ដោយៈគង់ ម៉ាលីនណា
ភ្នំពេញៈ ធនាគារនានានៅកម្ពុជាបានបន្តរីកចម្រើន និងពង្រីកសាខាជាបន្តបន្ទាប់ ស្របពេលកម្រិតនៃការផ្តល់ឥណទាន បានកើនឡើងយ៉ាងល្អប្រសើរ ជាសារមួយបញ្ជាក់ពីការរីកចម្រើននៃសេដ្ឋកិច្ចជាតិ។
ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានបញ្ជាក់កាលពីសប្តាហ៍មុនថា នៅពេលធនាគាររីកចម្រើន ទើបសេដ្ឋកិច្ចជាតិមានការរីកចម្រើន ហើយអ្វីដែលយើងសង្កេតឃើញ គឺមានសមាគមសហគ្រិនជាច្រើនបានបង្កើតឡើង ដែលជារឿងមួយល្អ សម្រាប់សេដ្ឋកិច្ចក្រុមគ្រួសារនិមួយៗ និងសេដ្ឋកិច្ចប្រទេសរបស់យើងមានភាពរីកចម្រើន។
លោកឧកញ៉ាបានបន្តថា “សារពីស្ថាប័នធនាគាររបស់យើង គឺយើងមានភាពរីករាយ ដែលសហគ្រិនទាំងនោះមានការរីកចម្រើន ហើយយើងរីករាយក្នុងការផ្តល់ទុនដល់ពួកគាត់ បើសិនជាពួកគាត់ត្រូវការទុនពង្រីកអាជីវកម្ម”។ លោកបន្តថា “កាលណាយើងដាក់ទុន លើជំនួញរបស់គាត់កាន់តែច្រើន បានន័យថាយើងចាក់បញ្ចូលហិរញ្ញវត្ថុទៅក្នុងទីផ្សារ ដែលធ្វើឲ្យទីផ្សារបង្កើតបានកំលាំងនៃការទិញ លក់ កាន់តែច្រើនឡើង និងជួយជម្រុញដល់សេដ្ឋកិច្ចរបស់យើង។
លោកឧកញ៉ាហួត អៀងតុងបានបន្តថា វិស័យធនាគារបានចាក់ទុនជាង៣២ពាន់លានដុល្លារចូលក្នុងទីផ្សារ ដែលវាបានបង្កើតកំលាំងទិញនៅក្នុងទីផ្សារ និងចរន្តសេដ្ឋកិច្ចបានល្អ ស្របពេលទំនុកចិត្តរបស់សាធារណៈជនលើវិស័យធនាគារ បានកើនឡើងគួរឲ្យកត់សំគាល់។
យោងតាមរបាយការណ៍របស់ធនាគារជាតិនៃកម្ពុជា (NBC)បានបង្ហាញថា ប្រាក់កម្ចីតាមធនាគារ និងគ្រឹះស្ថានមីក្រូហិរញ្ញវត្ថុបានកើនឡើងដល់៥១,៥ពាន់លានដុល្លារអាមេរិក គិតត្រឹមខែមិថុនាឆ្នាំនេះ ពោលគឺកើនឡើង២៣,៤ ភាគរយធៀបនឹងរយៈពេលដូចគ្នា កាលពីឆ្នាំមុន ខណៈដែលប្រាក់បញ្ញើរបស់អតិថិជន បានកើនឡើង១៦ភាគរយដល់៤២ពាន់លានដុល្លារ។
យោងតាមរបាយការណ៍ដដែលបានបង្ហាញថា ប្រាក់កម្ចីមិនដំណើរការ (NPLs) នៅតាមធនាគារ និងគ្រឹះស្ថានមីក្រូហិរញ្ញវត្ថុ ស្ថិតក្នុងអត្រាអាចគ្រប់គ្រងចំនួន២,៦ ភាគរយ និង២,៣ភាគរយរៀងគ្នា៕
