ដោយៈ ជេស៊ីកា
ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានបង្ហើបឲ្យដឹងថា ក្រសួងបាននិងកំពុងសហការគ្នាជាមួយក្រុមហ៊ុនYCH លើការសិក្សាអភិវឌ្ឍន៍ផ្លូវនាវាចរណ៍ ដែលភ្ជាប់ពីទន្លេបាសាក់ ទៅកាន់សមុទ្រក្នុងខេត្តកែប។
ព៌តមាននេះ ត្រូវបានបង្ហើបឲ្យដឹងដោយលោក ទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនកាលពីថ្ងៃទី២១ កក្កដាកន្លងមកនេះ។
ទោះជាយ៉ាងណាការសិក្សាមិនទាន់បានបញ្ចប់នៅឡើយ ហើ់យការសាងសង់នាពេលណា មិនទាន់មានភាពប្រាកដប្រជាផងដែរ។
លោកឧកញ៉ាស៊ិន ចន្ធី ប្រធានសមាគមភស្ដុភារកម្មកម្ពុជាបានបង្ហាញការគាំទ្រយ៉ាងខ្លាំង ចំពោះគម្រោងតភ្ជាប់ផ្លូវទឹកពីទន្លេបាសាក់ ទៅសមុទ្រកែប របស់រាជរដ្ឋាភិបាលកម្ពុជា ដោយលោកបានអះអាងថា ការដឹកជញ្ជូនទំនិញតាមផ្លូវទឹក មានភាពងាយស្រួល និងចំណាយតិចជាការដឹកជញ្ជូនតាមផ្លូវគោក និងផ្លូវអាកាស។
អ្នកជំនាញក្នុងវិស័យដឹកជញ្ជូនរូបនេះ បច្ចុប្បន្ន នៅកម្ពុជាមធ្យោបាយដឹកជញ្ជូនតាមផ្លូវទឹក ហាក់នៅមានកម្រិតនៅឡើយ។ ដូច្នេះគម្រោងនេះនឹងចូលរួមចំណែកយ៉ាងសំខាន់ ក្នុងវិស័យដឹកជញ្ជូន ពិសេសចូលរួម ធ្វើឱ្យប្រសើរឡើងនូវកំណើនសេដ្ឋកិច្ចជាតិផងដែរ៕
