ដោយៈ សុខុម
ប៉េកាំងៈ បន្ទាប់ពីអនុវត្តគោលនយោបាយសូន្យ-កូវីដ យ៉ាងតឹងរ៉ឹងជិត៣ឆ្នាំ ទីបំផុតប្រទេសចិន បានបើកព្រំដែនឡើងវិញ គួរឱ្យអបអរសាទរកាលពីថ្ងៃអាទិត្យ ទី៨ ខែមករា ដោយនាំមកនូវក្ដីសង្ឃឹមខ្ពស់ សម្រាប់សេដ្ឋកិច្ចពិភពលោកក្នុងឆ្នាំ២០២៣ ជាពិសេសក្នុងតំបន់អាស៊ាន រួមទាំងកម្ពុជា ដែលទន្ទឹងរង់ចាំស្វាគមន៍ទេសចរចិន យ៉ាងកក់ក្ដៅ។
ខាងក្រោមនេះ ជាអត្ថប្រយោជន៍ធំៗទាំង៥ នៃការបើកប្រទេសចិន ឡើងវិញ ដែលអ្នកជំនាញមើលឃើញថា អាចជួយស្រោចស្រង់សេដ្ឋកិច្ចពិភពលោកនៅក្នុងឆ្នាំ២០២៣។
*អត្ថប្រយោជន៍ទី១
ទោះបីជាមានការរអាក់រអួលខ្លះៗ រយៈពេលខ្លីដោយសារកង្វះបុគ្គលិកក្ដី ក៏ការបញ្ចប់វិធានការរឹតបន្តឹង នឹងជួយដោះស្រាយជាបណ្ដើរៗ នូវបញ្ហាជាប់គាំងក្នុងខ្សែសង្វាក់ផ្គត់ផ្គង់ ដែលបានបណ្ដាលឱ្យមានការពន្យារពេលយូរសម្រាប់ការផលិត នូវផលិតផលសំខាន់ៗ រាប់ចាប់ពីរថយន្តរហូតដល់ទូរស័ព្ទ iPhone ដោយជួយបន្ធូរសម្ពាធអតិផរណា។
*អត្ថប្រយោជន៍ទី២
ការទទួលបានពីការបន្តធ្វើដំណើរទៅ និងមកប្រទេសចិន។ ខុសពីរំហូរទំនិញ និងមូលធនដែលនៅតែរឹងមាំ ទោះបីជាស្ថិតនៅក្រោមគោលនយោបាយសូន្យ-កូវីដយ៉ាងណាក្ដី ការធ្វើដំណើរចេញ និងចូលប្រទេសចិន ត្រូវបានកាត់បន្ថយ ដោយធ្លាក់ចុះរហូតដល់ទៅ៧៩% សម្រាប់ពលរដ្ឋមកពីចិនដីគោក (ចិនប៉េកាំង) និង៩៥% សម្រាប់ជនបរទេសក្នុងឆ្នាំ២០២១ បើធៀបនឹងកម្រិតក្នុងឆ្នាំ២០១៩។
ការបន្ធូរបន្ថយវិធានការរឹតបន្តឹង លើការធ្វើដំណើរឆ្លងដែនបានជួយជំរុញប្រតិបត្តិការ និងការវិនិយោគរបស់ពហុជាតិសាសន៍។ បណ្ដានាយកប្រតិបត្តិ នឹងបន្តការធ្វើដំណើរទៅមក រវាងការិយាល័យកណ្តាល និងប្រទេសចិន ហើយវានឹងជួយសម្រួលដល់កិច្ចព្រមព្រៀង និងគម្រោងថ្មីៗ។
ទន្ទឹមនឹងនេះដែរ បណ្ដាសហគ្រិនចិន នឹងចាប់ផ្តើមដំណើរកម្សាន្តដែលត្រូវបានពន្យារពេលយូរមកហើយ ដើម្បីស្វែងរកឱកាសនៅក្នុងទីផ្សារក្រៅប្រទេស។
ស្ថានភាពល្អប្រសើរ ក៏នឹងជួយឱ្យក្រុមហ៊ុននានា ដែលមានមូលដ្ឋាននៅប្រទេសចិន ទាក់ទាញ និងរក្សាទុកអ្នកមានទេពកោសល្យពីបរទេសផងដែរ។ កាលពីខែមករា ឆ្នាំ២០២២ មានជនបរទេសរហូតដល់ទៅប្រមាណ១០០.០០០នាក់ គ្រាន់តែរង់ចាំវិលត្រលប់ទៅក្រុងសៀងហៃ។
*អត្ថប្រយោជន៍ទី៣
ការបើកប្រទេសចិន ឡើងវិញនេះនឹងធ្វើឱ្យអតិថិជន ប្រើប្រាស់ចិន មានសកម្មភាពកម្រើកឡើងវិញភ្លាមៗ។
