណ្ឋាគារសរុប៥ពាន់បន្ទប់ តុល្បែង១ ៣០០ និងម៉ាស៊ីនល្បែងអេឡិចត្រូនិក ដល់ទៅ៤៥០០គ្រឿងផងដែរ។
ប្រតិបត្តិករកាស៊ីណូអាស៊ី និងអ្នកអភិវឌ្ឍអចលទ្រព្យដ៏ធំមួយ ដែលមានឈ្មោះថា Nagacorp បាននិយាយថា ក្រុមហ៊ុនគ្រោងនឹងចាប់ផ្តើមការងារសាងសង់តួអាគារ (superstructure) សម្រាប់គម្រោងណាហ្គាទី៣ (Naga III) ដោយបន្ថែមទៅលើរីស៊តកាណូស៊ី Nagaworld នៅរាជធានីភ្នំពេញ នៅឆមាសទីមួយ ឆ្នាំ ២០២៣ បើទោះបីជាការផ្គត់ផ្គង់សម្ភារៈ សំណង់ត្រូវបានរំខានដោយវិបត្តិ Covid 19 ក៏ដោយ។ នេះបើយោងតាមរបាយការណ៍បណ្តោះអាសន្ន ចេញផ្សាយនៅឆ្នាំ ២០២១ ដែលបានដាក់ទៅកាន់ទីផ្សារភាគហ៊ុនហុងកុងកាលពីពេលថ្មីៗនេះ។
លោក Tim McNally ប្រធានសាជីវកម្ម Naga Corp នៅលើព័ត៌មានឧស្សាហកម្មកាស៊ីណូ បានចង្អុលបង្ហាញអោយដឹងថា ប្រតិបត្តិករកាស៊ីណូបានបើកឡើងវិញ នៅថ្ងៃទី ១៥ ខែកញ្ញា បន្ទាប់ពីបិទចាប់តាំងខែមីនា ឆ្នាំ ២០២១កន្លងទៅនេះ។
បើយោងតាមរបាយការណ៍ហិរញ្ញវត្ថុ បានខាតបង់៧៧លានដុល្លារនៅឆមាសទី ១ ឆ្នាំ ២០២១ ខណៈឆ្នាំ២០២០ក្រុមហ៊ុននេះបានខាតបង់ទឹកប្រាក់តែជាង២០,៦លានដុល្លារប៉ុណ្ណោះ។
លោកប្រធានបានលើកឡើងថា ការបើកកាស៊ីណូ Naga wolrd គឺស្របទៅតាមផែនការរបស់រដ្ឋាភិបាល ក្នុងការបើកសេដ្ឋកិច្ចជាដំណាក់កាល។
បើតាមរបាយការណ៍បណ្តោះអាសន្នបានលើកឡើងថា នៅពេលដែលប្រទេសកម្ពុជា បើកទទួលភ្ញៀវទេសចរបរទេសឡើងវិញ សំណង់អាគារណាហ្គាទីបី នឹងបំពេញនូវយុទ្ធសាស្រ្តយូរអង្វែង ក្នុងទទួលយកភ្ញៀវខាងជំនួញជនជាតិចិន ដែលធ្វើអោយការស្នាក់នៅរយៈពេលយូរផងដែរ៕
