ក្រុមហ៊ុនអាកាសចរណ៍ឡាវ គ្រោងដំណើរការផ្លូវហោះហើរថ្មីៗពីប៉ាក់សេ ឆ្ពោះទៅប្រទេសចិន

ដោយមើលឃើញពីសក្ដានុពលនៃទីក្រុងប៉ាកសេ ជាគោលដៅទេស​ចរណ៍ដ៏លេចធ្លោមួយ និងដោយគិតថា អាកាសយានដ្ឋានអន្តរជាតិក្រុងប៉ាកសេ អនុញ្ញាតការផ្ដល់ទិដ្ឋាការ នៅនឹងកន្លែងពេលមកដល់រយៈពេល៣០ថ្ងៃសម្រាប់ប្រទេសមួយចំនួន ក្រុមហ៊ុនទេសចរណ៍ Siphandone ក្នុងតំបន់សេដ្ឋកិច្ចពិសេសSiphandone បានចុះកិច្ចព្រមព្រៀងជួលយន្តហោះជាផ្លូវការជាមួយក្រុមហ៊ុន Lao Airlines នៅទីក្រុងវៀងចន្ទន៍ កាលពីដើមខែនេះ ដើម្បីជួយពង្រីកសេវាកម្មរបស់ខ្លួន។

ក្រុមហ៊ុន Lao Airlines មានផែនការចាប់ផ្ដើមជើងហោះហើរបន្ថែមទៀតពីប៉ាកសេ ឆ្ពោះទៅកាន់ទីក្រុងធំៗកាន់តែច្រើន នៅក្នុងបណ្ដាប្រទេសជាសមាជិកអាស៊ាន និងគោលដៅនានាក្នុងប្រទេសចិន ដូចជាកោះហៃណាន គ័ងចូវ ឬ ក្វាងចូវ ហុងកុង គុនមីង និងឆាងសា (Changsha) ដែលប្រើពេលហោះហើរ២ម៉ោងកន្លះជាដើម។

ក្រុមហ៊ុន Lao Airlines នៅមុននេះបានប្រកាសថា ខ្លួនមានផែនការចាប់ផ្តើមជើងហោះហើរពីក្រុងវៀងចន្ទន៍ ទៅកាន់ទីក្រុងជាច្រើនទៀតក្នុងប្រទេសចិន ដើម្បីជួយជំរុញទេសចរណ៍ និងការធ្វើដំណើររវាងប្រទេសទាំងពីរ។

កាលពីថ្មីៗនេះ ក្រសួងវប្បធម៌ និងទេសចរណ៍ចិន ក៏បានអនុញ្ញាតឡើងវិញ នូវការធ្វើដំណើរទេសចរណ៍ ជាក្រុមចេញក្រៅមកកាន់២០ប្រទេ​សរួមទាំងប្រទេសឡាវផងដែរ៕ Laotian Times៕