ដោយៈគង់ សូរិយា
ភ្នំពេញៈ ការសាងសង់អាកាសយានដ្ឋានអន្តរជាតិសៀមរាប-អង្គរ ដែលចាប់ផ្តើមសាងសង់កាលពីពាក់កណ្តាលខែមីនា ឆ្នាំ២០២០សម្រេចបាន៤៤ភាគរយហើយ
អាកាសយានដ្ឋានអន្តរជាតិថ្មីនេះ គ្រោងនឹងបើកដំណើរការនៅខែតុលា ឆ្នាំ ២០២៣។
អាកាសយានដ្ឋានអន្តរជាតិថ្មីខេត្តសៀមរាបសម្រេចបានវឌ្ឈន ភាពល្អប្រសើរ
អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីថ្ងៃទី១៥ ខែមីនា ឆ្នាំ ២០២០ ដោយក្រុមហ៊ុន Angkor International Airport Investment (Cambodia)Co.,Ltd(AIAI) លើផ្ទៃដី ៧០០,០៦ ហិកតា ក្រោមទុនវិនិយោគប្រមាណ៨៨០លានដុល្លារ។ អាកាសយានដ្ឋាននេះ មានសមត្ថភាពទទួលអ្នកដំណើរប្រចាំឆ្នាំរយៈពេលខ្លី-មធ្យម៧លាននាក់ក្នុង១ឆ្នាំ។
ក្នុងដំណាក់កាលទី១ ក្រុមហ៊ុនត្រូវចំណាយទុនជាង៥០០លានដុល្លារ និងរយៈពេលវែងទទួលបាន២០លាននាក់ក្នុង១ឆ្នាំ ដែលត្រូវចំណាយទុនជាង៣០០លានដុល្លារបន្ថែមទៀត។ សម្រាប់សមត្ថភាពទទួលទំនិញប្រចាំឆ្នាំវិញគឺក្នុងរយៈពេលខ្លី- មធ្យម១០,០០០ តោនក្នុង១ឆ្នាំ និងរយៈពេលវែង៦០,០០០តោន។
លោក ស៊ីន ចាន់សេរីវុត្ថា អ្នកនាំពាក្យនិងជាអនុរដ្ឋលេខាធិកាតរនៃរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ឲ្យដឹងកាលពីសប្តាហ៍នេះថា គិតត្រឹមដំណាច់ខែកញ្ញា ឆ្នាំ២០២២ ការសាងសង់អាកាសយានដ្ឋានសៀមរាប-អង្គរ សម្រេចបាន៤៤ភាគរយហើយ ហើយរំពឹងកើនឡើងដល់៧០ភាគរយនៅត្រឹមដំណាច់ឆ្នាំ ២០២២នេះ។ តាមគម្រោងអាកាសយានដ្ឋានអន្តរជាតិនេះ គ្រោងនឹងបញ្ចប់ការសាងសង់នៅថ្ងៃទី ៣០ ខែមីនា ឆ្នាំ ២០២៣ និងគ្រោងដាក់ឱ្យដំណើរការសាកល្បង លើកដំបូងនៅខែតុលា ឆ្នាំ ២០២៣ ប្រសិនបើពុំមានផលប៉ះពាល់អ្វីជាយថាហេតុកើតឡើង។
លោកបន្តថា “ការសាងសង់យឺតជាងផែនការបន្តិចបន្តួចនេះ បណ្តាលមកពីការរីករាលដាលជំងឺកូវីដ ១៩ ដែលធ្វើឱ្យរាំងស្ទះដល់ការធ្វើដំណើររបស់ក្រុមវិស្វករមកពីប្រទេសចិន ភាពយឺតយ៉ាវក្នុងការផ្គត់ផ្គង់សម្ភារបរិក្ខារសម្រាប់សាងសង់ និងតម្លៃដឹកជញ្ជូនកើនឡើងខ្ពស់ជាងពេលធម្មតា”។
យោងតាមការធ្វើបច្ចុប្បន្នភាពចុងក្រោយ ដោយ AIAI គឺការងារសាងសង់គម្រោងទាំងមូល គ្រោងនឹងបញ្ចប់នៅចុងខែមីនា ឆ្នាំ ២០២៣ និងគ្រោងដាក់ឱ្យដំណើរការសាកល្បងនៅក្នុងខែតុលា ឆ្នាំ ២០២៣។
បន្ទាប់ពីដំណាក់កាលទី១ ត្រូវបានបញ្ចប់ អាកាសយានដ្ឋានអន្តរជាតិសៀមរាប-អង្គរ នឹងមានសមត្ថភាពទទួលយន្តហោះ រហូតដល់កូដអឺ (Code E: A-340-300, A350-900 និង B777-200/300ER, B747-300/400) ចំនួន៣៨ចំណត ទទួលអ្នកដំណើរបាន៧លាននាក់ ក្នុងឆ្នាំ ២០២៣៕
