ដោយៈ សហសេវិក
ភ្នំពេញៈ នារាត្រីថ្ងៃទី២៣ ខែកុម្ភៈ ឆ្នាំ២០២៣ លោកអគ្គនាយក ថុន បូរ៉ា អគ្គនាយកក្រុមហ៊ុន ខេអេច លែន បានរៀបចំពិធីជួបជុំ សំណេះសំណាល និងពិសារអាហារសាមគ្គីជូនដៃគូសហការធំៗ ប្រមាណ២០០នាក់ នៅភោជនីដ្ឋានទន្លេបាសាក់២។
កម្មវិធីជួបជុំអាហារសាមគ្គីដ៏ធំនេះ មិនមែនត្រឹមតែជាការជួបជុំសប្បាយតែប៉ុណ្ណោះទេ តែជាឱកាសដ៏ធំមួយដែល លោកអគ្គនាយកថុន បូរ៉ា និងគណៈគ្រប់គ្រងជាន់ខ្ពស់ក្រុមហ៊ុន ខេអេច លែន ធ្វើការថ្លែងអំណរគុណ ជូនដៃគូរសហការធំៗ ដែលកន្លងមកនេះបានធ្វើការខិតខំប្រឹងប្រែង ចូលរួមយ៉ាងសកម្ម លះបង់ទាំងពេលវេលា និងកំលាំងកាយចិត្ត ដែលជាកត្តារុញច្រាន ជួយជម្រុញ ក្រុមហ៊ុន ខេអេច លែន អោយរីកចំរើន ប្រែក្លាយពីក្រុមហ៊ុនតូច ទៅជាក្រុមហ៊ុនដ៏ធំមួយ មានកេរ្តិឈ្មោះលើវស័យអចលទ្រព្យ ក្នុងចំណោមក្រុមហ៊ុនអចលទ្រព្យធំៗ ផ្សេងដទៃទៀតក្នុងប្រទេស នាពេលបច្ចុប្បន្ន។
លោកអគ្គនាយក ថុន បូរ៉ា បានធ្វើការគូសបញ្ជាក់ថា ក្នុងនាមរូបគាត់ផ្ទាល់ ក៏ដូចជា ថ្នាក់ដឹកនាំគ្រប់ជាន់ថ្នាក់ ក្នុងក្រុមហ៊ុន ខេ អេច លែន តែងតែគោរពស្រលាញ់យកចិត្តទុកដាក់ និងជួយសម្របសម្រួលជូនដៃគូរសហការទាំងអស់របស់ក្រុមហ៊ុនស្មើៗគ្នា ធ្វើយ៉ាងណា ដៃគូរសហការទាំងអស់ទទួលបានភាពកក់ក្តៅ និងបន្តជោគជ័យរីកចំរើនជាមួយគ្នាបន្តទៀត។
លោកអគ្គនាយក ថុន បូរ៉ា ក៏បានស្នើសុំអោយដៃគូរសហការទាំងអស់បន្តប្រឹងប្រែង និងជម្រុញសកម្មភាពបន្ថែម ផ្តោតលើសកម្មភាពដែលត្រូវ ពង្រឹងសាមគ្គីភាពផ្ទៃក្នុង និងខិតខំពុះពារជំនះនូវរាល់ឧបសគ្គ ក្នុងអំឡុងពេលដែលប្រទេសយើង កំពុងទទួលរងនូវផលប៉ះពាល់បន្តិចបន្តួច ពីវិបត្តិសេដ្ឋកិច្ចសកលនេះ។
បន្ទាប់ពីបញ្ចប់ពិធីសំណេះសំណាល សួរសុខទុក្ខរួចមក គណគ្រប់គ្រងព្រមទាំងដៃគូសហការ បានអញ្ជើញចូលរួមពិសារភោជនីអាហារ ជុំគ្នា និងថតរូបទុកជាអនុស្សាវរីយ៍៕
