ដោយៈ សុខុម
អន្តរជាតិ: នាវាមុជទឹកខ្នាតយក្សតម្លៃ២ពាន់លានដុល្លារ របស់សហរដ្ឋអាមេរិក ដែលមានឈ្មោះថា USS Hartford បានផុសងើបឡើងជ្រែកបំបែកផ្ទាំងទឹកកកយ៉ាងក្រាស់ កក្រើកប្រថពីនៅមហាសមុទ្រអាក់ទិក (Arctic Ocean) កាលពីពេលថ្មីៗនេះ។
យោងតាមវីដេអូបង្ហោះលើគណនីហ្វេសប៊ុកឈ្មោះ Supercar Blondie របស់ស្ត្រីអ្នក Review កំពូលរថយន្តដ៏ល្បីល្បាញ កាលពីថ្ងៃទី២៥ ខែវិច្ឆិកា បង្ហាញថា នាវាមុជទឹកនេះខ្នាតយក្សនេះ មានប្រវែងប្រមាណ១១០ម៉ែត្រ និងមានទម្ងន់ប្រមាណ១៦.៥០០តោន ដែលស្មើនឹងទម្ងន់ត្រីបាឡែនខៀវ (Blue Whale) រហូតដល់ទៅ១១០ក្បាល។
នៅពេលខ្នងនាវាមុជទឹកនេះ ងើបផុតពីផ្ទៃទឹកកក ខណៈតួខ្លួនរបស់ទាំងមូលស្ថិតនៅក្រោមផ្ទៃទឹកកក ទាហានមួយក្រុមតូចបាននាំគ្នាចេញមក ដោយយកចបរុញផ្ទាំងទឹកកកចេញពីលើខ្នងនាវា។
តាមពិតនេះជាប្រតិបត្តិការមួយ ដែលត្រូវបានដឹកនាំដោយ ICEX ក្នុងឆ្នាំ២០២២។ ICEX គឺជាសមយុទ្ធយោធាជើងទឹកអាមេរិក ដែលធ្វើឡើងក្នុងគោលបំណងអនុវត្តន៍ បាញ់សព្វាវុធចម្ងាយឆ្ងាយ នៅមហាសមុទ្រអាក់ទិក ព្រមទាំងអនុវត្តគេចខ្លួនពីនាវាមុជទឹករបស់សត្រូវ នៅក្នុងសមុទ្រដែលកកទៅជាទឹកកកផងដែរ។
ពួកទាហានបានប្រើរណារយន្តកាត់ផ្ទាំងទឹកកកយ៉ាងក្រាស់ ដើម្បីឱ្យទាហានដទៃផ្សេងទៀត អាចបើកទា្វរចេញមកក្រៅ។វគ្គបន្ទាប់នៃបេសកកម្មនេះ គឺតម្រូវឱ្យអ្នកមុជទឹកហែលក្រោមផ្ទាំងទឹកកក ចូលទៅក្នុងទឹកដ៏សែនត្រជាក់។
គោលបំណងរបស់ពួកគេ គឺដើម្បីស្វែងរកសព្វាវុធដែលបាញ់ចេញពីនាវាមុជទឹករបស់សត្រូវ។ សព្វាវុធសត្រូវដែលត្រូវបានរកឃើញ ផ្ទុកនូវទិន្នន័យដ៏មានសារៈប្រយោជន៍សម្រាប់កងទ័ពជើងទឹក៕ Supercar Blondie៕
