ដោយ៖ សុផារី
ភ្នំពេញ៖ ក្នុងរយៈពេល១០ខែ គ្រឹះស្ថានអង្គរ អាចរកចំណូលបានជាង៦លានដុល្លារ ពីទេសចរអន្តរជាតិប្រមាណ ១៦ម៉ឺននាក់ ដែលទិញសំបុត្រចូលទស្សនារមណីយដ្ឋានអង្គរ។
បើតាមសេចក្ដីប្រកាសព័ត៌មានរបស់គ្រឹះស្ថានអង្គរ គិតចាប់ពីខែមករា ដល់ខែតុលាឆ្នាំ២០២២ មានភ្ញៀវទេសចរចំនួន១៦៩.៣៤៩នាក់ បានទិញបណ្ណទស្សនានៅរមណីយដ្ឋានអង្គរ ដែលស្មើនឹង៦.៧៦១.៨០៣ដុល្លារ កើនជាង២ពាន់ភាគរយ។
ដោយឡែក ក្នុងខែតុលា គ្រឹះស្ថានអង្គរអាចរកចំណូលបាន១.៣៩៩.៦៧៤ដុល្លារ ពីទេសចរចំនួន៣៤.១៩៧នាក់ ដែលទិញសំបុត្រចូលទស្សនារមណីយដ្ឋានអង្គរ។ ចំណូលនេះកើនឡើងជិត៣ពាន់ភាគរយ ធៀបនឹងរយៈពេលដូចគ្នាក្នុងឆ្នាំ២០២១។
ក្រៅពីចំណូលនៅរមណីយដ្ឋានអង្គរ គ្រឹះស្ថានអង្គរក៏បង្ហាញចំណូល និងចំនួនទេសចរនៅប្រាសាទកោះកែរផងដែរ។ រយៈពេល១០ខែនេះ ប្រាសាទកោះកែរ រកចំណូលបាន៤៧.៤៩០ដុល្លារពីទេសចរ៣.១៦៦នាក់។
មុនពេលមានការរាតត្បាតនៃជំងឺកូវីដ-១៩ ឧទ្យានអង្គរទទួលបានភ្ញៀវទេសចរអន្តរជាតិរហូតដល់ ២,២លាននាក់ក្នុងឆ្នាំ២០១៩ ដែលរកចំណូលបាន៩៩លានដុល្លារពីការលក់សំបុត្រ៕
