ដោយ: លាងហួរ
ប្រទេសថៃ: ក្រុមហ៊ុនGrande Asset Hotels and Property Plc បានបើកដំណើរការគម្រោងវីឡាប្រណីត Amatara Residences Rayong ដែលមាន៦១យូនីត តម្លៃចាប់ពី៣៣លានបាត ដើម្បីទាក់ទាញប្រជាជនអឺរ៉ុប ដែលកំពុងស្វែងរកផ្ទះបែបរមណីយដ្ឋាន។
លោក Pheeraphon Nonthasoot អនុប្រធានប្រតិបត្តិផ្នែកលក់ និងទីផ្សាររបស់ក្រុមហ៊ុននេះ បាននិយាយថា ឆ្នេរLaem Mae Phim ដែលមានចម្ងាយ៦គីឡូម៉ែត្រ ពីទីតាំងគម្រោង ត្រូវបានគេស្គាល់យ៉ាងច្បាស់ក្នុងចំណោមប្រជាជនអឺរ៉ុបខាងលិច ជាពិសេសជនជាតិស៊ុយអែត និងអាល្លឺម៉ង់។
លោកបន្តថា គម្រោងវីឡា Rayong មិនមានការអភិវឌ្ឍន៍ថ្មីនៃលំនៅដ្ឋានប្រណីតអស់រយៈពេលជាច្រើនឆ្នាំ ហើយនេះគឺជាពេលវេលាដ៏ត្រឹមត្រូវដើម្បីចាប់ផ្តើមគម្រោងនេះ ដោយសារប្រាក់បាតកំពុងធ្លាក់ចុះ នាពេលបច្ចុប្បន្ន ខណៈដែលប្រជាជនអឺរ៉ុបជាច្រើន ទំនងជាកំពុងស្វែងរកកន្លែងស្នាក់នៅក្នុងអំឡុងពេលរដូវរងា ខាងមុខចំពេលមានវិបត្តិថាមពល។
លោក Nithi Nakages ស្ថាបនិកសមាគមអចលនទ្រព្យ Rayong បាននិយាយថា ប្រជាជនស៊ុយអែតចូលចិត្តស្នាក់នៅ ជុំវិញតំបន់មាត់សមុទ្ររបស់ Rayong នៅជិតឆ្នេរ Laem Mae Phim ជាពិសេសជាកន្លែងដែលគ្រួសារស៊ុយអែត ប្រហែល៥០០គ្រួសាររស់នៅ៕
