ភ្នំពេញៈ លោក ឌិត ទីណា រដ្ឋលេខាធិការ ក្រសួងរ៉ែ និងថាមពល ត្រូវបានរាជរដ្ឋាភិបាល ស្នើរដ្ឋសភា ដើម្បីបោះឆ្នោតផ្តល់សេចក្តីទុកចិត្ត ធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក វេង សាខុន ដែលត្រូវបានបញ្ចប់តំណែង។ ប៉ុន្តែ មានសាធារណជនតិចណាស់ ដែលស្គាល់លោក។ តើលោក ឌិត ទីណា ជាអ្នកណា?
លោក ឌិត ទីណា ជាកូនប្រុសរបស់លោក ឌិត មន្ទី ប្រធានតុលាការកំពូល។ លោករៀនចប់ជំនាញរ៉ែ នៅទីក្រុងប៉ារីស ប្រទេសបារាំង មុននឹងវិលត្រឡប់មកបម្រើការងារក្នុងជួររាជរដ្ឋាភិបាល ដោយចាប់ផ្តើមជាអនុរដ្ឋលេខាធិការក្រសួងពាណិជ្ជកម្ម ហើយឡើងជារដ្ឋលេខាធិការក្រសួងពាណិជ្ជកម្ម។ ក្រោយមក លោក ឌិត ទីណា បានកាន់ការ ជារដ្ឋលេខាធិការក្រសួងរ៉ែ និងថាមពល បន្តដល់សព្វថ្ងៃ។
កើតនៅថ្ងៃទី៧ ខែមករា ឆ្នាំ១៩៧៩ ចំថ្ងៃជ័យជម្នះលើខ្មែរក្រហម លោក ឌិត ទីណា ក៏ធ្លាប់ឈរឈ្មោះ ជាបេក្ខជនបម្រុង លំដាប់លេខរៀងទី២ ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ របស់គណបក្សប្រជាជនកម្ពុជា នៅមណ្ឌលខេត្តកណ្តាល។
-->
ក្រោយការបោះឆ្នោត និងការបង្កើតរាជរដ្ឋាភិបាល នីតិកាលទី៥ នៅឆ្នាំ២០១៣ ក្រសួងឧស្សាហកម្ម រ៉ែ និងថាមពល ត្រូវបានបំបែកជាពីរ គឺក្រសួងរ៉ែ និងថាមពល ដែលមានលោក ស៊ុយ សែម ជារដ្ឋមន្ត្រី និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលមានលោក ចម ប្រសិទ្ធ ជារដ្ឋមន្ត្រី។
ឯកសារក្នុងហ្វេសប៊ុកផ្លូវការរបស់លោក ឌិត ទីណា បង្ហាញថា លោកបញ្ចប់សញ្ញាបត្រទុតិយភូមិមកពីវិទ្យាល័យព្រះស៊ីសុវត្ថិ ក្នុងរាជធានីភ្នំពេញ ចន្លោះពីឆ្នាំ១៩៩១ ដល់ឆ្នាំ១៩៩៤ មុននឹងលោក ចាកចេញទៅរៀនថ្នាក់វិទ្យាល័យសញ្ញាបត្រទុតិយភូមិ Baccalaureate នៅប្រទេសបារាំង Lycée Gérard de Nerval bac ក្នុងឆ្នាំ១៩៩៦។ នៅក្នុងឆ្នាំ១៩៩៩ លោកទទួលបានបរិញ្ញាបត្រ រូបវិទ្យា មកពី សាកលវិទ្យាល័យ Orsay, Paris Sud និងនៅឆ្នាំ២០០០ បានបញ្ជប់បរិញ្ញាបត្រជាន់ខ្ពស់ផ្នែករូបវិទ្យា មកពី សាកលវិទ្យាល័យ Orsay, Paris Sud។
លោក ឌិត ទីណា ក៏បានរៀនចប់ជំនាញរ៉ែ នៅសាលាជាតិរ៉ែ នៅទីក្រុងប៉ារីស ប្រទេសបារាំង École Nationale Superieure des mines de Paris។ ២០០២ ទទួលបានសញ្ញាបត្រវិស្វកររ៉ែ មកពី Ecole Nationale superieure des mines de Paris ។
នៅថ្ងៃទី៣០ ខែមករា ឆ្នាំ២០០៩ លោក ឌិត ទីណា ត្រូវបានព្រះមហាក្សត្រ ចេញព្រះរាជក្រឹត្យ តែងតាំងជាអនុរដ្ឋលេខាធិការក្រសួងពាណិជ្ជកម្ម។ ក្រោយមក លោកឡើងជារដ្ឋលេខាធិការក្រសួងពាណិជ្ជកម្ម មុននឹងផ្ទេរមកកាន់តំណែងជារដ្ឋលេខាធិការក្រសួងរ៉ែ និងថាមពល បន្តរហូតដល់សព្វថ្ងៃ។
យោងតាមលិខិតរាជរដ្ឋាភិបាលលេខ៩៩០ លស ចុះហត្ថលេខាដោយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី០៨ ខែតុលា ឆ្នាំ២០២២ បានស្នើទៅកាន់ សម្តេច ហេង សំរិន ប្រធានរដ្ឋសភា ដើម្បីបោះឆ្នោតផ្តល់សេចក្តីទុកចិត្ត លោក ឌិត ទីណា ធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួស លោក វេង សាខុន ដែលត្រូវបានបញ្ចប់តំណែង៕
