ដោយៈ ស៊ីវ ម៉េង
ភ្នំពេញៈ លោកឧកញ៉ាបណ្ឌិតគីម ហ៊ាងប្រធានKW Cambodiaដែលជាបុគ្គលជោគជ័យ ក្នុងទីផ្សារដីធ្លីមួយរូប បានចែករំលែកវិធីសាស្រ្តធ្វើយ៉ាងណាទិញដីឲ្យបានតម្លៃល្អឬតម្លៃក្រោមទីផ្សារ។
លោកឧកញ៉ាបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃទី៣ សីហាកន្លងមកថា ការទិញដីដែលមានតម្លៃល្អ ឬតម្លៃក្រោមទីផ្សារគឺរកទិញដីណា ដែលម្ចាស់ចង់លក់ពិតប្រាកដ ដែលពួកគាត់អាចមានបញ្ហាបំណុល ឬបញ្ហាដទៃទៀត។
លោកបណ្ឌិតបានបន្តថា “អ្នកលក់ដីធ្លីមានច្រើន ប៉ុន្តែតម្លៃដែលដាក់លក់ភាគច្រើនតម្លៃខ្ពស់ជាងទីផ្សារ ហេតុនេះបើចង់ទិញដីបានតម្លៃក្រោមទីផ្សារ យើងត្រូវសិក្សានិងរកទិញដី អ្នកដែលមានដីចង់លក់ពិតប្រាកដ”។លោកបន្តថា “ដីដែលមានតម្លៃក្រោមទីផ្សារឬដីមានតម្លៃល្អ មិនពិបាកនោះទេ នៅពេលយើងមានកេរ្ត៍ឈ្មោះ មានក្រុមហ៊ុនល្អ គេ(អ្នកលក់ដី)នឹងរត់មករកយើងដោយខ្លូនឯង”។
លោកឧកញ៉ាគីម ហ៊ាងបានបន្តថា អ្វីសំខាន់យើងត្រូវកសាងកេរ្ត៍ឈ្មោះយើងឲ្យបានល្អ នៅពេលនោះគេនឹងរត់មករកយើង ប្រៀបដូចអ្នកកាសែតខ្លាំងម្នាក់ អ្នកចង់ផ្សាយព៌តមានគេនឹងរត់ ទៅរកអ្នកកាសែតរូបនោះ ប៉ុន្តែអ្នកកាសែតមិនល្បី គឺតែងតែស្វែងរកព៌តមានដោយខ្លួនឯង។
លោកបន្តថា “នៅពេលយើងល្បី យើងកសាងកេរ្ត៍ឈ្មោះបានល្អ ដូចក្រុមហ៊ុនខ្ញុំជាដើម តែងតែមានអ្នកចង់លក់ និងអ្នកស្វែងរកទិញមកជួប១០ទៅ២០នាក់ជារៀងរាល់ថ្ងៃ”។ លោកបន្តថា “នៅក្នុងមុខជំនួញមួយ ការកសាងកេរ្ត៍ឈ្មោះឲ្យបានល្អ ពិតជាមានសារៈសំខាន់ណាស់ ដើម្បីធានាភាគជោគជ័យរបស់ខ្លួន”៕
