ដោយស៊ីវ ម៉េង
ភ្នំពេញ: វិស័យឯកជនផ្នែកវិស័យទេសចរណ៍ បានសម្តែងការស្វាគមន៍ចំពោះការលើកឡើងរបស់ រដ្ឋមន្រ្តីទេសចរណ៍លោកបណ្ឌិតថោង ខុន ដែលបានអះអាងថាក្រសួងនឹងធ្វើការជាមួយស្ថាប័នពាក់ព័ន្ឋ ដើម្បីកាត់បន្ថយនិតិវិធីនានា ដើម្បីសម្រួលឲ្យភ្ញៀវទេសចរណ៍អន្តរជាតិបើករថយន្តធ្វើដំណើរចូលមកលេងកំសាន្តបាននៅកម្ពុជា។
លោកជំទាវឧកញ៉ាឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២១ ធ្នូកន្លងមកថា ការសម្រួលនិតិវិធី ដើម្បីឲ្យភ្ញៀវទេសចរណ៍អន្តរជាតិ អាចបើករថយន្តខ្លួនឯងចូលមកទស្សនាកម្ពុជាចាប់ពីឆ្នាំ២០១៩ខាងមុខនេះ ពិតជារឿងល្អមែនទែន ព្រោះកម្ពុជានឹងទទួលបានភ្ញៀវទេសចរណ៍បែបនេះកាន់តែច្រើន។
លោកជំទាវបន្តថា “ភ្ញៀវទេសចរណ៍មកពីប្រទេសចិន ថៃ វៀតណាមចូលចិត្តបើករថយន្តធ្វើដំណើរទេសចរណ៍ច្រើន ហើយយើងនឹងទាក់ទាញបានភ្ញៀវប្រភេទនេះច្រើន”។
លោកជំទាវបានបន្តថា “នៅប្រទេសជិតខាងកម្ពុជា ដូចជាប្រទេសថៃ វៀតណាមគេបានអនុញ្ញាត្តឲ្យទេសចរណ៍បរទេស បើករថយន្តចូលទស្សនាប្រទេសរបស់គេជាយូរមកហើយ”។
ការអនុញ្ញាត្តឲ្យមានការធ្វើដំណើរឆ្លងកាត់ពីប្រទេសមួយ ទៅប្រទេសមួយនេះជាការសម្រេចចិត្តរបស់ថ្នាក់ដឹកនាំកំពូលអាស៊ាន តាមរយៈការធ្វើសមាហរណកម្មសហគមន៍សេដ្ឋកិច្ចអាស៊ានកាលពីចុងឆ្នាំ២០១៥។
-->
ជាមួយគ្នានេះលោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកបានសម្តែងក្តីរំភើបរីករាយ នៅពេលបានទទួលដំណឹងនេះ ដោយលោកបានអះអាងថាលោកបានចូលរួមតស៊ូមតិលើបញ្ហានេះរយៈពេលជាង១០ឆ្នាំមកហើយ។ លោកបន្តថា ការអនុញ្ញាត្តបែបនេះធ្វើឲ្យប្រជាពលរដ្ឋបានចំណូលផ្ទាល់កាន់តែច្រើន និងបានទទួលផលចំណូលជាតិកើនឡើងផងដែរ។ ពីមុនមកក៏មានការអនុវត្តន៍បែបនេះនៅកម្ពុជាដែរ ប៉ុន្តែមាននិតិវិធីស្មុគ្រស្មាញជាច្រើន ដែលធ្វើឲ្យយើងឈឺក្បាល ប៉ុន្តែការចេញនូវសេចក្តីសម្រេចថ្មីនេះ លោករំពឹងថា និតិវិធីនឹងត្រូវកាត់បន្ថយ។
លោកបន្តថា “បើបើករថយន្តចូលទស្សនាប្រទេសថៃឆ្លងព្រំដែន កន្លែងខ្លះមិនចាំបាច់ចំណាយ តែកន្លែងខ្លះចំណាយប្រមាណពី១០០ទៅ២០០បាតប៉ុណ្ណោះ ហើយគយរបស់ថៃបានជួយសម្រួលយ៉ាងប្រសើរ”។
លោកបន្តថា “ការអាចបើករថយន្តចូលទ ស្សនាប្រទេសណាមួយ ធ្វើឲ្យភ្ញៀវមានក្តីសុខផ្នែកផ្លូវអារម្មណ៍ច្រើន និងពួកគេចំណាយលុយច្រើនដោយមិនដឹងខ្លួន”។
ទោះជាយ៉ាងណាលោកបារម្ភពីបញ្ហាចរាចរណ៍នៅកម្ពុជា ដោយសារអ្នកបើកបរនៅកម្ពុជាមិនសូវគោរពច្បាប់ និងកត្តាយានយន្តមិនគ្រប់លក្ខណៈបច្ចេកទេស ដែលធ្វើឲ្យមានបញ្ហាតាមដងផ្លូវច្រើន ប៉ុន្តែលោកសង្ឃឹមថា ប្រជាពលរដ្ឋកម្ពុជានឹងផ្លាស់ប្តូរឥរិយាបទជាបន្តបន្ទាប់។
ទោះជាយ៉ាងណាគេហទំព័រPropertyarea.asiaមិនអាចទាក់ទងសុំការអត្ថាធិប្បាយពីលោករដ្ឋមន្រ្តីក្រសួងទេសចរណ៍ថា ការអនុញ្ញាត្តឲ្យភ្ញៀវទេសចរណ៍បរទេសចូលមកទស្សនាកម្ពុជាបានពិតប្រាកដនៅកំឡុងខែណា នៃឆ្នាំ២០១៩ និងនិតិវីធី សម្រួលយ៉ាងដូចម្តេចនៅឡើយទេ៕
