ដោយៈ គង់ សូរិយា
ភ្នំពេញៈ ការងើបឡើងវិញនៃសេដ្ឋកិច្ច លំហូរនៃទុនវិនិយោគពីក្រៅប្រទេសបណ្តើរៗ កំពុងស្រោចស្រង់ទីផ្សារអចលនទ្រព្យ បែបពាណិជ្ជកម្មបណ្តើរៗហើយ។
ទីផ្សារអចលនទ្រព្យបែបពាណិជ្ជកម្មចាប់ផ្តើមងើបឡើងវិញហើយ ខណៈឥរិយាបទ
លោក Ken Lo អគ្គនាយកក្រុមហ៊ុន Coldwell Banker Cambodia បានមានប្រសាសន៍ឲ្យដឹងតាមបណ្តាញតេឡេក្រាម នារសៀលថ្ងៃទី២៤ វិច្ឆិកាកន្លងមកថា ក្នុងរយៈពេលពីរខែចុងក្រោយនេះ មានការងើបឡើងវិញបណ្តើរ ដែលភាគច្រើនជាទីផ្សាររបស់ក្រុមហ៊ុនក្នុងស្រុក ដែលពួកគេបានផ្លាស់ប្តូរនិន្នាការ ពីការប្រើប្រាស់ផ្ទះល្វែងធ្វើជាការិយាល័យ មកប្រើប្រាស់អគារការិយាល័យជំនួសវិញ។
លោកបន្តថា “ជាមួយនឹងការផ្លាស់ប្តូរឥរិយាបទនេះ ថ្នាក់ដឹកនាំក្រុមហ៊ុនមួយចំនួនក៏បានផ្លាស់ប្តូរ ពីការប្រើប្រាស់ការិយាល័យ Grand C មកកាន់ការិយាល័យប្រភេទ Grand B ជំនួសវិញ”។ លោកបន្តថា “អតិថិជនរបស់យើង៨០ភាគរយ ជាអ្នកវិនិយោគក្នុងស្រុក ប៉ុន្តែយើងរំពឹងថា ទីផ្សារបរទេសនឹងកើនឡើងចាប់ពីឆ្នាំ២០២២ខាងមុខនេះ”។
លោក Ken Lo បានបន្តថា ការជួលអគារការិយាល័យធ្វើការ ជាការបង្កភាពងាយស្រួល មានភាពស៊ីវិល័យ ស្តង់ដា មានក្រិតក្រមខ្ពស់ និងមានលក្ខណៈវិជ្ជាជីវៈ ពិសេសពួកគេអាចបង្កើត ឬចងបណ្តាញបែបសហគមន៍ជំនួញមួយ នៅអគារការិយាល័យធ្វើការរបស់ពួកគេ ព្រោះអគារការិយាល័យជួលនិមួយៗ មានក្រុមហ៊ុនច្រើនបានជួលសម្រាប់ធ្វើការងាររបស់ពួកគេ៕
