ដោយ វុត្ថា
ភ្នំពេញ៖ ពិរពណ៍ការងារ និងផលិតភាពជាតិឆ្នាំ២០១៨” ដែលនាំមកនូវឱកាសការងារគ្រប់ប្រភេទប្រមាណ២ម៉ឺនមុខតំណែង ដែលផ្តល់ដោយក្រុមហ៊ុន/សហគ្រាសធំៗ ១៥៦ ក្នុងបញ្ជរសរុបចំនួន៣០០ រយៈពេលពីរថ្ងៃគឺថ្ងៃសៅរ៍-អាទិត្យ ទី២៧ និង២៨ ខែតុលា ឆ្នាំ២០១៨ នៅអគារពិព័រណ៍កោះពេជ្រចាប់ពីម៉ោង៨ព្រឹក ដល់៨យប់បានចាប់ផ្តើមនៅព្រឹកថ្ងៃទី២៧ តុលានេះហើយ។
ព្រឹត្តិការណ៍នេះរៀបចំដោយក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរនៅកម្ពុជា (GMAC)។
-->
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណកម្មាធិការជាតិបណ្តុះបណ្តាល លោកអ៊ិត សំហេងបានមានប្រសាសន៍ក្នុងពិធីបើកពិព៌ណនេះថា ការរៀបចំពិព័រណ៍ការងារ និងផលិតភាពជាតិក្នុងឆ្នាំ២០១៨នេះ គឺស្របពេលជាមួយនឹងការចាប់ផ្តើមអាណត្តិថ្មី នៃរាជរដ្ឋាភិបាល ដែលកើតចេញពីការបោះឆ្នោតជ្រើសតាំងតំណាងរាស្ត្រនីតិកាលទី៦ ដោយសេរី យុត្តិធម៌ និងអាចជឿទុកចិត្តបានដោយមានប្រជាពលរដ្ឋដែលបានចុះឈ្មោះបោះឆ្នោត៨៣.២ភាគរយ បានទៅបោះឆ្នោត កាលពីថ្ងៃទី២៨ ខែកក្កដា ឆ្នាំ២០១។ រដ្ឋាភិបាលទើបបានដាក់ចេញនូវយុទ្ធសាស្ត្រ ចតុកោណដំណាក់កាលទី៤ ដោយបន្តផ្តោតអាទិភាពខ្ពស់លើការធានាកំណើនសេដ្ឋកិច្ចខ្ពស់ ការបង្កើតឱកាសការងារសម្រាប់យុវជន ការបែងចែកផលនៃកំណើនដល់គ្រប់ស្រទាប់ប្រជាជន និងការពង្រឹងប្រសិទ្ធភាព ក្នុងគោលដៅបម្រើឱ្យបេសកកម្មជាប្រវត្តិសាស្ត្រ នៃការដឹកនាំប្រទេសកម្ពុជា ឈានទៅសម្រេចបានឋានៈជាប្រទេសចំណូលមធ្យម កម្រិតខ្ពស់នៅឆ្នាំ២០៣០។
ពិព័រណ៍នេះ ក៏នឹងរៀបចំផងដែរនូវសិក្ខាសាលារយៈពេលពីរថ្ងៃស្តីពី ផលិតភាពដើម្បីចូលរួមលើកកម្ពស់ការយល់ដឹងពីផលិតភាព ការបង្ហាញអំពីវិធីសាស្ត្របំពេញការងារ គំនិតច្នៃប្រឌិតថ្មី ជំនាញនិងឧបករណ៍បច្ចេកវិទ្យាស្រប តាមការវិវត្តនៃបច្ចេកវិទ្យាក្នុងយុគសម័យឧស្សាហកម្មទី៤ ដែលពឹងផ្អែកជាចម្បងលើប្រព័ន្ធឌីជីថល ដោយមានការចូលរួមពីសំណាក់វាគ្មិនជាតិអន្តរជាតិល្បី។ លើសពីនេះ អ្នកចូលរួមទាំងអស់នឹងទទួលបាននូវឱកាសដ៏កម្រ ក្នុងការបង្កើតបណ្តាញទំនាក់ទំនង ជាមួយអ្នកជំនាញធនធានមនុស្ស, អ្នកផ្តល់ការអប់រំបណ្តុះបណ្តាល និងធុរជនសំខាន់។
លោកអ៊ិត សំហេងបានបន្តថា ពីមួយឆ្នាំទៅមួយឆ្នាំ ពិព័រណ៍នេះទទួលបានការគាំទ្រយ៉ាងពេញទំហឹង និងចូលរួមតាំងបង្ហាញពីសំណាក់ក្រុមហ៊ុន-សហគ្រាស រហូតបានក្លាយជាមហាព្រឹត្តិការណ៍ការងារ ដែលធំជាងគេប្រចាំឆ្នាំ និងបានទាក់ទាញយុវជន និងអ្នកស្វែងរកការងារយ៉ាងច្រើនកុះករ ចូលរួមដាក់ពាក្យស្វែងរកការងារ និងស្វែងយល់អំពីទីផ្សារការងារកម្ពុជានាពេលបច្ចុប្បន្ន។
ជាក់ស្តែងសម្រាប់ឆ្នាំ២០១៨នេះ ក្រុមហ៊ុន-សហគ្រាសធំៗចំនួន១៥៦នៅក្នុងវិស័យសំខាន់ៗដូចជា៖ ធនាគារនិងគ្រឹះស្ថានមីក្រូហិរញ្ញវត្ថុ, សំណង់, សណ្ឋាគារនិងបដិសណ្ឋារកិច្ច, ទូរគមនាគមន៍, ការអប់រំនិងបណ្តុះបណ្តាលបច្ចេក-ទេសវិជ្ជាជីវៈ, កម្មន្តសាល និងភ្នាក់ងារជ្រើសរើសឯកជនបានចូលរួមយ៉ាងសកម្ម។ យុវជនសិស្ស-និស្សិត និងអ្នកស្វែងរកការងារទាំងអស់ មានឱកាសទទួលបានការងារធ្វើភ្លាម, ការប្រឹក្សាយោបល់អំពីអាជីព, វិធីសាស្ត្រជោគជ័យក្នុងការដាក់ពាក្យស្វែងរកការងារ, ការត្រៀមលក្ខណៈចូលទីផ្សារការងារ និងវេទិកាចែករំលែកចំណេះដឹង និងបទពិសោធន៍ដោយវាគ្មិនល្បីៗដែលទទួលបានជោគជ័យក្នុងអាជីព និងទីផ្សារការងារ។
ពិព័រណ៍ដ៏ធំនេះ ត្រូវបានរំពឹងថាមានអ្នកចូលរួមទស្សនា ប្រមាណ៣ម៉ឺននាក់ដែលភាគច្រើនជាសិស្ស-និស្សិត យុវជន អ្នកស្វែងរកការងារ និងកម្មករនិយោជិតពីគ្រប់វិស័យ។ដូច្នេះដើម្បីទទួលបានឱកាសការងារ និងការយល់ដឹងអំពីការបង្កើនផលិតភាពសូមយុវជន សិស្ស-និស្សិតអ្នកស្វែងរកការងារធ្វើ និងកម្មករនិយោជិតទាំងអស់ចូលរួមទស្សនា និងកុំភ្លេចយកប្រវត្តិរូបសង្ខេប (CV) មកជាមួយ ដើម្បីដាក់ពាក្យស្នើសុំការងារដោយផ្ទាល់ជាមួយនិយោជកដែលកំពុងត្រូវការជ្រើសរើសកម្លាំងពលកម្ម៕
