ដោយៈ សុផារី
ភ្នំពេញៈ គម្រោងផ្លូវល្បឿនលឿនភ្នំពេញ-បាវិតកំពុងស្ថិតក្នុងដំណាក់កាលដោះស្រាយបញ្ហាដីធ្លី ជាមួយប្រជាពលរដ្ឋ ហើយគ្រោងឈានទៅកាន់ការបើកការដ្ឋានសាងសង់ជាផ្លូវការ នៅក្នុងខែឧសភា ឆ្នាំ២០២៣។
នេះបើយោងតាមការបញ្ជាក់ របស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន នៅថ្ងៃទី១៥ កុម្ភៈ ២០២៣។
លោកទេសរដ្ឋមន្ត្រីបានគូសបញ្ជាក់ថា “បើកការដ្ឋានសាងសង់ផ្លូវល្បឿនលឿនភ្នំពេញ បាវិតនៅក្នុងខែមិថុនា ឬអាចអស់មកត្រឹមខែ៥ ព្រោះយើងកំពុងដោះស្រាយបញ្ហាដីធ្លី”។
ផ្លូវល្បឿនលឿនភ្នំពេញ-ក្រុងបាវិតនេះ មានចំងាយ១៣៨គីឡូម៉ែត្រ និងត្រូវធ្វើស្ពានឆ្លងទន្លេមេគង្គដ៏វែងមួយ ដែលគិតទាំងស្ពាន និងផ្លូវប្រហែលជា៥គីឡូម៉ែត្រ ហើយថវិកាដែលគ្រោងចំណាយ ថវិកាសរុប១.៦៣៨លានដុល្លារ និងគ្រោងនឹងបញ្ចប់នៅឆ្នាំ២០២៧ ស្របគ្នានឹងគម្រោងសាងសង់ផ្លូវល្បឿនលឿនហូជីមិញ-ម៉ុកបៃ របស់ប្រទេសវៀតណាម ដែលគ្រោងនឹងបញ្ចប់ការសាងសង់នៅអំឡុងឆ្នាំ២០២៧៕
