ដោយគង់ សូរិយា
ភ្នំពេញ៖ ស្របពេលបុណ្យឆ្លងឆ្នាំបានចូលមកដល់ ប្រធានមន្ទីរទេសចរណ៍ខេត្តព្រញះសីហនុបានផ្ញើរសារកក់ក្តៅដល់ប្រជាពលរដ្ឋ ដើម្បីឲ្យប្រជាពលរដ្ឋទៅទស្សនានិងសំរាកលំហែរនៅខេត្តជាប់មាត់សមុទ្រដ៏ស្រស់ស្អាតនេះ។
ប្រធានមន្ទីរទេសចរណ៍ផ្ញើរសារកក់ក្តៅឲ្យប្រជាពលរដ្ឋទៅលេងកំសាន្តបុណ្យឆ្លងឆ្នាំនៅក្រុងព្រះសីហនុ
លោកតាំង សុចិត្រគ្រឹះស្នាប្រធានមន្ទីរទេសចរណ៍ខេត្តព្រះសីហនុបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣១ ធ្នូនេះថា កន្លងមកខេត្តមានបញ្ហាប្រឈមមួយចំនួន ប៉ុន្តែបច្ចុប្បន្នអាជ្ញាធរខេត្តបានធ្វើការយ៉ាងសកម្ម ដើម្បីដោះស្រាយបញ្ហានេះហើយ ដូចជា បញ្ហាបរិស្ថានត្រូវបានយកចិត្តទុកដាក់ ហេដ្ឋារចនាសម្ព័ន្ឋត្រូវបានជួសជុលជិតបញ្ចប់ហើយ និងបញ្ហាសន្តិសុខសណ្តាប់ធ្នាប់ដែលជាបញ្ហាតិចតួច ត្រូវបានពង្រឹងកាន់តែល្អប្រសើរផងដែរ។
លោកបន្តថា “សូមប្រជាពលរដ្ឋកុំជឿតាមគ្នា ប៉ុន្តែត្រូវមកមើលសិនដើម្បីដឹងការពិតថាអ្វីៗមិនដូចពាក្យចចាមអារ៉ាម និងការលើកឡើងមួយចំនួននោះទេ។លោកបន្តថា “អ្នកវិនិយោគចិនធំៗ គេមកបោះទុនវិនិយោគវាចំណេញដល់មុខមាត់ ដល់ប្រទេសយើងខ្លាំងណាស់នៅពេលអនាគត ហើយអ្នកបង្កបញ្ហាមិនមែនពួកគេទេ គឺអ្នកមកធ្វើការងារក្នុងវិស័យនេះ តែបញ្ហាត្រូវបានដោះស្រាយហើយ។
លោកតាំង សុចិត្រគ្រឹះស្នាបានមានប្រសាសន៍ឲ្យដឹងទៀតថា ជាមួយនឹងការអបអរសាទរ សម្រាប់ការឆ្លងឆ្នាំសាកលឆ្នាំ២០១៨ ឈាននៅឆ្នាំ២០១៩ខាងមុខនេះ ចំនួនបន្ទប់សណ្ឋាគារពេញជិតអស់ហើយ តែបន្ទប់ផ្ទះសំណាក់នៅសល់ចន្លោះពី៣០ទៅ៥០ភាគរយ។ លោកបន្តថា យើងរំពឹងភ្ញៀវទេសចរណ៍កើនឡើងវិញ ដោយសារខេត្តបានរៀបចំពិព៌ណ និងប្រគុំតន្ត្រី ល្បែងប្រជាប្រិយមួយចំនួននៅឆ្នេរអូរឈើទាល និងមានការបោះតង់ ភ្នក់ភ្លើង និងការតន្ត្រីសម្រាប់ភ្ញៀវទេសចរណ៍ជាតិ អន្តរជាតិរាំលេងកំសាន្តនៅ ឆ្នេរអូរត្រេះផងដែរ៕
