ដោយ ស៊ីវ ម៉េង
ភ្នំពេញ ៖ ក្រុមហ៊ុនវិនិយោគព្រលានយន្តហោះកម្ពុជា (SCA) បាន និងកំពុងព្យាយាមទាក់ទងក្រុមហ៊ុនអាកាសចរណ៍ជាច្រើនទៀត ឲ្យហោះហើរត្រង់ទៅកាន់ព្រលានយន្តហោះកងកេងក្រុងព្រះសីហនុ។
ប្រធានផ្នែកបង្កើនជើងហោះហើរនៃក្រុមហ៊ុនអាកាសយានដ្ឋានកម្ពុជា លោក ពេជ្រ សុប៉ុនតារា បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី៥ ធ្នូកន្លងមកថា មានក្រុមហ៊ុនអាកាសចរណ៍ជាច្រើនបាន និងកំពុងសិក្សាលទ្ឋភាពហោះហើរត្រង់មកកាន់ព្រលានយន្តហោះ កងកេង ខេត្តព្រះសីហនុ ដែលពេលថ្មីៗនេះមានក្រុមហ៊ុន BangkokAirway, Air Asia និងក្រុមហ៊ុនអាកាសចរណ៍ជាច្រើនទៀត បានមកសិក្សាពីតម្រូវការនិងសក្តានុពលទីផ្សារមុនសម្រេចហោះហើរត្រង់មកកាន់ក្រុងព្រះសីហនុ។
-->
លោកបន្តថា “អ្វីដែលយើងចង់បានគឺជំរុញឲ្យមានការហោះហើរកាន់តែច្រើន
នេះជាការចង់បានរបស់យើង ខណៈបច្ចុប្បន្នយើងមានអាកាសចរណ៍ចំនួន១១ក្រុមហ៊ុនបានហោះត្រង់មកកាន់ព្រលានយន្តហោះនេះជាប្រចាំរួចហើយ។
លោកបន្តថា “ក្រុមហ៊ុន Air Asia បានហោះហើរត្រង់ពីម៉ាឡេស៊ីមកព្រលាននេះហើយ តែយើងចង់ឲ្យមានការហោះហើរត្រង់ពីក្រុងបាងកក និងពីវៀតណាមមកកាន់ព្រលាននេះផងដែរ។
បច្ចុប្បន្នមានអាកាសចរណ៍ចំនួន៣០បានហោះឡើង
និងចុះចតជាប្រចាំនៅព្រលានយន្តហោះនេះជារៀងរាល់ថ្ងៃ ដែលចំនួននេះមិនទាន់រាប់បញ្ចូលការហោះហើរជាលក្ខណៈជួលនៅឡើយទេ។
លោក ពេជ្រ សុប៉ុនតារា បានបន្តថាថ្មីៗនេះ សម្តេចតេជោហ៊ុន សែន បានប្រកាសពីការពង្រីកព្រលានយន្តហោះនេះ ដើម្បីអាចទទួលអ្នកដំណើរ៣លាននាក់ក្នុងមួយឆ្នាំជាអ្វី
ដែលក្រុមហ៊ុនឯកភាព ព្រោះ SCA ជាក្រុមហ៊ុនដៃគូរបស់រដ្ឋាភិបាល ហេតុនេះរដ្ឋាភិបាលឲ្យធ្វើអ្វីយើងនឹងគោរពតាម។លោកបន្តថាបច្ចុប្បន្ន ចំណត និងស្ថានីយ៍ទទួលអ្នកដំណើរ នៅព្រលានយន្តហោះ កងកេង អាចមានសមត្ថភាពទទួលអ្នកដំណើរ៥០ម៉ឺននាក់ក្នុងមួយឆ្នាំប៉ុន្តែផ្លូវរត់និងស្ថានីយ៍អ្នកដំណើរនឹងត្រូវពង្រីកថែមទៀតនាពេលអនាគត។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ថា SCA ពិតជាបានធ្វើការច្រើនដើម្បីទាក់ទាញឲ្យមានការហោះហើរត្រង់មកកម្ពុជា ដែលនេះជាអ្វីដែលលោកបានឃើញនាពេលកន្លងមក។លោកបន្តថា អ្វីដែលសំខាន់គឺយើងចង់ឲ្យមានការហោះហើរត្រង់មកកាន់តែច្រើនកាន់តែល្អទោះជាមកពីប្រទេសណាក៏ដោយ ក៏សុទ្ធតែនាំមកនូវផលប្រយោជន៍ផ្នែកទេសចរណ៍ និងពាណិជ្ជកម្មជាមួយកម្ពុជា។
លោកបន្តថា “យើងស្វាគមន៍ការហោះហើរត្រង់
ហោះមកពីទីណាក៏ដោយកាន់តែច្រើនកាន់តែល្អ”៕
