ដោយគង់ សូរិយា
កណ្តាល: សហគ្រិនវ័យក្មេងមួយក្រុមបានបោះទុនរួមគ្នា អភិវឌ្ឍន៍គំរោងបែបលំហែរកាយមួយឈ្មោះRelax Resort ដែលមានទីតាំងនៅកៀកនឹងរាជធានីភ្នំពេញ។
សហភាគហ៊ុនិកនៃគំរោងRelax Resort លោកចក់ ស៊ីណាតបានមានប្រសាសន៍ឲ្យដឹងកាលពីល្ងាចថ្ងៃទី៧ មករាកន្លងមកថា ការវិនិយោគនេះស្ថិតនៅលើទំហំដី៨ហិកតា ដោយមានការរៀបចំហេដ្ឋារចនាសម្ព័ន្ឋ ផ្ទះលំហែរសាងសង់បាន៩០ភាគរយ ភោជនីយដ្ឋានបាន៨០ភាគរយ។ គំរោងនេះមានសាងសង់ផ្ទះបែបលំហែរកាយ និងដីឡូត៍ដែលផ្ទះមានតម្លៃចាប់ពី២៥,០០០ ទៅ៣,០០០០ដុល្លារអាមេរិក និងដីឡូត៍មានតម្លៃចាប់ពី១៥០០០ដុល្លារឡើងទៅ។
លោកបន្តថា “អ្នកទិញដីឡូត៍ក្នុងគំរោងនេះ បើសិនជាពួកគេសាងសង់លំនៅដ្ឋាន យើងនឹងមានគំរូលំនៅដ្ឋានសមស្រប និងមានផាសុខភាពជូនពួកគាត់ ព្រោះយើងមិនចង់ឲ្យអ្នកសាងសង់តាមចិត្តពួកគាត់នឹកឃើញ ហើយធ្វើឲ្យសំណង់មិនរៀបរយនោះទេ”។លោកបន្តថា “វាជាពេលវេលាសមស្របសម្រាប់គំរោងនេះ ដោយសារប្រជាពលរដ្ឋកម្ពុជាបច្ចុប្បន្នមានការផ្លាស់ប្តូរបែបផែននៃការរស់នៅ និងកាន់តែស្រលាញ់ធម្មជាតិ”។
-->
គំរោងនេះស្ថិតនៅក្នុងភូមិប្រាញ់ ឃុំរកា ស្រុកអង្គស្នួល ខេត្តកណ្តាល ដែលមានចម្ងាយប្រមាណ២០គីឡូម៉ែត្រពីរាជធានីភ្នំពេញ។
លោកចក់ ស៊ីណាតបានបន្តថា គំរោងនេះមិនមែនជាដីឡូត៍នោះទេ តែជាគំរោងបែបរមណីយដ្ឋាន ដែលយើងមានផែនការច្បាស់លាស់ក្នុងការរៀបចំប្លង់ ទឹក ភ្លើង ប្រព័ន្ឋលូត្រឹមត្រូវ ហើយក្រុមហ៊ុននៅតែជួយរៀបចំនិងគ្រប់គ្រងគំរោងនេះ ដើម្បីឲ្យអ្នករស់នៅក្នុងគំរោងនេះមានសុវត្ថិភាព និងមានផាសុខភាពក្នុងការរស់នៅ។លោកបន្តថា ជាមួយគ្នានេះអ្នកទិញដីឡូត៍ក្នុងគំរោងនេះ អាចឲ្យយើងសាងសង់ជូន ព្រោះយើងបានធ្វើការងារជាមួយក្រុមហ៊ុនសាងសង់មួយចំនួន ឬអតិថិជនអាចយកជាងពីខាងក្រៅសាងសង់ដោយខ្លួនឯងបាន។
លោកបន្តថា “គំរោងនេះជាតំបន់មានសក្តានុពលមួយ ដែលស្ថិតនៅចំណុចកណ្តាលរវាងផ្លូវជាតិលេខ៣ ផ្លូវជាតិលេខ៤និងផ្លូវជាតិលេខ៤១”។លោកបន្តថា “ទីផ្សារគោលដៅរបស់យើងផ្តោតលើអតិថិជនលើអ្នកមានជីវភាពមធ្យម និងអ្នកមានជីវភាពធូរធារ”។
ជាមួយនឹងគោលដៅជាក់លាក់ ដោយផ្តោតលើអតិថិជនមិនទិញដីឬផ្ទះយកចំណេញនោះទេ តែជាការវិនិយោគលើលំនៅដ្ឋានទី២របស់ពួកគេ ដែលពួកគេអាចមកសំរាកចុងសប្តាហ៍ ដូចជាមកកំសាន្តអាំងសាច់ លំហែរកាយ ឬអានសៀវភៅនៅចុងសប្តាហ៍ជាដើម។
អតិថិជនអាចទំនាក់ទំនងជាវគំរោងនេះ តាមរយៈលេខទូរស័ព្ទ០១២ ៧១៧៧០១ និងលេខ០១៥ ៧១ ៧៧ ០១៕
