ដោយគង់ សូរិយា
សៀមរាបៈ រដ្ឋាភិបាលកម្ពុជាទទួលបានចំណូល១១៦,៦៤លានដុល្លារអាមេរិក ក្នុងឆ្នាំ២០១៨កើនឡើង៨ភាគរយ ពីការលក់បណ្ណឲ្យភ្ញៀវបរទេសចូលទស្សនារមណីយដ្ឋានអង្គរ។
យោងតាមរបាយការណ៍ផ្លូវការរបស់គ្រឹះស្ថានអង្គរ ដែលបានចេញនៅព្រឹកថ្ងៃទី១ ខែមករា ឆ្នាំ២០១៩នេះបានឲ្យដឹងថា នៅឆ្នាំ២០១៨ មានភ្ញៀវបរទេសចំនួន២,៥៩០,៨១៥នាក់ បានចូលទស្សនារមណីយដ្ឋានអង្គរកើនឡើង៥.៤៥ភាគរយ។របាយការណ៍ដដែលបានឲ្យដឹងថា ចំណូលជាង១១៦លានដុល្លារ ដែលបានពីការលក់បណ្ណចូលទស្សនាតំបន់អង្គរនេះ រាជរដ្ឋាភិបាលបានដកចំនួន៥,១៨១,៦៣០លានដុល្លារសម្រាប់ឧបត្ថម្ភដល់មន្ទីរពេទ្យគន្ធបុប្ផា ដើម្បីជួយទ្រទ្រង់ដំណើរការមន្ទីរពេទ្យនេះ បន្តជួយសង្គ្រោះជីវិតកុមារកម្ពុជា។
ប្រាសាទអង្គរត្រូវបានគេហទំព័រTrip Advisorបោះឆ្នោតជាប់ជាប្រាសាទដែលមានភាពអស្ចារ្យជាងគេ និងជាសំណង់ប្រាសាទធំជាងគេ និងជាប់ចំណាត់ថ្នាក់លេខ១ តាមរយៈការបោះឆ្នោតពីអ្នកធ្វើដំណើរទេសចរណ៍ ទូទាំងពិភពលោកកាលពីឆ្នាំ២០១៧ និងឆ្នាំ២០១៨នេះ៕
