ដោយ : វុត្ថា
ភ្នំពេញ : បន្ទាប់ពីទទួលបានជោគជោគជ័យ ក្នុងការរៀបចំព្រឹត្តិការណ៍ឆ្លងឆ្នាំសកល ២០១៨-២០១៩ និងពិពណពាណិជ្ជកម្មកាលពីកន្លងទៅថ្មីៗនេះ រដ្ឋបាលខេត្តព្រះសីហនុ បាន និងកំពុងត្រៀមរៀបចំព្រឹត្តិការណ៍ក្នុងខេត្ត ដែលជាតំបន់ទេសចរណ៍នៅជាប់សមុទ្រមួយនេះឲ្យកាន់តែល្អប្រសើរ និងកម្មវិធីផ្សេងទៀតឪ្យបានច្រើន ដើម្បីទទួលស្វាគមន៍ បងប្អូនភ្ញៀវទេសចរជាតិ និងអន្តរជាតិដែលមានបំណងទៅលេងកម្សាន្ត ក្នុងឪកាស ពិធីបុណ្យធំៗនាពេលខាង មុខបន្តទៀត ។
នៅក្នុងទំព័រហ្វេសបុកផ្លូវការបស់រដ្ឋបាលខេត្តព្រះសីហនុ បានសរសេរថា “អោយតែបងប្អូនភ្ញៀវទេសចរបានគាំទ្រការៀបចំរបស់អាជ្ញាធរច្រើនបែបនេះ នាឱកាសបុណ្យធំៗប្រចាំឆ្នាំខាងមុខ យើងនឹងជួបគ្នាទៀត ជាមួយនឹងកម្មវិធីបន្ថែមសប្បាយជូនភ្ញៀវទេសចរទាំងអស់”។
នៅក្នុងព្រឹត្តិការណ៍ឆ្លងឆ្នាំសកល ២០១៨-២០១៩កន្លងទៅនេះ រដ្ឋបាលខេត្តព្រះសីហនុបានរៀបចំព្រឹត្តិការណ៍ឆ្លងឆ្នាំសកល២០១៨-២០១៩ ដើម្បីបង្កើតការសប្បាយរីក រាយបំរើអារម្មណ៍កម្សាន្តដល់ភ្ញៀវទេសចរជាតិ អន្តរជាតិ ដោយក្នុងនោះរដ្ឋបាលខេត្តបានរៀបចំការប្រគុំដន្ត្រី និងបានរៀបចំតង់ស្នាក់នៅចំនួន៣០០ នៅចុងឆ្នេរអូរឈើទាល (ឆ្នេរអារីស្តុន) ក្រៅពីបន្ទប់សណ្ឋាគារ និងផ្ទះសំណាក់សម្រាប់ស្នាក់នៅជិត៩.០០០បន្ទប់។
លោក យន្ត មីន អភិបាលខេត្តព្រះសីហនុបានឲ្យដឹងថា ព្រឹត្តិការណ៍ទេសចរណ៍សប្បាយក្នុងឱកាសឆ្លងឆ្នាំសកល និងបង្ហាញភាពជាដៃគូរចូលរួមផ្សព្វផ្សាយសក្តានុពលទេសចរណ៍ និងរួមចំណែកអភិវឌ្ឍខេត្ត មានភាពរីកចម្រើនធ្វើឱ្យជីវភាព រស់នៅរបស់ប្រជាពលរដ្ឋមានភាពធូរធារថែមទៀត។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ក្នុងព្រឹត្តិកាណ៍ឆ្លងឆ្នាំសកល២០១៩កន្លងទៅនេះ ខេត្តទទួលបានភ្ញៀវចំនួនជាង២២ម៉ឺននាក់ កើនឡើង១២ភាគរយ ប៉ុន្តែបើគិតតែភ្ញៀវទេសចរក្នុងស្រុកគឺថយចុះ១៨ភាគរយ ធៀបរយៈពេលដូចចគ្នាកាលពីឆ្នាំមុន។
