ដោយៈ គង់ សូរិយា
ភ្នំពេញៈ ខុសប្លែកពីក្រុមហ៊ុនដទៃ ដែលបង្កើតខុនដូផ្តោតលើអតិថិជនគោលដៅអ្នកមាន និងអ្នកមានចំណូលខ្ពស់ ក្រុមហ៊ុនជា សារ៉ន របស់លោកឧកញ៉ា ជា សារ៉ន បានវិនិយោគសាងសង់ គម្រោងខុនដូតម្លៃសមរម្យត្រឹមជាង១ម៉ឺនដុល្លារជាលើកដំបូងនៅកម្ពុជា និងលើពិភពលោក។
គោលបំណងនៃការបង្កើតខុនដូតម្លៃសមរម្យនេះ គឺដោយសារ លោកឧកញ៉ា ចង់ជួយដល់ប្រជាពលរដ្ឋ និងកម្មករ កម្មការិនី ដែលមានចំណូលមធ្យម និងក្រោមធម្យមអាចមានលទ្ធភាពទិញខុនដូ សម្រាប់រស់នៅដូចអ្នកមានដែរ។
ក្រៅពីខណ្ឌកំបូល ឧកញ៉ា ជា សារ៉ន ប្តេជ្ញាបង្កើតគម្រោងខុនដូតម្លៃសមរម្យនេះនៅតាមខណ្ឌផ្សេងៗ ក្នុងរាជធានីភ្នំពេញជាច្រើនទៀតផងដែរ។
នាពិធីសម្ពោធបើកការដ្ឋានសាងសង់ និងបើកលក់គម្រោងខុនដូ ជា សារ៉ន កាលពីព្រឹកថ្ងៃទី៧ ខែសីហា ឧកញ៉ា ជា សារ៉ន ស្ថាបនិក និងជាអគ្គនាយកក្រុមហ៊ុន ជា សារ៉ន គ្រុបបានគូសបញ្ជាក់ថា គម្រោងខុនដូ ជា សារ៉ន ដែលមានទីតាំងស្ថិតនៅខណ្ឌកំបូល រាជធានីភ្នំពេញ ត្រូវបានបង្កើតឡើងដើម្បីប្រជាជន។ ព្រោះគម្រោងខុនដូនេះ ផ្តោតលើអតិថិជនគោលដៅ ដែលមានចំណូលមធ្យម និងក្រោមធម្យម ខុសប្លែកពីគម្រោងខុនដូដទៃ ដែលផ្តោតលើអ្នកមានចំណូលលើមធ្យម និងជនបរទេស។
បើតាមការគូសបញ្ជាក់របស់លោកឧកញ៉ា ជា សារ៉ន ខុនដែលមានទំហំ៤ម៉ែត្រ គុណ៦ម៉ែត្រនេះ មានតម្លៃត្រឹមតែ១ម៉ឺន៥ពាន់ដុល្លារក្នុង១យូនីតតែប៉ុណ្ណោះ។
មូលហេតុដែលជំរុញឲ្យលោកឧកញ៉ា បង្កើតគម្រោងខុនដូតម្លៃសមរម្យនេះ គឺដោយសារលោកឧកញ៉ា ចង់ជួយដល់កម្មករ កម្មការិនី និងប្រជាពលរដ្ឋរកស៊ីក្រៅប្រព័ន្ធ ដែលមានចំណូលកម្រិតទាប អាចមានលទ្ធភាពទិញខុនដូសម្រាប់ស្នាក់នៅផ្ទាល់ខ្លួន ដោយមិនចាំបាច់ជួលបន្ទប់ ឬផ្ទះសម្រាប់រស់នៅ។
ពាក់ព័ន្ធស្ថានភាពទីផ្សារ លោកឧកញ៉ា ជា សារ៉ន អះអាងថា គម្រោងខុនដូតម្លៃសមរម្យ ជា សារ៉ន ទទួលបានការកក់ និងបញ្ជាទិញពីអតិថិជនយងច្រើនលើសការរំពឹងទុក សម្រាប់ការបើកលក់មួយរយៈកន្លងមកនេះ។ កត្តានេះបានធ្វើឲ្យ លោកឧកញ៉ា ហាក់គ្មានការព្រួយបារម្ភ ចំពោះវិបត្តិកូវីដ-១៩ ក្នុងការធ្វើឲ្យប៉ះពាល់ដល់ទីផ្សារទិញលក់ខុនដូ ក្នុងគម្រោងនេះនោះទេ។
ទន្ទឹមនឹងនេះ លោកឧកញ៉ា ក៏បានបង្ហាញពីការប្តេជ្ញាចិត្ត ក្នុងការបង្កើតគម្រោងខុនដូតម្លៃសមរម្យនេះ នៅតាមខណ្ឌផ្សេងៗក្នុងរាជធានីភ្នំពេញឲ្យបានច្រើនទៀតផងដែរ។
គម្រោងខុនដូ ជា សារ៉ន មានទីតាំងស្ថិតនៅខុនដូ ជា សារ៉ន ស្ថិតនៅភូមិត្មាតពង សង្កាត់បឹងធំ ខណ្ឌកំបូល រាជធានីភ្នំពេញ ក្បែរតំបន់សេដ្ឋកិច្ចពិសេសភ្នំពេញ។ គម្រោងនេះមាន១២អគារ ស្ថាបនាលើផ្ទៃដី៣ម៉ឺន៤ពាន់ម៉ែត្រការ៉េ ជាមួយទុនវិនិយោគប្រមាណ៥០លានដុល្លារអាមេរិក៕
