ដោយ : វុត្ថា
ភ្នំពេញ៖ ខេត្តព្រះសីហនុដែលជាខេត្តមានសត្តានុពលសេដ្ឋកិច្ច ទេសចរណ៍ និងអចលនទ្រព្យប្រចាំប្រទេសកម្ពុជា ត្រូវបានលើកយកទៅបង្ហាញនៅក្នុងពិព័រណ៍ចិន-អាស៊ាននៅទីក្រុងណាននីងនៃសាធារណៈរដ្ឋមានិតចិននាថ្ងៃទី៦ ធ្នូនេះ។
គេហទំព័រហ្វេសបុករបស់រដ្ឋបាលខេត្តព្រះសីហនុបានសរសេរថា “ខេត្តទាំងអស់នៃប្រទេសកម្ពុជាមានតែខេត្តព្រះសីហនុមួយគត់ ដែលគណៈកម្មការពិព័រណ៍ណាននីង បានជ្រើសរើសយកជាខេត្តដែលនឹងដាក់បង្ហាញជូនភ្ញៀវជាតិ និងអន្តរជាតិ នាឱកាសនេះ។
នៅក្នុងវេទិកាពិព័រណ៍លើកទី១២នេះមានប្រទេសក្នុងក្របខណ្ឌអាស៊ានទាំង១០ នឹងត្រូវបង្ហាញសក្តានុពលរបស់ខ្លួន ទៅកាន់ភ្ញៀវទេសចរអន្តរជាតិក្នុងទីលានពិព័រណ៍ទំហំប្រមាណ១.០០០ហិកតា ដោយខេត្តព្រះសីហនុ ត្រូវបានគណៈកម្មការពិព័រណ៍ផ្តល់អាទិភាព ដើម្បីបង្ហាញភ្ញៀវអន្តរជាតិ។
ខេត្តព្រះសីហនុគឺជាខេត្តមួយដែលបានចុះអនុស្សរណៈជាខេត្ត ក្រុងបងប្អូន ខេត្ត ក្រុងណាននីងនាឆ្នាំ២០១៧។ ដូច្នេះហើយត្រូវបានគណៈកម្មការពិព័រណ៍អន្តរជាតិចិនអាស៊ាន ផ្តល់អាទិភាពបានដាក់តាំងបង្ហាញសក្តានុពលនានា ជូនភ្ញៀវអន្តរជាតិ នាឱកាសលើកទី១២នេះខណៈដែលមានតែប្រទេសទាំង១០ប៉ុណ្ណោះមានវត្តមាន ក្នុងព្រឹត្តិការណ៍ដ៏ធំនេះ។
ខេត្តព្រះសីហនុមានសក្តានុពលសំខាន់ៗជាច្រើនដូចជាទី១ មានកំពង់ផែទឹកជ្រៅតែមួយគត់នៅកម្ពុជា ទី២ ជាខេត្តមានសមុទ្រដ៏ស្រស់ស្អាត និងជាប៉ូលទេសចរណ៍ដ៏សំខាន់របស់ជាតិ ទី៣ មានហេដ្ឋារចនាសមស្រប ដោយមានព្រលាបយន្តហោះផ្លូវរថភ្លើង មានព្រលានយន្តហោះលំដាប់អន្តរជាតិនិងទី៤ ជាខេត្តស្ថិតក្នុងខ្សែក្រវ៉ាត់មួយផ្លូវមួយរបសចិនជាដើម៕
