ដោយ៖ សុផារី
សៀមរាប៖ ក្នុងកំឡុងពេលកូវីដ១៩ មានសណ្ឋាគារ និងផ្ទះសំណាក់ប្រមាណជាច្រើននៅក្នុងខេត្តសៀមរាបបានបង្ខំចិត្តផ្អាក ឬបិទដំណើរការអាជីវកម្ម។ ប៉ុន្តែ ក្នុងរយៈពេលចុងក្រោយនេះ ការវិលត្រលប់នៃកំណើនភ្ញៀវទេសចរ បានកំពុងក្លាយជាក្តីសង្ឃឹម សម្រាប់អាជីវកម្មដែលពឹងផ្អែកលើវិស័យទេសចរណ៍ និងអាជីវកម្មបដិសណ្ឋារកិច្ច។
យោងតាមការចេញផ្សាយរបស់ក្រសួងទេសចរណ៍កាលពីចុងសប្តាហ៍មុន បានបញ្ជាក់ថា ភ្ញៀវទេសចរប្រមាណ១លាន៨សែននាក់ បានទៅទស្សនាកម្សាន្តនៅតាមតំបន់ទេសចរណ៍ក្នុងខេត្តសៀមរាប ដែលគិតចាប់ពីខែមករា មកដល់ខែតុលាឆ្នាំ២០២២ ហើយចំនួននេះបង្ហាញការកើនឡើងជិត៩០០ ភាគរយ ធៀបនឹងរយៈពេលដូចគ្នាកាលពីឆ្នាំ២០២១។
ក្នុងចំណោមទាំងនោះ មានប្រមាណ១លាន៦សែននាក់ជាភ្ញៀវទេសចរណ៍ក្នុងស្រុក និងប្រហែល១សែន៧ម៉ឺននាក់ជាភ្ញៀវទេសចរបរទេស ដែលចំនួននេះស្មើនឹងប្រហែល៧ភាគរយប៉ុណ្ណោះ ធៀបនឹងមុនពេលផ្ទុះឡើងនៃជំងឺកូវីដ១៩ ពោលគឺក្នុងឆ្នាំ២០១៩ ដែលនាពេលនោះខេត្តសៀមរាបទទួលបានភ្ញៀវទេសចរបរទេសប្រហែល២លាន២សែននាក់។
បច្ចុប្បន្ន ជើងហោះហើរពីបរទេសចូលខេត្តសៀមរាបមានចន្លោះពី១៥ ទៅ១៦ជើង ដោយបានដឹកជញ្ជូនភ្ញៀវទេសចរមកជាមួយចន្លោះពី១.៣០០ នាក់ទៅ១.៤០០នាក់ក្នុងមួយថ្ងៃ។
ការងើបឡើងវិញនៃចំនួនភ្ញៀវទេសចរនឹងរួមចំណែកដ៍សំខាន់ដល់ទីផ្សារអចលនទ្រព្យជាពិសេសជួយបង្កើនតម្រូវការជួលទីតាំងធ្វើអាជីវកម្ម និងកន្លែងស្នាក់នៅ។
អ្នកនាង កែវ ណាលីន ប្រធានផ្នែកទីផ្សារនៃសណ្ឋាគារមួយនៅក្នុងខេត្តសៀមរាប បានបញ្ជាក់ប្រាប់ Property Area នៅថ្ងៃទី០៦ ខែធ្នូថា មួយរយៈចុងក្រោយនេះ ខេត្តសៀមរាបមានកំណើនទេសចរជាតិ និងអន្តរជាតិច្រើនជាងមុនប្លែក ដោយនេះជាសញ្ញាល្អប្រសើរ ក្នុងការឈានទៅស្តារទីផ្សារទេសចរណ៍ និងអាជីវកម្មដែលពឹងផ្អែកលើទេសចរណ៍។
អ្នកនាងបញ្ជាក់ថា “ភ្ញៀវមកកំសាន្តច្រើន វាក៏ជាក្តីសង្ឃឹមមួយនៃវិស័យទេសចរណ៍ ដែលអាចស្តារឡើងវិញនូវសក្តានុពល ក៏ដូចជាជួយបង្កើនផ្នែកសេវាកម្មនានាផងដែរ”។
លោក ឃឹម ហ្វីណង់ អភិបាលរងខេត្តសៀមរាបបានលើកឡើងក្នុងពិធីបើកកម្មវិធី “ហាត់ការវិជ្ជាជីវៈតាមអាជីវកម្មសណ្ឋាគារ និងភោជនីយដ្ឋាន លើជំនាញការិយាល័យជួរមុខ គេហកិច្ច ម្ហូបអាហារ និងភេសជ្ជៈ”នៅនឹងថ្ងៃទី១ ខែធ្នូ ឆ្នាំ២០២២ថា ដោយមានការយកចិត្តទុកដាក់ និងមានការគាំទ្រពីក្រសួង ស្ថាប័នពាក់ព័ន្ធនានា ព្រមទាំងមានកិច្ចសហប្រតិបត្តិការល្អជាមួយផ្នែកឯកជន និងដៃគូអភិវឌ្ឍន៍ ប្រជាពលរដ្ឋនៅក្នុងខេត្តផ្ទាល់ ពីភ្ញៀវទេសចរជាតិ-អន្តរជាតិ បានធ្វើឱ្យវិស័យទេសចរណ៍ខេត្តសៀមរាប មានការអភិវឌ្ឍរីកចម្រើនពីមួយឆ្នាំទៅមួយឆ្នាំ។
លោកលើកឡើងថា ទន្ទឹមនឹងការងើបឡើងវិញជាបណ្តើរៗ នៃវិស័យទេសចរណ៍សម្រាប់ខេត្តសៀមរាបនេះគឺទាមទារឱ្យមានការបណ្តុះបណ្តាលនូវសមត្ថភាពជំនាញដល់បុគ្គលិក ដែលកំពុងបម្រើការក្នុងវិស័យទេសចរណ៍ ដែលជាមូលដ្ឋានយុទ្ធសាស្ត្រនៃការពង្រឹងគុណភាពសេវាកម្ម និងការផ្តល់សេវាប្រកបដោយសេចក្តីពេញចិត្តដល់ភ្ញៀវទេសចរ៕