ដោយ គង់ សូរិយា
ភ្នំពេញ៖ ក្រសួងទេសចរណ៍តាមរយៈមន្ទីរទេសចរណ៍ខេត្តសៀមរាប សហការជាមួយសមាគមទីភ្នាក់ងារទេសចរណ៍កម្ពុជា (CATA) នឹងរៀបចំកញ្ចប់ទស្សនកិច្ចថ្មីមួយ ដោយរៀបចំដំណើរទេសចរណ៍បែបផ្សងព្រេងនៅក្នុងព្រៃ និងសហគមន៍ជុំវិញរមណីយដ្ឋានអង្គរ។
លោក ស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៤ តុលាកន្លងមកថា ក្នុងគោលដៅទាក់ទាញនិងធ្វើយ៉ាងណាឲ្យភ្ញៀវទេសចរណ៍ស្នាក់នៅយូរនៅកម្ពុជា សមាគមសហការជាមួយមន្ទីរទេសចរណ៍ខេត្ត និងស្ថាប័នពាក់ព័ន្ឋនឹងរៀបចំកម្មវិធីផ្សព្វផ្សាយ ពីកញ្ចប់ទេសចរណ៍ថ្មីនេះ។លោកស្រីបន្តថា យើងនឹងផ្សព្វផ្សាយកម្មវិធីនេះនៅថ្ងៃទី២ វិច្ចិកាខាងមុខនេះ នៅរមណីយដ្ឋានអង្គរ។
-->
លោកស្រីបន្តថា “យើងបាននិងកំពុងព្យាយាមធ្វើយ៉ាងណា ឲ្យភ្ញៀវស្នាក់នៅយូរ ហេតុនេះទើបរៀបចំកម្មវិធីនេះឡើង ព្រោះនៅតំបន់អង្គរមានព្រៃឈើធំៗ មានទំហំធំនិងទាក់ទាញ។លោកស្រីបន្តថា “ជាមធ្យមភ្ញៀវទេសចរណ៍អន្តរជាតិស្នាក់នៅរយៈពេលបីថ្ងៃនៅកម្ពុជា ជារយៈពេលខ្លីមួយ ដែលយើងនិងកំពុងធ្វើយ៉ាងណាឲ្យពួកគេស្នាក់នៅបានយូរនៅកម្ពុជា។
ប្រធានមន្ទីរទេសចរណ៍ ខេត្តសៀមរាប លោកង៉ូវ សេងកាក់បានមានប្រសាសន៍ឲ្យ ដឹងផងដែរថា គំរោងនេះយើងដាក់ឈ្មោះថា ទេសចរណ៍ក្រៅពីប្រាសាទ (Siem Reap Beyond of the temple) ដែលជាផលិតផលថ្មីសម្រាប់វិស័យទេសចរណ៍។ ការរៀបចំកម្មវិធីនេះ ធ្វើឡើងក្នុងគោលដៅពន្យាការស្នាក់នៅរបស់ភ្ញៀវទេសចរណ៍ ឲ្យស្នាក់នៅក្នុងខេត្តសៀមរាប ក៏ដូចជា នៅកម្ពុជាឲ្យបានកាន់តែយូរ។លោកបន្តថា មន្ទីរបានសហការជាមួយសមាគមទីភ្នាក់ងារទេសចរណ៍កម្ពុជា និងសមាគមសណ្ឋាគារនៅខេត្តសៀមរាបដើម្បីធ្វើការងារនេះ។
លោកបន្តថា “យើងបានសាកល្បងហើយនូវគំរោងនេះ ស្របពេលយើងមានសហគមន៍ទេសចរណ៍ចំនួន២២ ប៉ុន្តែមានសហគមន៍ចំនួន១២ប៉ុណ្ណោះ ដែលយើងបានរៀបចំរួច។លោកបន្តថា “អ្វីសំខាន់គឺយើងចង់ផ្តល់ចំណូលដល់សហគមន៍ និងរៀបចំបែបណាដើម្បីយើងតភ្ជាប់ការធ្វើដំណើរទៅសហគមន៍បានប្រសើរ ហើយយើងអាចជួយសហគមន៍ដូចម្តេច ដើម្បីឲ្យពួកគេទទួលបានផលប្រយោជន៍ពីវិស័យនេះ។
ខេត្តសៀមរាបមានស្រុកចំនួន១២ និងក្រុងចំនួន១ ប៉ុន្តែប្រជាជនរស់នៅក្នុងខេត្តនេះមានភាពក្រីក្រជាងគេធៀបជាមួយបណ្តារាជធានី ខេត្តនានាទូទាំងប្រទេស៕
