រដ្ឋាភិបាលផ្លាស់ប្ដូរដីទំហំជាង៦ពាន់ហិកតាក្នុងឧទ្យានជាតិបុទុមសាគរដល់ក្រុមហ៊ុនមួយធ្វើការវិនិយោគ

ដោយៈសុផារី

កោះកុង: រាជរដ្ឋាភិបាល បានយល់ព្រមជាគោលការណ៍ផ្លាស់ប្ដូរទីតាំងដីទំហំ៦.២៣៤ហិកតា ស្ថិតនៅក្នុងឧទ្យានជាតិបុទុមសាគរ ខេត្តកោះកុង ផ្តល់អោយក្រុមហ៊ុន កោះកុង រ៉ាប់ប៊ើរ ផ្លេនថេសិន ដើម្បីធ្វើការវិនិយោគ ស្របតាមនីតិវិធីច្បាប់ជាធរមាន។

យោងតាមការសេចក្តីប្រកាសព័ត៌មាន របស់រដ្ឋបាលខេត្តកោះកុង នៅថ្ងៃទី៦ ធ្នូកន្លងមកនេះបានឲ្យដឹងថា  លោកអន សុធារិទ្ធ អភិបាលរង នៃគណៈអភិបាលខេត្តកោះកុង បានដឹកនាំក្រុមការងារខេត្ត ចូលរួមជាមួយប្រតិភូក្រសួងបរិស្ថាន ដឹកនាំដោយលោក រ័ត្ន វីរៈ រដ្ឋលេខាធិការក្រសួងបរិ​ស្ថានបានចុះពិនិត្យ និងសម្របសម្រួលដោះស្រាយផលប៉ះពាល់លើទីតាំងវិនិយោគរបស់ក្រុមហ៊ុន កោះកុង រ៉ាប់ប៊ើ ផ្លេនថេសិន ស្ថិតនៅក្នុងឧទ្យានជាតិបុទុមសាគរ កាលពីថ្ងៃទី១៦ ខែធ្នូនេះ។