ដោយ : គង់ សូរិយា
ភ្នំពេញ : ខណៈបុណ្យសមុទ្រជិតឈានមកដល់ សណ្ឋាគារ ផ្ទះសំណាក់ នៅក្នុងខេត្តកោះកុង មកដល់ថ្ងៃនេះ ត្រូវបានអ្នកទេសចរកក់អស់ហើយ ក៏ប៉ុន្តែទោះបីជាមានការកក់បន្ទប់ស្នាក់នៅអស់ក៏ដោយ ក៏អាជ្ញាធរជំរុញដល់ពលរដ្ឋ អ្នកទេសចរ អញ្ជើញមកលេងខេត្តកោះកុងឲ្យបានច្រើន ព្រោះមានបន្ទប់ប្រមាណ៦០០បន្ទប់ត្រៀមទទួលនៅប្រទេសថៃ។
យោងតាមការឲ្យដឹងពីមន្រ្តីទេសចរណ៍ខេត្តបានឲ្យដឹងថា គិតមកត្រឹមថ្ងៃទី១១ ខែធ្នូ នេះ សណ្ឋាគារ ផ្ទះសំណាក់ ត្រូវបានកក់អស់ទាំងស្រុង តែសម្រាប់រមណីយដ្ឋានស្នាក់នៅកម្សាន្តនានានៅខេត្តកោះកុងជាច្រើនទៀត ត្រូវបានពលរដ្ឋអ្នកទេសចរកក់ទុកស្ទើរតែ១០០ភាគរយ សម្រាប់ស្នាក់នៅគ្មានសល់ រួមមកលេងកម្សាន្តនៅថ្ងៃបុណ្យសមុទ្ររយៈពេល៣ថ្ងៃ។
ម្ចាស់ផ្ទះសំណាក់មួយរូបបានឲ្យដឹងក្នុងលក្ខខណ្ឌមិនបញ្ចេញឈ្មោះថា ការកក់បន្ទប់ផ្ទះសំណាក់ និងសណ្ឋាគារនេះ ធ្វើឡើងតាមរយៈទូរស័ព្ទ និងតាមវេបសាយរបស់សេវាកម្មស្នាក់នៅជាង១ខែមុនមកម្ល៉េះ។ រីឯតម្លៃបន្ទប់ស្នាក់វិញ ត្រូវបានម្ចាស់សណ្ឋាគារ និងផ្ទះសំណាល់ តម្លើងគួរសមផងដែរ ត្បិតក្រសួងទេសចរណ៍ស្នើមិនឱ្យតម្លើងថ្លៃយ៉ាងណាក៏ដោយ។
ទោះបីជាមានការកក់បន្ទប់ស្នាក់នៅអស់ក៏ដោយ ក៏រដ្ឋមន្រ្តីក្រសួងទេសចរណ៍លោក ថោង ខុន និងលោកជំទាវ មិថុនា ភូថង អភិបាលខេត្តកោះកុង ជំរុញដល់ពលរដ្ឋអ្នកទេសចរដែលមានបំណងចង់មកលេងខេត្តកោះកុងថ្ងៃបុណ្យសមុទ្រ គឺអាចមកបាន ដោយសារតែមានបន្ទប់ស្នាក់នៅប្រមាណ៦០០បន្ទប់ផ្សេងទៀត ដែលបានត្រៀមទទួលរួចជាស្រេចនៅស្រុកខ្លងយ៉ៃ ខេត្តត្រាត ប្រទេសថៃ។ ករណីខ្វះទីតាំងស្នាក់នៅរបស់ពលរដ្ឋអ្នកទេសចរជាតិ និងអន្តរជាតិ។
នៅខេត្តកោះកុង មានសណ្ឋាគារ ផ្ទះសំណាក់ និងភោជនីយដ្ឋានជិត២០០ទីតាំង ស្មើនឹង១ពាន់៨០០បន្ទប់ ដែលចំនួននេះ មិនរាប់បញ្ចូលក្លឹបកម្សាន្ត ខារ៉ាអូខេ និងកន្លែងម៉ាស្សានោះឡើយ។ ពិធីបុណ្យសមុទ្រលើកទី៧ ជុំទី២ នឹងប្រព្រឹត្តទៅនៅថ្ងៃទី១៤ដល់១៦ ខែធ្នូ ចុងសប្តាហ៍នេះ ក្រោមប្រធានបទ « ឆ្នេរស្អាត ពលរដ្ឋរមណីយ» ។
ពិធីបើកជាផ្លូវការនៅល្ងាចថ្ងៃទី១៥ ខែធ្នូ ក្រោមអធិបតីភាពដ៏ខ្ពង់ខ្ពស់ សម្តេច តេជោ នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ៕
