ដោយៈគង់ សូរិយា
សឹង្ហបុរីៈ ក្រុមហ៊ុន Singapore Airlines បានបញ្ចប់ជាស្ថាពរនូវការពង្រីកបន្ថែមបន្ទប់រង់ចាំពិសេស (Lounge) ដែលបានបោះទុនរហូតដល់ ៥០លានដុល្លារ។
បន្ទប់រង់ចាំពិសេសនេះ ស្ថិតក្នុងអាកាសយានដ្ឋាន Changi ដែលនេះជាការបោះជំហាន ឆ្ពោះទៅកាន់ការដំណើរការឡើងវិញ នៃការធ្វើដំណើរតាមផ្លូវអាកាស។
យោងតាមសារព័ត៌មាន The Straits Times ចុះផ្សាយកាលពីពេលថ្មីៗនេះបានឲ្យដឹងថា ក្រុមហ៊ុនអាកាសចរណ៍ Singapore Airlines និយាយថា ក្រុមហ៊ុនបានបើកដំណើរការឡើងវិញ បន្ទប់រងចាំពិសេសចំនួនពីរកន្លែងនៅអាកាសយានដ្ឋាន Changi កាលពីថ្ងៃទី៣១ ខែឧសភា។ គម្រោងនេះ មានតម្លៃ៥០លានដុល្លារ ដែលបានបើកការដ្ឋានសាងសង់កាលពីឆ្នាំ២០១៩។
ទំហំបន្ទប់រងចាំពិសេសនេះ មានផ្ទៃក្រឡាសរុប 6,100 ម៉ែត្រការ៉េ ដែលតូចជាងទំហំទីលានបាល់ទាត់តែបន្តិចប៉ុណ្ណោះ។
តំណាងក្រុមហ៊ុន Singapore Airlines បានលើកឡើងកាលពីថ្ងៃទី៣០ ខែឧសភា ថាបន្ទប់រងចាំពិសេស SilverKris និង KrisFlyer Gold ត្រូវបានកែលម្អជាថ្មីយ៉ាងល្អប្រណិត នៅស្ថានីយ៍អ្នកដំណើរទីបី របស់អាកាសយានដ្ឋាន Changi ដែលនេះគឺជាការផ្តល់នូវបទពិសោធន៍ដ៏ល្អ និងការចងចាំដ៏អស្ចារ្យបំផុត សម្រាប់អ្នកដំណើរតាមយន្តហោះ។
ប្រធានក្រុមហ៊ុនអាកាសចរណ៍លោក Peter Seah បានមានប្រសាសន៍ឲ្យដឹងថា ការកែលម្អជាថ្មីនេះ នឹងជួយក្រុមហ៊ុនSingapore Airlines ឱ្យបន្តបង្កើតភាពជាអ្នកដឹកនាំរបស់ខ្លួន នៅក្នុងឧស្សាហកម្មអាកាសចរណ៍ឱ្យរិតតែប្រសើរជាងមុនថែមទៀតផង។
លោកPeter Seah បន្តទៀតថា “យើងសង្ឃឹមថា ការបើកកន្លែងទទួលភ្ញៀវថ្មីនេះ នឹងជួយពង្រឹងជំហរក្រុមហ៊ុនអាកាសចរណ៍ ឱ្យរិតតែមានភាពទាក់ទាញ សម្រាប់អាកាសយានដ្ឋាន Changi ហើយយើងក៏នឹងផ្តល់នូវសេវាកម្មលំដាប់ពិភពលោ កដល់អ្នកដំណើរ ទាំងអស់ដែលបានហោះហើរឆ្លងកាត់ប្រទេសសិង្ហបុរី”៕