ទំនុកចិត្តរបស់អតិថិជនប្រើប្រាស់ បានធ្លាក់ចុះដល់កម្រិតទាបបំផុតក្នុងឆ្នាំ២០២២ ប៉ុន្តែវាបានកើនឡើងវិញយ៉ាងខ្លាំងរួចទៅហើយ ចាប់តាំងពីចិន បើកប្រទេសឡើងវិញ ដែលធ្វើឱ្យអតិថិជនប្រើប្រាស់ជនជាតិចិន មានទំនុកចិត្តបំផុតក្នុងពិភពលោក។ នេះបើយោងតាមការស្ទង់មតិចុងក្រោយដោយក្រុមហ៊ុនស្រាវជ្រាវទីផ្សារ និងពិគ្រោះយោបល់ពហុជាតិសាស្ត្រ Ipsos។
នេះក៏មានឱកាស ដែលសេដ្ឋកិច្ចស្ទុះងើបឡើងខ្លាំងផងដែរ ក្នុងឆ្នាំ២០២៣ ខណៈប្រជាជនចិន វណ្ណៈកណ្តាលចំណាយយ៉ាងច្រើនសន្ធឹកសន្ធាប់។ អតិថិជនប្រើប្រាស់ជនជាតិចិន មិនទទួលបានមូលប្បទានបត្រពីរដ្ឋាភិបាលដូចនៅលោកខាងលិចនោះទេ ប៉ុន្តែពួកគេបានរក្សាទុកសាច់ប្រាក់អំឡុងពេលវិបត្តិកូវីដ-១៩។
ប្រាក់ចំណូលបន្ទាប់បន្សំ សម្រាប់មនុស្សម្នាក់បានកើនឡើង៥,៣%ក្នុងរយៈពេល៩ខែដើមឆ្នាំ២០២២ ខណៈប្រាក់សន្សំក្នុងស្រុករបស់ពលរដ្ឋចិន បានកើនឡើង១៦,៧% ដល់កម្រិតខ្ពស់បំផុត មិនធ្លាប់មានឈានដល់១៧ទ្រីលានដុល្លារអាមេរិក គិតត្រឹមខែវិច្ឆិកា ឆ្នាំ២០២២។
ទន្ទឹមនឹងការកើនឡើង ការចំណាយលើការនាំចូល ការបើកប្រទេសចិន ឡើងវិញពិតជាផ្ដល់ផលចំណេញយ៉ាងធំធេង ដល់វិស័យទេសចរណ៍ពិភពលោក ដែលគ្របដណ្ដប់ជាង១០% នៃផលទុនជាតិសរុប (GDP) របស់ពិភពលោក។
មុនពេលផ្ទុះវិបត្តិកូវីដ-១៩ ភ្ញៀវទេសចរចិន បានគ្របដណ្ដប់ជិត២០% នៃការចំណាយទេសចរណ៍អន្តរជាតិ ឬ២៥៥ពាន់លានដុល្លារអាមេរិក ក្នុងឆ្នាំ២០១៩។ អវត្តមានភ្ញៀវទេសចរជនជាតិចិន បានបង្កផលប៉ះពាល់យ៉ាងខ្លាំង ប៉ុន្តែសញ្ញាដំបូងបង្ហាញថា ពួកគេនឹងធ្វើដំណើរកម្សាន្តឡើងវិញឆាប់ៗ។
ការស្វែងរកគោលដៅទេសចរណ៍ ក្រៅប្រទេសកំពូលៗនៅលើ Platform ទេសចរណ៍ Ctrip បានកើនឡើងស្រឺតៗ ក្នុងរយៈពេល៣០នាទីក្រោយការប្រកាសបន្ធូរបន្ថយវិធានធ្វើចត្តាឡីស័ក។
គោលដៅទេសចរណ៍ជិតៗ ដែលនឹងទទួលបានផលពីការចំណាយរបស់ជនជាតិចិន មានដូចជាហុងកុង និងប្រទេសថៃ ដែលការការចំណាយបន្ថែមរបស់ពួកគេ លើដំណើរទេសចរណ៍អាចជំរុញឱ្យ GDP កើនឡើង៦%នៅហុងកុង និង៣%នៅប្រទេសថៃ។ នេះបើយោងតាមការប៉ាន់នប្រមាណដោយធនាគារ Goldman Sachs។
*អត្ថប្រយោជន៍ទី៤
វិស័យដែលទាក់ទង នឹងការធ្វើដំណើរដូចជាអាកាសចរណ៍ សណ្ឋាគារ និងការលក់រាយជាដើម ក៏នឹងទទួលបានអត្ថប្រយោជន៍ ពីការបើកប្រទេសចិនឡើងវិញដែរ។
*អត្ថប្រយោជន៍ទី៥
អត្ថប្រយោជន៍ចុងក្រោយ នៃការបើកប្រទេសចិន ឡើងវិញគឺសម្រាប់ជំរុញកំណើនសេដ្ឋកិច្ចពិភពលោក ក្នុងរយៈពេលវែង៕ South China Morning Post៕
