ដោយ កុសមា
ភ្នំពេញ៖ វិបត្តិកូវីត១៩ បានអូសបន្លាយរយៈពេល២ឆ្នាំ ដោយក្នុងរយៈពេលមួយឆ្នាំចុងក្រោយនេះ មានការរីករាលខ្លាំង ដោយករណីអ្នកឆ្លងនិងស្លាប់កើនឡើងជាបន្តបន្ទាប់ តែស្ថានភាពហាក់មានភាពប្រសើរឡើងវិញដោយសារ ចំនួននៃអ្នកចាក់វ៉ាក់សាំងបានច្រើនរហូតដល់ ៩៩,៥៤% នៃប្រជាជនកម្ពុជាដែលមានអាយុ១៨ ឆ្នាំឡើងទៅ។ នេះបើតាមឯកសារមន្ត្រីសាធារណៈ ចុះថ្ងៃទី១៨ ខែតុលា កន្លងមក។
លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុនៅកម្ពុជា បានឱ្យដឹងថា “ក្នុងរយៈ ពេលមួយខែចុងក្រោយ ការទិញលក់ដូរអចលនវត្ថុនៅតែបន្តកើតមានធម្មតា គ្រាន់តែចំនួនមានការថមថយចុះខ្លះ ដោយសារ មានការរាំងស្ទះដោយបញ្ហាវិបត្តិកូវីដ១៩ តែពេលនេះចរន្តនៃការទិញលក់នៅតែបន្ត”។
លោកបន្តថា សម្រាប់អ្នកវិនិយោគិនបរទេសមានការថមថយ ដោយសារក្តីបារម្ភពីបញ្ហាសុខភាពនិងសុវត្ថិភាព ដែលជះឥទ្ធិពលមកលើខ្លួនគាត់។ ប៉ុន្តែអ្នកវិនិយោគិនមួយចំនួននៅមានសហសេវិក និងក្រុមហ៊ុនដៃគូរបស់ខ្លួនក្នុងប្រទេស សម្រាប់យកពត៍មាននិងធ្វើការស្រាវជ្រាវឱកាសក្នុងការវិនិយោគលើវិស័យអចលនទ្រព្យនៅកម្ពុជា។
លោកបានមានប្រសាសន៍ថា “សម្រាប់តម្លៃអចលនទ្រព្យមិនមានការថយចុះទេ តែចំនួននៃការទិញលក់មានការថយចុះធៀបទៅនឹងឆ្នាំមុនៗ មុនវិបត្តិកូវីដ១៩បានកើតឡើង ដែលបង្ហាញជារួមថាប្រទេសកម្ពុជានៅតែមានភាពរឹងមាំក្នុងវិស័យអចលនទ្រព្យ និងខឿនសេដ្ធកិច្ចជាតិ។”
លោកបានបញ្ជាក់ថា ភាពប្រសើរឡើងគឺស្ថិតនៅលើការរង់ចាំមើលនៅឡើយ។ ការបើកចរាចរចេញចូលឡើងវិញ ដែលតម្រូវឱ្យធ្វើចត្តាឡីស័ក រយៈពេល៣ថ្ងៃ សម្រាប់អ្នកដែលមានប៉ាស្ព័រនិងអ្នកចាក់វ៉ាក់សាំង និងរយៈពេលមួយអាទិត្យ សម្រាប់មនុស្សទូទៅ។ អ្នកមិនចាក់វ៉ាក់សាំង ដែលមានហានិភ័យ អាចធ្វើចត្តាឡីស័ករយៈពេលយូរ ដែលជាហេតុបន្ថយឱកាសនៃការវិនិយោគរបស់ភ្ញៀវបរទេស ដែលចង់ប្រកបមុខរបរទទួលទាន ក្នុងប្រទេសកម្ពុជាផងដែរ។
ក្រៅពីនោះ យើងឃើញមានយន្តការនៃការរៀបចំសាកល្បងក្នុងការដាក់ឱ្យដំណើរការបើកទេសចរណ៍វិញ ហើយបើការបើកទេសចរក្នុងស្រុក មានការគ្របគ្រងបាន និងឈានដល់ដំណើរការនៃការបើកលក្ខណៈ Trading ឬបើកលក្ខណៈទេសចរអន្តរជាតិ នោះនឹងបង្កអោយមានភាពប្រសើរឡើងវិញក្នុងពេលឆាប់ៗ។
លោកបានប្រមើលមើលថា វិស័យអចលនទ្រព្យក្នុងឆ្នាំ២០២២ ខាងមុខនេះ ដោយសារចំនួននៃអ្នកចាក់វ៉ាក់សាំង នៅអាស៊ានមានច្រើនហើយ ឯនៅកម្ពុជាមានដល់ជាង៩៧ % ដូចនេះបញ្ហាប្រឈមវិបត្តិកូវីដ១៩ នឹងស្ថិតក្នុងការគ្រប់គ្រងបាននាពេលអនាគត ហើយវិស័យអចលនទ្រព្យកម្ពុជាវិលមកសភាពធម្មតាវិញ។
លោកបន្តទៀតថា វិស័យអចលនទ្រព្យក៏មានបញ្ហាប្រឈមរបស់ខ្លួន តាមរយៈការខ្វះខាតធនធាន កម្ចីពីធនាគារនិងស្ថាប័នផ្សេងៗទៀត បើវិស័យនេះទទួលបានប្រាក់កម្ចីខ្ពស់ នោះចរន្តនៃការទិញលក់ក៏ទទួលបានច្រើនផងដែរ៕
