ដោយៈ សុខុម
បាងកក: គណៈរដ្ឋមន្ត្រីថៃ កាលពីថ្ងៃអង្គារ ទី៥ ខែកក្កដា បានផ្អាកយកពន្ធ លើសណ្ឋាគាររយៈពេល២ឆ្នាំបន្ថែមទៀត រហូតដល់ថ្ងៃទី៣០ ខែមិថុនា ឆ្នាំ២០២៤ ដើម្បីសម្រាលផលប៉ះពាល់នៃវិបត្តិកូវីដ-១៩ លើក្រុមហ៊ុនប្រតិបត្តិករសណ្ឋាគារ។
នាយករដ្ឋមន្ត្រីថៃ លោក ប្រាយុទ្ធ ចាន់អូចាលើកឡើងថា “ការលើកលែងពន្ធសណ្ឋាគាររយៈពេល២ឆ្នាំទៀត នឹងជួយបណ្ដាក្រុមហ៊ុនប្រតិបត្តិករសណ្ឋាគារ និងក្រុមហ៊ុនប្រតិបត្តិករ ទាក់ទិនវិស័យទេសចរណ៍ ស្តារនីតិសម្បទាឡើងវិញ នៅពេលបើកប្រទេសឡើងវិញ ស្វាគមន៍ភ្ញៀវទេសចរបរទេស”។លោកបន្ថែមថា “ទន្ទឹមនេះវានឹងផ្តល់អត្ថប្រយោជន៍ ដល់សេដ្ឋកិច្ចរបស់ប្រទេសថៃ ក្នុងរយៈពេលវែង ព្រោះវិស័យទេសចរណ៍ គឺជាក្បាលម៉ាស៊ីនដ៏សំខាន់ សម្រាប់បង្កើតប្រាក់ចំណូលរបស់ប្រទេសថៃ”។
លោកបានបន្តថា រដ្ឋាភិបាលនឹងចេញបទប្បញ្ញត្តិថ្នាក់ក្រសួង ដើម្បីពង្រីកការលើកលែងពន្ធ សណ្ឋាគារប្រចាំឆ្នាំ បន្ទាប់ពីបទប្បញ្ញត្តិមុនបានផុតកំណត់កាលពីថ្ងៃទី៣០ ខែមិថុនា។
នាយករដ្ឋមន្ត្រីរូបនេះលើកឡើងថា សេដ្ឋកិច្ចថៃ នឹងត្រូវការពេលវេលាដើម្បីងើបឡើងវិញ ទោះបីជារដ្ឋាភិបាលបានបន្ធូរបន្ថយ ការរឹតបន្តឹងលើដំណើរការអាជីវកម្មយ៉ាងណាក្ដី។ លោកបន្ថែមថា ការលើកលែងពន្ធនេះនឹងកាត់បន្ថយការចំណាយ របស់បណ្ដាក្រុមហ៊ុនប្រតិបត្តិករសណ្ឋាគារប្រមាណ៤៧,៣៥លានបាត (១,៣២លានដុល្លារអាមេរិក)៕ Bangkok Post៕
