ដោយ វុត្ថា
ភ្នំពេញ៖ ដូចការគ្រោងទុក ក្រុមហ៊ុនអាកាសចរណ៍ Air China បានចាប់ផ្តើមហោះហើរត្រង់ពីទីក្រុងប៉េកាំងរបស់ប្រទេសចិន មកកាន់ទីក្រុងភ្នំពេញ នៅខែមករា ឆ្នាំ ២០១៩ នេះហើយ បន្ទាប់ពីមានការពន្យាពេលនាពេលកន្លងមកនេះ។
ក្រុមហ៊ុនអាកាសចរណ៍ Air China ចាប់ផ្តើមហោះហើរត្រង់មកកម្ពុជាលើកដំបូង
យោងតាមហ្វេសប៊ុកផ្លូវការ Cambodia Airports បានចុះផ្សាយនៅថ្ងៃទី៨ ខែមករា ឆ្នាំ ២០១៩កន្លងមកនេះបានលើកឡើងថា “[ក្រុមហ៊ុនអាកាសចរណ៍ថ្មី] សូមស្វាគមន៍មកកាន់ជើងហោះហើរដំបូងរបស់ Air China ដែលបានមកដល់កាលពីម្សិលមិញនៅក្នុងអាកាសយានដ្ឋានអន្តរជាតិភ្នំពេញ។ ជើងហោះហើរត្រង់ដំបូងដែលភ្ជាប់ពីទីក្រុងប៉េកាំងមកកាន់ទីក្រុងភ្នំពេញ ដែលមានការហោះហើរ៣ជើងក្នុង១សប្តាហ៍ (ថ្ងៃច័ន្ទ ថ្ងៃពុធ និងថ្ងៃសៅរ៍) រីករាយការហោះហើរជាមួយក្រុមហ៊ុនអាកាសចរណ៍” ។
លោក ខែក នរិន្ទដា ប្រធានទំនាក់ទំនងសាធារណៈនៃអាកាសចរណ៍កម្ពុជា ធ្លាប់បានអោយដឹងថា ក្រុមហ៊ុនអាការចណ៍ Air China នឹងប្រតិបត្តិការយន្តហោះចំនួន៣ដែលមានបំពាក់ទង់ជាតិចិន ដោយហោះហើរត្រង់ពីទីក្រុងប៉េកាំង និងទីក្រុងភ្នំពេញរៀងរាល់សប្តាហ៍ចាប់ពីថ្ងៃទី៧ ខែមករាឆ្នាំ២០១៩នេះ។ នៅពេលក្រុមហ៊ុនដាក់អោយដំណើរការហើយនោះ ចំនួនយន្តហោះនឹងកើនឡើងអាស្រ័យលើតម្រូវការ។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោកហូ វណ្ឌីបានឲ្យដឹថា ទោះបីសព្វថ្ងៃមានការហោះហើរត្រង់ពីប្រទេសចិន មកម្ពុជាជាង១០ក្រុមហ៊ុនរួចហើយក្ដី តែជើងហោះហើរត្រង់ថ្មីនេះ នឹងស្រូបយកភ្ញៀវទេសចរចិនកាន់តែច្រើនមកកម្ពុជា ព្រោះថាខេត្តនីមួយៗរបស់ប្រទេសចិន មានមនុស្សរស់នៅរាប់លាននាក់។
លោកបន្តថា ក្រៅពីផ្ដល់ភាពងាយស្រួល សម្រាប់ភ្ញៀវទេសចរចិនមកកាន់កម្ពុជា លោកបញ្ជាក់ដែរថា វាជាការបង្ហាញពីទំនាក់ទំនងល្អរវាងប្រទេសទាំងពីរ ក៏ដូចជា ទាក់ទាញអ្នកវិនិយោគចិនមកកម្ពុជាបន្ថែម ជាកត្តាជំរុញកំណើនសេដ្ឋកិច្ចកម្ពុជា អោយកាន់តែប្រសើរផងដែរ។
លោកបន្តថា “វាក៏ផ្ដល់ភាពងាយស្រួល សម្រាប់ប្រជាជនកម្ពុជាផងដែរ ស្របពេលសព្វថ្ងៃប្រជាជនកម្ពុជា បានចេញទៅកំសាន្តនៅប្រទេសចិនមានការកើនឡើងផងដែរ។
ជាមួយគ្នានេះធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកបានបញ្ជាក់ថា រាល់ការតភ្ជាប់ត្រង់ពីទីក្រុងធំៗមកកាន់កម្ពុជា សុទ្ធតែជាចំណុចវិជ្ជមានយើងស្វាគមន៍ទាំងអស់ឲ្យតែមានការហោះហើរត្រង់មកកម្ពុជា មកកាន់តែច្រើនកាន់តែល្អ។
លោកបន្តថា “ការតភ្ជាប់ត្រង់នាពេលខាងមុខនេះ មិនត្រឹមតែជំរុញអោយមានភ្ញៀវទេសចរចិនមកកម្ពុជាមានការកើនឡើងនោះទេ វាថែមទាំងនាំមកពាណិជ្ជនិងការវិនិយោគបន្ថែមមកកម្ពុជាផងដែរ។ លោកបន្តថា “ការហោះហើរត្រង់ពីទីក្រុងប៉េកាំង ក៏ដូចជាទីក្រុងធំៗដទៃទៀត ផ្ដល់ផលចំណេញជាច្រើនដល់កម្ពុជា ជាពិសេសការចំណាយរបស់ភ្ញៀវទេសចរ ដោយពួកគេមិនបានចំណាយថវិកានៅប្រទេសណាមួយនៅពេលមានការឈប់ចតនោះទេ ដោយថវិការទាំងអស់នឹងត្រូវចំណាយ នៅប្រទេសកម្ពុជាទាំងអស់”៕
