ដោយៈ ស៊ីវ ម៉េង
កោះកុងៈ ជំនោរសមុទ្រត្រជាក់ស្រឹប អង្គុយអាំងមឹកញាំជាមួយទឹកត្រីកោះកុង ហែលទឹកកំសាន្តមើលផ្កាថ្ម និងមច្ឆាចម្រុះព៌ណ ចេញពីឆ្នេរទៅកាន់តំបន់ទឹកជ្រៅ ស្ទូចត្រីកំសាន្តប្រហែលមិនមែនជាទិដ្ឋភាព ដ៏រសរវើក ដែលអ្នកមិនធ្លាប់គិតដល់នោះទេ។
ពេលវេលាចុងសប្តាហ៍ ទំនងជាវេលាសមរម្យជាងគេ សម្រាប់ការដើរកំសាន្តទៅកាន់កោះមួយ ដែលមានឧត្តមភាពទាំងឈ្មោះ និងធនធានធម្មជាតិដ៏សម្បូរបែបនៅលើទឹកដីដ៏ស្រស់បំព្រងមួយនេះ។
តាមពិតទៅ កោះស្ដេច គឺជា កោះធម្មជាតិមួយ ឋិតនៅក្នុងភូមិ កោះស្តេច ឃុំកោះស្ដេច ស្រុកគីរីសាគរ ដែលលាតសន្ធឹងតាមបណ្ដោយសមុទ្រមានចម្ងាយប្រមាណ៨១គីឡូម៉ែត្រ ពីទីរួមខេត្តកោះកុង។ កោះស្ដេច មានចំងាយប្រមាណ២៥០ គីឡូម៉ែត្រពីរាជធានីភ្នំពេញ ដោយត្រូវធ្វើដំណើរជាពីរដំណាក់កាល គឺផ្លូវគោក និង ផ្លូវទឹក ដោយជិះអូប័រ (ទូកតូចដែលមានល្បឿនលឿន)។
រមណីយដ្ឋានកោះស្ដេច មានឆ្នេរខ្សាច់សស្អាត មានផ្ទះសំណាក់ និង ទេសភាពស្រស់ស្អាតសម្រាប់លំហែលំហើយ ព្រោះមានកោះជាច្រើននៅជុំវិញ និង ព្រៃធម្មជាតិ។
ក្រោមការបណ្តាក់ទុនវិនិយោគ និងអភិវឌ្ឍន៍ពីក្រុមហ៊ុនចិនUNION GROUP កោះស្តេចស្ថិតនៅស្រុកគិរីសាគរ ខេត្តកោះកុង នឹងក្លាយជារមណីយដ្ឋានទេសចរណ៍ក្នុងលំហសមុទ្រ ដែលគួរឲ្យទាក់ទាញបំផុតនាពេលអនាគត។
កោះស្តេចត្រូវក្រុមហ៊ុនវិនិយោគ UNION GROUP ដាក់ទុនវិនិយោគជាច្រើនលានដុល្លារ ដើម្បីអភិវឌ្ឍន៍ឲ្យក្លាយជារមណីយដ្ឋានធម្មជាតិដ៏ទំនើប និងមានភាពល្បីល្បាញនៅកម្ពុជា គួបផ្សំទៅនឹងការអភិវឌ្ឍច្រកសេដ្ឋកិច្ចដឹកជញ្ជូនខ្នាតអន្តរជាតិដ៏ធំភ្លាប់ទៅនឹងពិភពលោក។
លោកថោង ខុន រដ្ឋមន្ត្រីក្រសួងទេសចរណ៍ ធ្លាប់បានចាប់អារម្មណ៍ថា លោកគាំទ្រទៅលើគម្រោងអភិវឌ្ឍន៍ រមណីយដ្ឋានតំបន់ឆ្នេរតាមបែបទេសចរណ៍វិស្សមកាល ដែលកំពុងជំរុញល្បឿនយ៉ាងសកម្មដូចសព្វថ្ងៃនេះ។
លោករដ្ឋមន្ត្រីអះអាងថា “នេះជាគោលដៅទេសចរណ៍ ឬក៏ជាផលិតផលទេសចរណ៍ថ្មីមួយទៀត សម្រាប់ទាក់ទាញអ្នកទេសចរបរទេសនៅច្រករបៀងទិសខាងត្បូង ឲ្យកាន់តែមើលឃើញពីសក្តានុពលទេសចរណ៍របស់កម្ពុជា”។
ទន្ទឹមនឹងនេះលោកថោង ខុន រំពឹងថា នៅឆ្នាំ២០២០ អ្នកទេសចរចិននឹងចេញដើរលេងច្រើន ជាងអ្នកទេសចរនានាលើពិភពលោក។ ចំពោះកម្ពុជា ក៏បានយកចិត្តទុកដាក់ទៅលើអាទិភាព ទាក់ទាញអ្នកទេសចរចិនឲ្យបានច្រើន ក្រោមរូបភាពដាក់យុទ្ធសាស្ត្រជាច្រើន ដោយសហការជាមួយផ្នែកឯកជន ។
កាលពី១០ទៅ២០ឆ្នាំមុន តំបន់កោះសេ្តច គឺជាច្រកល្បីល្បាញឈ្មួញរកស៊ីនាំទំនិញគេចពន្ធ ពីលំហសមុទ្រចូលកម្ពុជាយ៉ាងសន្ធឹកសន្ធាប់ តែឥឡូវនេះ តំបន់កោះស្តេចកំពុងបោះជំហាន ទៅរកការអភិវឌ្ឍមួយមានតម្លាភាព។ តំបន់កោះស្តេចបច្ចុប្បន្ន កំពុងអភិវឌ្ឍន៍ក្នុងសភាពលាក់ខ្លួន ស្ទើរតែមានមនុស្សតិចណាស់ បានឃើញការអភិវឌ្ឍនៅទីនោះ ។ ទោះជាយ៉ាងណាក្តី ការអភិវឌ្ឍតំបន់កោះស្តេចបានលេចឮ ដល់កាសែតនៅអឺរ៉ឺប និងបានផ្សព្វផ្សាយពាសពេញពិភពលោករួចជាស្រេចទៅហើយ៕
