ដោយៈ ជេស៊ីកា
ភ្នំពេញៈ មន្រ្តីជាន់ខ្ពស់នៃផ្សារហ៊ុនកម្ពុជាបានលើកឡើងថា ការវិនិយោគលើផ្សារហ៊ុនរយៈពេលវែង មានផលចំណេញប្រហាក់ប្រហែលគ្នានឹងការវិនិយោគលើវិស័យអចលនទ្រព្យផងដែរ។
មន្រ្តីជាន់ខ្ពស់ៈ ការវិនិយោគផ្សារហ៊ុនរយៈពេលវែង មានផលចំណេញប្រហាក់ប្រហែលគ្នានឹងវិស័យអចលនទ្រព្យ
ប្រតិភូរាជរដ្ឋាភិបាល ទទួលបន្ទុកជាអគ្គនាយកផ្សារហ៊ុនកម្ពុជា លោកហុង សុហួរ បានមានប្រសាសន៍ឲ្យដឹង តាមបណ្តាញតេឡេក្រាមកាលពីចុងសប្តាហ៍មុនថា ការវិនិយោគភាគហ៊ុនឬទិញមូលបត្រ នឹងអាចធ្វើឲ្យអ្នកវិនិយោគទទួលភាពមានបាន ដូចជាការវិនិយោគដីធ្លីផងដែរ។
លោកបន្តទៀតថា “របៀបវិនិយោគដីធ្លី មានការពេញនិយមច្រើននៅកម្ពុជាយើង ដែលមនុស្សមានធនធានស្ទើរគ្រប់គ្នា បានវិនិយោគលើដីធ្លី ប៉ុន្តែការវិនិយោគលើវិស័យមូលបត្រ នៅមានកម្រិតនៅឡើយ”។ លោកបន្តថា “បើផ្អែកលើតួលេខអ្នកវិនិយោគទិញភាគហ៊ុន ឬមូលបត្រ គឺមានចំនួនតិចជាងអ្នកវិនិយោគដីធ្លី ប៉ុន្តែការពិតផលចំណេញពីវិស័យទាំងពីរនេះ មានភាពត្រដំត្រសងគ្នា”។
លោកហុង សុហួរបានបន្តដោយពន្យល់ថា ការវិនិយោគលើភាគហ៊ុនក្នុងរយៈពេលវែង គឺមានការកើនឡើងថ្លៃដល់កម្រិត១គុណ នឹងជាងបីដង និងភាគហ៊ុនរបស់ក្រុមហ៊ុនមួយចំនួន បានកើនឡើងជាង២ដងដែរ។ អញ្ចឹងមានន័យថា ការវិនិយោគភាគហ៊ុន បានឡើងថ្លៃដូចអចលនទ្រព្យដែរ។
លោកលើកជាអំណះអំណាងថា ទី១ ការវិនិយោគភាគហ៊ុនលើរយៈពេលវែង វាក៏មានការឡើងថ្លៃគ្រាន់បើដែរ ប៉ុន្តែកន្លងមកមានអ្នកវិនិយោគខ្លះបានវិនិយោគរយៈពេលខ្លី ក៏ពោលថាមិនចំណេញ ប៉ុន្តែបើយើងសង្កេតមើលវិស័យអចលនទ្រព្យ ក៏វាមានពេលមិនកើនឡើង ធ្លាក់ចុះដូចគ្នានឹងផ្សារហ៊ុនផងដែរ ទី២ ផ្សាររបស់យើងនៅក្មេងខ្ចី ទំហំជួញដូរនៅតិច អ្នកវិនិយោគនៅតិច ដែលធ្វើឲ្យថ្លៃភាគហ៊ុនមួយចំនួនមានតម្លៃទាប បើធៀបនឹងផ្សារមូលបត្រនៅប្រទេសដទៃ ប៉ុន្តែនៅពេលអនាគត ទំហំជួញដូររបស់យើងនឹងកើនឡើង និងមានអ្នកវិនិយោគកើនកាន់តែច្រើន ពេលនោះថ្លៃភាគហ៊ុនរបស់យើង នឹងមានភាពល្អជាងពេលបច្ចុប្បន្ន។
លោកហុង សុហួរបានបន្តថា “អញ្ចឹងពេលបច្ចុប្បន្ននេះ ថ្លៃហ៊ុននៅមានតម្លៃទាប ក៏ជាឱកាសល្អសំរាប់ការវិនិយោគ”។ លោកបន្ថែមថា “ដូចការវិនិយោគដីធ្លីដែរ កន្លែងណាដែលមិនទាន់មានសភាពឈូឆរ ក៏មានឱកាសកើនឡើងតម្លៃខ្ពស់នាពេលអនាគត”។
លោកបន្តថា បើយើងមើលប្រទេសមានការរីកចម្រើនមធ្យម និងខ្លាំង វិស័យអចលនទ្រព្យ និងវិស័យមូលបត្រមានភាពត្រដំត្រសងគ្នាទេ មានពេលខ្លះវិស័យមូកបត្រ ទទួលបានផលចំណេញល្អជាង វិស័យអចលនទ្រព្យ និងពេលខ្លះក៏វិស័យអចលនទ្រព្យ មានផលចំណេញជាងវិស័យមូលបត្រ។
លោកបន្ថែមថា “អញ្ចឹងបានខ្ញុំហ៊ានអះអាងថា វិស័យទាំងពីរនេះអាចរកបានផលចំណេញត្រដំត្រសងគ្នា គឺវាមានពេលរបស់វា”។ លោកបន្តថា “អ្វីខ្ញុំចង់លើកទឹកចិត្ត គឺសាធារណៈជន អាចសាកល្បងរៀនសូត្រវិនិយោគបណ្តើរៗ ព្រោះអីការវិនិយោគលើវិស័យមូលបត្រ ទាមទារឲ្យមានការស្វែងយល់ច្រើន ព្រោះវិស័យនេះ មិនអាចត្រឹមអានសៀវភៅ អាចយល់ដឹងបានស៊ីជម្រៅនោះទេ”៕
