ដោយៈ សុខុម
ប៉េកាំង: លោក Ma Yansong ដែលជាស្ថាបត្យករមួយរូបក្នុងចំណោមស្ថាបត្យករ ល្បីល្បាញបំផុតនៅប្រទេសចិន បានបញ្ចេញប្លង់ឌី ហ្សាញដ៏គួរឱ្យទាក់ទាញរបស់ក្រុមហ៊ុនលោក សម្រាប់ស្ថានីយអាកាសយានដ្ឋានថ្មីដ៏ធំមួយ នៅទីក្រុងChangchun ភាគឦសាននៃខេត្ត Jilin ប្រទេសចិន។
ដោយមានរចនាបថប្លែកអស្ចារ្យ ដែលមើលពីលើឃើញដូច “រោមបក្សីអណ្ដែត” និងមើលឱ្យជិតឃើញរាងដូច“ផ្លិត” ប្លង់ឌីហ្សាញស្ថានីយអាកាសយានដ្ឋាននេះ ត្រូវបានលាតត្រដាងកាលពីថ្ងៃអង្គារ ដើមសប្ដាហ៍នេះ បន្ទាប់ពីក្រុមហ៊ុនស្ថាបត្យកម្មMAD Architects របស់លោក Ma Yansong ដែលមានមូលដ្ឋាននៅទីក្រុងប៉េកាំង បានឈ្នះការប្រកួតប្រជែងជាអន្តរជាតិ ដើម្បីដណ្ដើមគ្រប់គ្រងគម្រោងពង្រីក អាកាសយាន ដ្ឋានអន្តរជាតិ Longjia International Airport នៅក្រុង Changchun ។
ដោយលាតសន្ធឹងរហូត ដល់ទៅជិត២៧០.០០០ម៉ែត្រការ៉េ អគារស្ថានីយអាកាសយានដ្ឋានដ៏ធំល្វឹងល្វើយនេះ នឹងភ្ជាប់ជាមួយស្ថានីយដែលមានស្រាប់ចំនួន២ នៃអាកាសយានដ្ឋានអន្តរជាតិខាងលើ ហើយវាក៏តភ្ជាប់ដោយផ្ទាល់ទៅនឹងទីប្រជុំជន Changchun តាមរយៈផ្លូវថ្នល់ និងរថភ្លើងក្រោមដីផងដែរ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃសុក្រ ទី១០ ខែកុម្ភៈ។
នៅពេលសាងសង់បញ្ចប់ជាស្ថាពរ គេរំពឹងថាស្ថានីយនេះនឹងមានសមត្ថភាពអាចផ្ទុកអ្នកដំណើរ បានរហូតដល់ទៅ២២លាននាក់ឯណោះក្នុងមួយឆ្នាំៗ។ តែទោះជាយ៉ាងណា កាលបរិច្ឆេទនៃការដាក់ឱ្យដំណើរការស្ថានីយនេះជាផ្លូវការ គឺមិនទាន់មានការប្រកាសនៅឡើយទេ។
បង្កើតឡើងក្រោមកិច្ចសហការ ជាមួយវិទ្យាស្ថានរៀបចំផែនការ និងឌីហ្សាញអាកាសយានដ្ឋានចិន (China Airport Planning & Design Institute) និងវិទ្យាស្ថានរចនាស្ថាបត្យកម្មទីក្រុងប៉េកាំង (Beijing Institute of Architectural Design) ប្លង់ឌីហ្សាញស្ថានីយនេះគឺស្ថិតក្នុងចំណោមគម្រោង អាកាសយានដ្ឋានថ្មីៗដ៏គួរឱ្យអារម្មណ៍ ឬគម្រោងពង្រីកអាកាសយានដ្ឋាននានានៅទូទាំងប្រទេសចិន។
ទន្ទឹមនេះ ក៏គ្មានការបញ្ជាក់ពីទំហំ នៃការចំណាយសម្រាប់គម្រោងស្ថានីយអាកាសយានដ្ឋានដ៏ធំនេះដែរ៕ CNN៕