ដោយ វុត្ថា
ភ្នំពេញ៖ ប្រធានមន្ទីរទេសចរណ៍ខេត្តព្រះស៊ីហនុលោក តាំង សុចិត្រគ្រឹះស្នាបានឲ្យ ដឹងថា នាពេលបច្ចុប្បន្ននេះមានក្រុមហ៊ុនអាកាសចរណ៍ចំនួន១១ កំពុងប្រតិបត្តិការហោះហើរត្រង់ទៅកាន់ខេត្តព្រះស៊ីហនុ។
លោកបន្តថា ក្នុងចំណោមក្រុមហ៊ុនអាកាសចរណ៍ទាំងនោះ គឺមានក្រុមហ៊ុនអាកាសចរណ៍ក្នុងស្រុកចំនួន៦ និងក្រុមហ៊ុនក្រៅស្រុកចំនួន៥ ដែលកំពុងប្រតិបត្តិការហោះមកពីបណ្តាប្រទេសមួយចំនួន រួមមាន ប្រទេសវៀតណាម ម៉ាឡេស៊ី និងច្រើនជាងគេងមកពី ព ១៥ ខេត្តក្រុងរបស់ប្រទេសចិន។ លោកបន្តថា ចំនួនអាកាសចរណ៍នេះបានកើនឡើងចំនួន៣ក្រុមហ៊ុនសម្រាប់ឆ្នាំនេះ ខណៈឆ្នាំមុនមានត្រឹមតែក្រុមហ៊ុនចំនួន៨ប៉ុណ្ណោះ បានហោះហើរត្រង់មកកាន់ព្រលាននេះ។
លោក សុចិត្រគ្រឹះស្នា បានបន្តថា ក្នុងមួយសប្តាហ៍ ការហោះហើរត្រង់មកកាន់ខេត្តព្រះសីហនុនេះ មានចំនួនជាង១០០លើក ដោយចំនួននេះមិនទាន់រាប់បញ្ចូលការហោះជាលក្ខណៈជួលនៅឡើយទេ។
លោកបញ្ជាក់ថា នៅក្នុងឆ្នាំបន្តបន្ទាប់ទៀត នឹងមានក្រុមហ៊ុនអាកាសចរណ៍ថៃ Thai Airway កំពុងពិចារណាហោះហើរត្រង់មកកាន់ខេត្តព្រះសីហនុ ព្រោះតក្រុមហ៊ុនមួយនេះមើលឃើញពីតម្រូវការ និងការកើនឡើងសេដ្ឋកិច្ចសង្គម និងទេសចរណ៍ធ្វើដំណើរមកកាន់ខេត្តមួយនេះ។ ជាមួយគ្នានោះ ក៏មានក្រុមហ៊ុនអាកាសចរណ៍អន្តរជាតិផ្សេងទៀត ក៏កំពុងពិចារណារគហោះហើរត្រង់ មកកាន់ខេត្តជាប់មាត់សមុទ្រមួយនេះដែរ ខណៈ ដែលព្រលានយន្តហោះនេះកំពុងត្រៀមពង្រីកប្រវែងផ្លូវរត់បន្ថែមទៀត ដើម្បីទទួលយន្តហោះធុនធំៗ និងទទួលភ្ញៀវទេសចរណ៍អោយបានកាន់តែច្រើនបន្ថែមទៀតនាពេលខាងមុខនេះ។
លោកពេជ្រ សុប៉ុនតារាប្រធានផ្នែកបង្កើនជើងហោះហើរនៃក្រុមហ៊ុនអាកាសយានដ្ឋានកម្ពុជាបានថ្លែងថា ព្រលានយន្តហោះក្រុងព្រះសីហនុ នឹងចាប់ផ្តើមពង្រីកនៅកំឡុងត្រីមាសទី១ឆ្នាំ២០១៩ខាងមុខ ដែលក្រោយពេលពង្រីកព្រលាននេះ នឹងមានទំហំប៉ុនគ្នានឹងព្រលានយន្តហោះអន្តរជាតិភ្នំពេញសព្វថ្ងៃនេះ។ លោកបន្តថា បច្ចុប្បន្នព្រលានយន្តហោះនេះមានប្រវែងផ្លូវរត់ដូចគ្នា នឹងព្រលានយន្តហោះអន្តរជាតិខេត្តសៀមរាប ប៉ុន្តែក្រោយពេលពង្រីកចប់ ព្រលាននេះនឹងអាចទទួលការចុះចតយន្តហោះ ដែលអាចផ្ទុកអ្នកដំនើរបានជាង៤០០នាក់។
លោកបន្តថា “តាមការរំពឹងទុកយើងរំពឹងថាព្រលានយន្តហោះកងកេង នឹងទទួលបានធអ្នកដំណើរប្រមាណ៧០ម៉ឺននាក់នៅដំណាច់ឆ្នាំនេះ”៕
