ដោយ ដែន ចែងចាំង
ភ្នំពេញ៖ ក្រុមហ៊ុនវិនិយោគអាកាសយានដ្ឋានកម្ពុជា (SCA) បានប្រារព្វពិធីទទួលអ្នកដំណើរ១០លាននាក់ ដែលបានឆ្លងកាត់ព្រលានយន្តហោះអន្តរជាតិទាំងបី នៅកម្ពុជា។
ព្រលានយន្តហោះអន្តរជាតិទាំងបីរួមមាន ព្រលានយន្តហោះអន្តរជាតិភ្នំពេញ ព្រលានយន្តហោះអន្តរជាតិខេត្តសៀមរាប និងព្រលានយន្តហោះអន្តរជាតិកងកេង ខេត្តព្រះសីហនុ។
លោក ពេជ្រ សុប៉ុនតារា ប្រធានផ្នែកបង្កើនការហោះហើរ នៃក្រុមហ៊ុនអាកាសយានដ្ឋានកម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា ក្រុមហ៊ុនអាកាសយានដ្ឋានកម្ពុជា មានសេចក្តីរីករាយ ដោយសារអាកាសយានដ្ឋានទាំងបី បានទទួលអ្នកដំណើរកើនឡើងលើសការរំពឹងទុក។ អ្នកដំណើរឆ្លងកាត់ព្រលានយន្តហោះទាំងបីបានកើនពី៨លាននាក់កាលពីឆ្នាំមុន ដល់១០លាននាក់នៅឆ្នាំនេះ។
បច្ចុប្បន្នក្រុមហ៊ុនអាកាសយានដ្ឋានកម្ពុជា បាននិងកំពុងគ្រប់គ្រងព្រលានទាំងបីនេះ តែលោក ពេជ្រ សុប៉ុនតារា បានឲ្យដឹងថា ប្រសិនជារដ្ឋាភិបាលអនុញ្ញាតឲ្យក្រុមហ៊ុនវិនិយោគព្រលានយន្តហោះនៅបណ្តាខេត្តដទៃទៀត ក្រុមហ៊ុននឹងពិចារណាធ្វើរឿងនេះ ព្រោះក្រុមហ៊ុនមានទុន២០០០លានដុល្លារ ដើម្បីធ្វើការងារទាំងអស់នេះ។
លោកបន្តថា ក្រុមហ៊ុនធ្លាប់បានចុះសិក្សាពីសក្តានុពល នៅតាមបណ្តាខេត្តទូទាំងប្រទេស ដើម្បីរកឲ្យឃើញថាខេត្តណាដែលអាចវិនិយោគព្រលានយន្តហោះបាន។ ជាលទ្ធផលយើងបានរកឃើញខេត្តបី ដែលមានសក្តានុពលក្នុងការសាងសង់ព្រលានទយន្តហោះនៅខេត្តចំនួន៣ទៀត គឺខេត្តបាត់ដំបង ព្រះវិហារ និងខេត្តស្ទឹងត្រែង។
លោកបន្តថា “យើងបានផ្តល់អនុសាសន៍ឲ្យរដ្ឋាភិបាល សាងសង់ព្រលានទាំងបីនេះ ប៉ុន្តែរហូតមកទល់ពេលនេះមិនមានអ្វីវិវត្តន៍នៅឡើយទេ។
កាលពីឆ្នាំមុនកម្ពុជាទទួលបានភ្ញៀវទេសចរអន្តរជាតិចំនួន៥,៦លាននាក់ និងរំពឹងកើនដល់៦,១លាននាក់នៅឆ្នាំ២០១៨នេះ៕
