ដោយៈ គង់ សូរិយា
សៀមរាបៈ មន្ត្រីជាន់ខ្ពស់អាជ្ញាធរជាតិអប្សរាអះអាងថា មានប្រាសាទបុរាណតូចៗជាច្រើន ក្នុងខេត្តសៀមរាប មិនទាន់ត្រូវបានភ្ញៀវទេសចរស្គាល់នៅឡើយទេ។
ដើម្បីឱ្យភ្ញៀវទេសចរបានស្គាល់ កាន់តែទូលំទូលាយអាជ្ញាធរជាតិអប្សរាកំពុងកែលម្អ ហេដ្ឋារចនាសម្ព័ន្ធមួយចំនួន និងបន្ថែមការផ្សព្វផ្សាយតាមរយៈក្រុមហ៊ុនទេសចរណ៍ជាដៃគូផងដែរ។
លោកឡុង កុសល អ្នកនាំពាក្យអាជ្ញាធរជាតិអប្សរាបានមានប្រសាសន៍ឲ្យដឹងថា មានប្រាសាទតូចៗជាច្រើន ក្នុងខេត្តសៀមរាប គឺភ្ញៀវទេសចរមិនសូវបានស្គាល់អស់នៅឡើយទេ ហេតុនេះដើម្បីឱ្យភ្ញៀវទេសចរកាន់តែងាយស្រួលក្នុងការចូល ទៅទស្សនាតំបន់ប្រាសាទតូចៗនោះ គឺអាជ្ញាធរជាតិអប្សរាបាន និងកំពុងតែកែលម្អហេដ្ឋារចនាសម្ព័ន្ធ ដូចជា រៀបចំឱ្យមានទីកន្លែងចំណតរថយន្ត ការកែលម្អសម្រួលផ្លូវ ទៅកាន់ប្រាសាទតូចៗទាំងនោះជាដើម។
ទន្ទឹមនឹងនេះអាជ្ញាធរជាតិអប្សរា បានដាក់នូវគ្រឿងបរិក្ខារទេសចរណ៍មួយចំនួន ដើម្បីទ្រទ្រង់នៅតំបន់ប្រាសាទ ជាពិសេសទីតាំងប្រាសាទនៅពេលដែលមានភ្ញៀវទេសចរ ចូលទៅទស្សនាច្រើន នឹងធ្វើឱ្យមានភាពចង្អៀតណែន។ ដូច្នេះហើយត្រូវធ្វើយ៉ាងណាឱ្យមានសុវត្ថិភាព ទាំងផ្លូវដើរ ទាំងការទស្សនានៅក្នុងប្រាសាទ។
លោកថ្លែងថា “យើងត្រូវតែបំពេញកិច្ចការទាំងអស់នោះ ឱ្យបានរួចរាល់សិនមុន នឹងឱ្យគាត់អញ្ជើញទៅទស្សនាបាន។ យើងខ្លួនឯងសិក្សាអំពីផ្លូវទស្សនាចរណ៍ថា តើនៅក្នុងប្រាសាទនោះ គាត់អញ្ជើញទស្សនាពីកន្លែងណា ទៅកន្លែងណា គឺយើងត្រូវគិតអាហ្នឹងមួយជំហានមុន ព្រោះភ្ញៀវទេសចរគាត់ចាំតែទៅទេ”។
លោក ឡុង កុសល បានឲ្យដឹងថា ពីមុនៗមក ភ្ញៀវទេសចរមិនសូវស្គាល់ប្រាសាទតូចៗប៉ុន្មានទេ ព្រោះបញ្ហាទី១ គឺបណ្តាលមកពីក្រុមហ៊ុនទេសចរណ៍ ដែលគាត់រៀបចំកញ្ចប់ទេសចរណ៍ តម្រង់ទៅតែគោលដៅទេសចរណ៍ធំៗ។ ដូច្នេះអាជ្ញាធរជាតិអប្សរា ត្រូវតែធ្វើការជាមួយខាងក្រុមហ៊ុនទេសចរណ៍ ដែលជាអ្នករៀបចំកញ្ចប់ទស្សនា ឱ្យបង្វែរភ្ញៀវទេសចរទៅមើលទីតាំងទេសចរណ៍កន្លែងផ្សេងទៀត ឬក៏អ្នកដើរទេសចរណ៍ឯករាជ្យដែលគាត់ដើរដោយខ្លួនឯង ឱ្យគាត់បានដឹងនូវព័ត៌មានហ្នឹងឱ្យបានច្រើន គឺគាត់នឹងទៅទីនោះបានកាន់តែច្រើន។
ដើម្បីជំរុញឱ្យភ្ញៀវទេសចរបានស្គាល់ បានដឹងពីប្រាសាទតូចៗទាំងនោះកាន់តែច្រើន គឺខាងអាជ្ញាធរជាតិអប្សរា កំពុងបន្តផ្សព្វផ្សាយដោយទំនាក់ទំនង ជាមួយក្រុមហ៊ុន ដែលគាត់ធ្វើប្រតិបត្តិការលើវិស័យទេសចរណ៍ តាមរយៈការដឹកនាំភ្ញៀវ ឬជូនភ្ញៀវជាដើម។ ម្យ៉ាងវិញទៀតអាជ្ញាធរជាតិអប្សរាខ្លួនឯង ក៏ត្រូវផ្សព្វផ្សាយទៅតាមលទ្ធភាព ដែលមានផងដែរ ក៏ប៉ុន្តែមិនអាចខានបានទេ ចំពោះស្ថាប័នពាក់ព័ន្ធ ជាពិសេសវិស័យឯកជនដែលជាអ្នកផ្សព្វផ្សាយទីផ្សារទេសចរណ៍៕
